Қарақалпақстан Республикасы Жоқарғы Кеңеси

⌂ ЎЗ ҚР РУ EN

«1-октябрь - Муғаллимлер ҳәм устазлар күни» улыўма халықлық байрамы мүнәсибети менен қутлықлаў

Ҳүрметли муғаллимлер!
Қәдирли устазлар!

Бәршеңизди Қарақалпақстан Республикасы Жоқарғы Кеңеси ҳәм Министрлер Кеңеси атынан улыўма халықлық байрам - Муғаллимлер ҳәм устазлар күни менен шын жүректен қутлықлаймыз.

Ҳәр биримиз ушын ең әзиз ҳәм ең қәдирли болған перзентлеримизге билим ҳәм тәрбия, келешекке анық бағдар бериўдей уллы ҳәм қайырлы иске өзиниң өмирин бағышлаған муғаллимлер менен устазлардың мийнетлери алдында қаншама тәжим етсек те арзыйды. Себеби, үлкен өмирге жоллама ең дәслеп мектеплерден басланса, турмыстың туңғыш сабақлары муғаллим ҳәм устазлардың билим ҳәм тәжирийбелери арқалы ҳәр биримиздиң жүрегимизге сиңип барады.

Ҳақыйқатында да, Ҳүрметли Президентимиз атап өткендей, «Мектеп деген уллы дәргайдың инсан ҳәм жәмийеттиң раўажланыўындағы үлеси ҳәм тәсирин, тек ғана жасларымыз емес, ал, пүткил халқымыздың келешегин шешетуғын оқытыўшы ҳәм устазлардың мийнетин ҳеш нәрсе менен өлшеп, салыстырып болмайды».

Әсиресе, соңғы жыллары жасларымызды миллий Ғәрезсизлик идеясы руўхында тәрбиялаў, ул-қызларымызды физикалық ҳәм руўхый жақтан жетик инсанлар етип жетилистириў, оларды ҳәр тәреплеме нәўқыран етип кәмалға келтириў сыяқлы ийгиликли ислерге қосып киятырған хызметлериңизди жоқары баҳалаймыз.

Соны да айрықша атап өтиўимиз тийис, Ғәрезсизлик жылларында жаңа принциплер, миллий қәдирият ҳәм дәстүрлер, дүньядағы алдынғы тәжирийбелер тийкарында билим алған жасларымыз тәрепинен қолға киргизилип атырған жоқары нәтийжелер бүгин бәршемизде миллий мақтаныш сезимлерин оятпақта.

Бул ең дәслеп елимизде «Кадрлар таярлаўдың миллий бағдарламасы» ҳәм оның нызамлы даўамы болған «Мектеп билимлендириўин раўажландырыў бағдарламасы»ның қабыл етилиўи, қалаберсе, Сизлердиң пидәкерли ҳәм жемисли мийнетлериңиздиң нәтийжеси деп билемиз.

Ғәрезсизлик жылларында 40 тан аслам мектеплер жаңадан қурылған болса, 275 мектепке капитал реконструкция, 280 мектепке ири оңлаў жумыслары алып барылды.

Быйылғы жылдың өзинде инвестиция бағдарламасы тийкарында 3 мектеп жаңадан қурылып, перзентлеримиздиң ийгилигине тапсырылған болса, 26 мектепте капитал реконструкция ҳәм ири оңлаў жумыслары жүргизилди. Сондай-ақ, Балалар спортын раўажландырыў қоры есабынан Хожели, Қанлыкөл ҳәм Әмиўдәрья районларында балалар музыка ҳәм көркем-өнер мектеплериниң, Нөкис районында II ТИП балалар спорт комплексиниң жаңа қурылысы жуўмақланыў алдында тур.

Бүгинги күнде билимлендириў мәкемелерин заман талаплары тийкарында қайта үскенелеў, оқыў барысына алдынғы педагогикалық ҳәм мәлимлеме-коммуникация технологияларын, интернет системасын кеңнен енгизиў, оқыў ҳәм лаборатория кабинетлерин дүзиў, сабақлық және қолланбалардың жаңа әўладын жаратыў бойынша кең көлемли жумыслар алып барылмақта.

