Қарақалпақстан Республикасы Жоқарғы Кеңеси

⌂ ЎЗ ҚР РУ EN

Қарақалпақстан Республикасы

Жанажан Ўатанымыз – Өзбекистан Республикасы өзиниң ғәрезсиз раўажланыў жылларында әсирлерге барабар жолды басып өтти. Тарийхый қысқа усы дәўирде қала ҳәм аўылларымыздың, пүткил елимиздиң келбети, жәмийетимиздеги социаллық-сиясий мүнәсибетлер пүткиллей өзгерди. Турмысымыздың барлық салалары менен тармақларында турақлы өсиў пәтлери көзге тасланбақта. Ең әҳмийетлиси, халқымыз қәлбинде өз журтына ийелик етиў сезими, усы уллы Ўатанның бүгинги ҳәм ертеңги күнине жуўапкершилик туйғылары күшейип, оның сана-сезими менен дүньяға көз-қарасы кеңейип бармақта.

Ғәрезсизлик жыллары пүткил мәмлекетимизге, ҳәр бир аймақ ҳәм регионға дөретиўшилик ҳәм жаңаланыўлар баслап келгениниң тастыйығын Өзбекистанымыздың арқа бөлегинде жайласқан Қарақалпақстан Республикасы мысалында да айқын көриў мүмкин.

Сақый ҳәм бийтәкирар қарақалпақ топырағы мәмлекетимиздиң социаллық-экономикалық раўажланыўында айырықша орын ийелейди. Бул туўралы сөз еткенде, ҳүрметли Президентимиз Ислам Абдуғаниевич Каримовтың «Қарақалпақ халқы мудамы журтымыздың сүйенген таўларының бир болып есапланған» деген сөзлерин ядқа алыў орынлы.

Сонлықтан да ғәрезсизлик жылларында басқа аймақлар қатарында Қарақалпақстанның раўажланыўына да үлкен итибар берилмекте. Мине, усындай дыққат-итибар арқасында бүгинги күнде республика пайтахты – Нөкис қаласынан баслап, район орайлары, қала ҳәм аўыллар, ҳәтте ең шетте жайласқан аўылларға шекем ҳәр тәреплеме өзгерип, жаңаланып, раўажланып бармақта. Бунда, әсиресе, мәмлекетимиз басшысының тиккелей басламасы менен ислеп шығылып, үзликсиз әмелге асырылып атырған Қарақалпақстан Республикасын социаллық-экономикалық раўажландырыў бағдарламалары үлкен әҳмийетке ийе болмақта. Соны да айтыў керек, бул бағдарламалар республиканы әсирлер даўамындағы әпиўайы аграр үлкеден заманагөй өндирислик ҳәм социаллық-экономикалық инфрадүзилмелерге, транспорт-коммуникация тармақларына, маман кадрларға ийе қүдиретли аймаққа айландырыўды нәзерде тутады.

Бағдарламалардың басқышпа-басқыш турмысқа енгизилиўи нәтийжесинде қарақалпақ дияры бүгинги күнде танып болмас дәрежеде өзгерип, жылдан-жылға шырай ашып, жедел пәтлер менен раўажланып баратырған үлкеге айланды.

Ғәрезсизлик жылларында бул жерде әмелге асырылған үлкен социаллық-экономикалық өзгерислер, қурылыс ҳәм абаданластырыў жумысларын санап шегине жетиў мүмкин емес. Орайлық Азияда бирден-бир есапланған, саҳра қойнындағы кәрамат деп ат алған Қоңырат сода заводы, Хожели шийше заводы, «Орайлық Азия безеў таслары» қоспа кәрханасы, Қоңыраттағы карбид, Нөкистеги мрамор ҳәм кабель заводлары, Үрге газ кәни, “Элтекс” ҳәм “Катекс” комплекслери сыяқлы заманагөй өндирислик объектлери, Қарқалпақстан Республикасы Жоқарғы Кеңеси, Ташкент мәлимлеме технологиялары университетиниң Нөкис филиалы, Олимпия резервлери колледжи имаратлары, 345 километрлик Наўайы–Нөкис темир жолы, Нөкис пенен Хожелини байланыстырыўшы үлкен көпир, Қоңырат автомобиль жолы, онлап улыўма билим бериў мектеплери, лицей ҳәм колледжлер, балалар спорты, балалар музыка ҳәм көркем өнер мектеплери сыяқлы көплеген имаратлар – булардың ҳәммеси ғәрезсизликтиң жемиси болып есапланады.

Миллий автомагистрал қурылысында жүз берген үлкен ўақыялардың бири – бул усы жолдың Нөкис қаласына кирер жеринде жаңа көпир ҳәм кесилиспе жолдың қурылысы болып табылады.

Соны айрықша атап өтиў керек, ҳүрметли Президентимиздиң басламасы менен ирге тасы қаланған Үстирт газ-химия комплексиниң қурылысы бүгинги күнде дүнья халықларының итибарын өзине қаратпақта.

Ең әҳмийетлиси, қарақалпақ халқы әсирлер даўамында әрман етип, умтылып келген ийгиликли мақсетине жетти – азат ҳәм еркин, тыныш-татыў турмысқа еристи, өз тарийхын, мәдений мийрасын, миллий дәстүрлери менен қәдириятларын тиклеў, өзлигин аңлаў имканиятына ийе болды.

Қарақалпақстан Республикасы Өзбекистанның арқа-батыс бөлиминде, Әмиўдәрьяның төменги жағында, Арал теңизиниң түслик жағаларында жайласқан. Республика түслик-батыс тәрептен Қарақум шөлине тутасқан. Оның арқа-батысында Үстирт тегислиги, арқа-шығыс тәрепинде болса Қызылқум шөли бар. Арал теңизиниң түслик аймағы қарақалпақ жеринде жайласқан. Қарақалпақстанның улыўма жер майданы 166,6 мың квадрат километрден ибарат болып, ол аймағының үлкенлиги жағынан Өзбекстан Республикасы ўәлаятлары арасында биринши орында турады. Республика халқының саны 1 миллион 700 мың адамнан артық.

Республиканың ҳәкимшилик-аймақлық дүзилиси 14 район ҳәм 1 қаладан ибарат. Булар - Әмиўдәрья, Беруний, Қараөзек, Кегейли, Қоңырат, Қанлыкөл, Мойнақ, Нөкис, Тахтакөпир, Төрткүл, Хожели, Шымбай, Шоманай, Елликқала районлары менен Нөкис қаласы.

Қарақалпақстан Өзбекистан Республикасы қурамындағы парламентлик басқарыў формасына ийе суверен республика болып есапланады. Қарақалпақстан өз Конституциясына, байрағы, герби ҳәм гимнине ийе. Қарақалпақстанның Конституциясы ҳәм нызамлары Өзбекистан Республикасы Конституциясы ҳәм нызамларына муўапық ислеп шығылған. Республикада улыўма басшылық Жоқарғы Кеңес Баслығы – Қарақалпақстан Республикасы парламенти тәрепинен әмелге асырылады.

Республиканың жоқары атқарыўшы ҳәкимияты Қарақалпақстан Республикасы Жоқарғы Кеңеси тәрепинен тастыйықланған Министрлер Кеңеси болып есапланады. Республика Министрлер Кеңесиниң қурамына Министрлер Кеңесиниң Баслығы, Баслықтың орынбасарлары, министрлер, мәмлекетлик комитетлердиң баслықлары, ири концернлер ҳәм бирлеспелердиң басшылары киреди. Қарақалпақстан Республикасы Министрлер Кеңесиниң Баслығы лаўазымы бойынша Өзбекистан Республикасы Министрлер Кабинетиниң қурамына киреди. Өзбекистан Республикасы пайтахты Ташкент қаласында, Өзбекистан Республикасы Министрлер Кабинети қасында Қарақалпақстан Республикасының турақлы ўәкилханасы жумыс жүргизеди.

 

Сонғы жаңалықлар RSS

07.12.2018 КОНСТИТУЦИЯ БАЙРАМЫНА БАҒЫШЛАНҒАН САЛТАНАТЛЫ МӘЖИЛИС

Усы жыл 7-декабрь күни Бердақ атындағы Қарақалпақ мәмлекетлик академиялық музыкалы театрында Өзбекстан Республикасы Конституциясы қабыл етилгениниң 26 жыллығына бағышланған салтанатлы мәжилис болып өтти.