Және бир әҳмийетли мәселе - бул саламат пикир жүргизе алатуғын, ҳәр тәреплеме жетилискен әўладты тәрбиялаўдай ийгиликли мақсетлерди өзинде жәмлеген Ҳүрметли Президентимиздиң «Шет тиллерди үйрениў системасын буннан былай да жетилистириў илажлары ҳаққында»ғы Қарары талапларын сөзсиз орынлаў болып табылады.

Бул бойынша Қарақалпақстан Республикасы Жоқарғы Кеңеси ҳәм де Өзбекстан Республикасы Халық билимлендириў министрлиги тәрепинен қоспа ис-илажлар бағдарламасы қабыл етилип, онда улыўма билим бериў мектеплеринде шет тиллерин үйретиў бойынша материаллық-техникалық базаны беккемлеў, муғаллимлердиң билимлерин жетилистириў, оқыў-методикалық қолланбалар ҳәм сабақлықлар менен тәмийинлеў мәселелерине айрықша итибар қаратылмақта. Соны да атап өтиўимиз тийис, перзентлеримиздиң биринши класстан баслап шет тиллерин үйрениўи ушын қолайлы шараятлардың жаратылыўы олардың ҳәр тәреплеме жетилискен, заманагөй пикирлеўши, жәҳән жәмийетшилиги арасында елимиздиң абырайын мүнәсип қорғай алатуғын нәўқыран әўладлар болып жетилисиўине хызмет етеди.

Әлбетте, алда турған бундай мақсетлерге ерисиўде Сизлердиң билим ҳәм тәжирийбеңизге, пидайылығыңызға, күш-жигериңизге, талантыңыз бенен шеберлигиңизге беккем исенемиз.
Қәдирли муғаллимлер ҳәм устазлар!

Сизлерди «1-октябрь - Муғаллимлер ҳәм устазлар күни» улыўма халықлық байрамы менен және бир мәрте қызғын қутлықлап, бәршеңизге беккем денсаўлық, шаңарақларыңызға аманлық, елимиз келешегин белгилейтуғын жасларды тәрбиялаўдай ийгиликли ислериңизде тасқын табыслар тилеймиз.

 

Қарақалпақстан Республикасы
Жоқарғы Кеңеси

Қарақалпақстан Республикасы
Министрлер Кеңеси    

 

Басқа жаңалықлар RSS

08.07.2019 ИСБИЛЕРМЕНЛЕРДИҢ МАШҚАЛАЛАРЫ ҮЙРЕНИЛДИ

Усы жыл 8-июль күни Қарақалпақстан Республикасы Жоқарғы Кеңесинде исбилерменлер менен ушырасыў болып өтти.

06.07.2019 «ЖАСЛЫҚ»ТА КӨШПЕЛИ ҚАБЫЛЛАЎ

Усы жылдың 6-июль күни Қарақалпақстан Республикасы Жоқарғы Кеңесиниң Баслығы М.Ер­ния­зовтың пуқараларды көшпели қабыллаўы пайтахтымыз Нөкис қаласынан 300 км узақлықтағы, республикамыздың  ең шетки аймақларының бири есапланған Қоңырат районының «Жаслық» посёлка пуқаралар жыйынында болып өтти.

06.07.2019 ЖУМЫСЛАР ЖУЎАПКЕРШИЛИГИ ЖАНЛАНАЖАҚ

6-июль күни Өзбекстан Республикасы Бас министриниң орынбасары, Республика Ҳаял-қызлар комитети баслығы Элмира Боситхонова Өзбекстан Республикасы Президенти Ш.Мирзиёев тәрепинен Олий Мажлис Сенатының жигирмаланшы жалпы мәжилисинде белгилеп берилген ўазыйпалардың орынланыўын ҳәм Ҳаял-қызлар комитети хызметиниң әпиўайы ҳәм халықшыл болыўын тәми­йинлеў, усы тараў жумысларын системалы шөлкемлестириў, халық, әсиресе, ҳаял-қызлардың жасаў шараятын жақсылаўдағы тәсирин күшейтиў мақсетинде республикамызда болды.

05.07.2019 СПОРТ ҲӘПТЕЛИГИ ЖУЎМАҚЛАНДЫ

Республикамызда «Олимпиада күни»не бағышланған спорт ҳәптелиги кең түрде белгиленди. Илаж шеңберинде Нөкис қаласында ҳәм районларда спорт жарыслары, белгили спортшылар ҳәм ветеранлар менен ушырасыўлар өткерилди.