06.12.2018 ЖӘМИЙЕТЛИК ТӘРТИПТИ САҚЛАЎДА БИРГЕ ИСЛЕСИЎ ИЛАЖЛАРЫ ДОДАЛАНДЫ

Усы жыл 6-декабрь күни Қарақалпақстан Республикасы Жоқарғы Кеңесинде Өзбекстан Республикасы Президентиниң 2018-жыл 4-декабрьдеги «Қарақалпақстан Республикасында жәмийетлик тәртипти сақлаў ҳәм ҳуқықбузарлықлар профилактикасы системасының нәтийжелилигин арттырыў илажлары ҳаққында»ғы бийлиги талапларын орынлаў, тараўда алда турған әҳмийетли ўазыйпаларға бағышланған мәжилис болып өтти.

05.12.2018 ЖЫНАЯТШЫЛЫҚҚА ҚАРСЫ ГҮРЕСИЎДЕГИ ЖУМЫСЛАР ТАЛҚЫЛАНЫП, ЎАЗЫЙПАЛАР БЕЛГИЛЕНДИ.

Усы жыл 4-декабрь күни Қарақалпақстан Республикасы Жоқарғы Кеңесинде жынаятшылықтың алдын алыў ҳәм ҳуқықбузарлыққа қарсы гүресиў бағдарында республикамызда алып барылып атырған жумыслардың барысы, орын алып атырған кемшиликлер ҳәм оларды сапластырыўға бағышланған мәжилис болып өтти. 

03.12.2018 БЕЛСЕНДИ ЖАС ШАҢАРАҚЛАР ЖАҢА ЖЫЛДЫ ЖАҢА ҮЙИНДЕ КҮТИП АЛАДЫ

Нөкис қаласы «Қумбыз аўыл» мәкан пуқаралар жыйыны аймағында  елимиздиң жәмийетлик турмысында белсене қатнасып атырған гезектеги 48 жас шаңарақ ийелерине өз квартираларын тапсырыў мәресими болып өтти.

28.11.2018 БМШның АРАЛБОЙЫ АЙМАҒЫ УШЫН ТРАСТ ФОНДЫ ЖУМЫС БАСЛАДЫ

Усы жылдың 27-ноябрь күни БМШның Нью-Йорк қаласындағы бас имаратында Аралбойы аймағы ушын инсан қəўипсизлиги бойынша көпшериклик траст фонды жумысының жолға қойылыўына бағышланған Инсан қəўипсизлиги бойынша көпшериклик траст фондының презентациясы ҳəм «Турақлы раўажланыўды қоллап-қуўатлаў бойынша кең көлемли стратегияларды өз ишине алған аймақлық ҳəм халықаралық бирге ислесиўди раўажландырыў» атамасындағы БМШның жоқары дəрежедеги мəжилиси болып өтти. 

27.11.2018 ДАҒАЗА

Қарақалпақстан Республикасы Жоқарғы Кеңеси мәмлекетлик басқарыў уйымлары ҳәм хожалық жүргизиўши субъектлер, жергиликли атқарыў ҳәкимияты ҳәм басқада шөлкемлерде ислеўши жетекшилик қәбилети ҳәм басқарыў уқыбына ийе перспективалы кадрларды таңлап алыў ҳәм оларды қоллап-қуўатлаў, сондай-ақ, басшы лаўазымлар ушын кадрлар резервин қәлиплестириў мақсетинде таңлаў өткерилетуғынлығын жәриялайды.

27.11.2018 НӨКИСТЕ ХАЛЫҚАРАЛЫҚ ФОРУМ БОЛЫП ӨТТИ

Алдын хабар етилгениндей, Бирлескен Миллетлер Шөлкеминиң бурынғы Бас хаткери Пан Ги Мун басшылығындағы Қубла Корея Ҳүкимети ҳəмде социал-экономикалық тараў ўəкиллеринен ибарат делегация республикамызда сапарда болмақта.

26.11.2018 ЖОҚАРҒЫ КЕҢЕСТЕГИ ҚАБЫЛЛАЎ

26-ноябрь күни Қарақалпақстан Республикасы Жоқарғы Кеңесинде Бирлескен Миллетлер Шөлкеминиң бурынғы Бас хаткери Пан Ги Мун басшылығындағы делегацияны қабыллаў мәресими болып өтти.

20.11.2018 ХАЛЫҚ ДЕПУТАТЛАРЫ ҚОҢЫРАТ РАЙОНЛЫҚ КЕҢЕСИНИҢ ГЕЗЕКСИЗ СЕССИЯСЫ

20-ноябрь күни халық депутатлары Қоңырат районлық Кеңесиниң гезексиз отыз сегизинши сессиясы болып өтти.