Қарақалпақстан Республикасы Жоқарғы Кеңеси

⌂ ЎЗ ҚР РУ EN

ЫЛҒАЛЛЫ ҚУРЫЛЫС МАЙДАНШАСЫНА АЙЛАНҒАН ЖЕРДЕ

Азанғы, жулынып тур­ған суўықтың «шақы» сәскеге қарай сынды. Адамларды сең-сең тон емес, ҳәрекет, мийнет ғана жылытар екен. Ылғаллы қурылыс майданшасына айланған Мойнақта бүгинги күнде қурылыс ислери қызғын. Президентимиз Ш.Мирзиёевтиң қутлы қәдемлери тийген, жағысын таслап қашқан теңиз бойындағы балықшылар қаласын пүткил дүнья ҳәўес пенен қарайтуғын бағы-бостанға айландырыў ушын қурылыс жумыслары кең көлемде жүргизилмекте. Солардың ишинде тырнағы муқыят қаланып, гербишлери өрилген, үстин темир-бетон плиталары менен бастырып атырған қурылысшыларға ҳармасын айттық.
— Суўық қолларымызды иркип атырған жоқ, қайтама шыйрақластырды. Арал бойының қатал тәбиятына да үйренистик, - дейди арматураларды тоқып, кепсерлеўши Арыслан Низаматдинов жумыс арасында.
— Ўақыт ғәниймет, Наў­рыз байрамы ҳүрметине тапсырылыўы керек болған «№1 объект» деп қабыл еткен 800 орынлық жазғы театрды сапалы қурып, пайдаланыўға бериўдиң талабындамыз. Ең заманагөй, архитектуралық үлгидеги бундай жазғы театр­ды пайтахтымыз Нөкис­те де қур­ған едик.
Жуўапкершилиги шекленген «ҚҚоңлаўқурылыс» жәмийетине қараслы 2-санлы Нөкис қалалық қурылыс басқармасы өткен әсирдиң елиўинши жыллары қуралған, ең ески қурылыс шөлкемлеринен бири екенин ислеўшилер мақтаныш етеди. Жыл басында басқалар қатары арнаўлы техника, көшпели үйлер, меха­низм­лери менен қурылысшылар көтериңки руўх пенен кәрўан дүзип, Арал бойына қарай жол алысқан. Сыртқы жағдайға тез көнлигип, ийкемшил болғанлықтан ис басының аўырманлығын жеңе билген. Жумыстың көлемин бөлип алып ислеўши Өмирбай Ниязов, Қуралбай Мамутов басқарған комплексли бригада ағзалары ўақыт пенен санаспай ислеўге өтипти. «Ақбаслы»ға қурылған айланба печьлерден 150 мың дана пискен гербиш шыққанына қуўанышлы. Басқа да цемент, темир-бетон буйымлары, керекли затлар алыс аралықлардан өз ўақтында иркинишсиз тасып жеткерилмекте. Бетон қарыўшы ҳәм жүк түсириўши механизмлерди басқарыўшылардан Дәрьябай Ембергенов, Теңел Жуматов, Жубатхан Әўезовларды өз кәсиплеслери үлги тутпақта. Жумыссыз жүрген «Порлытаў»лы жаслардан Саламат Ильясов, Муратбай Оразалиев, Муратбай Әбдиевлар өз қәнигеликлери бойынша аўылынан жумыс тапқанына қуўанышлы. Мийнет адамларына ғамқорлық, қолайлы турмыс шараятларының жаратылып берилиўи истиң усындай  нәтийжели болыўына алып келмекте.

 

Басқа жаңалықлар RSS

10.05.2019 «МЕҲНАТ ФАХРИЙСИ» КӨКИРЕК БЕЛГИСИ ТАПСЫРЫЛДЫ

Усы жыл 10-май күни Нөкисте Өзбекстан Республикасы Президентиниң 2016-жыл 28-декабрьдеги «Өзбекстан ветеранларын социаллық қоллап-қуўатлаў «Нураний» қорының жумысын буннан былай да жетилистириў илажлары ҳаққында»ғы Пәрманы тийкарында шөлкемлестирилген I, II, III дәрежели «Меҳнат фахрийси» көкирек белгилерин тапсырыў салтанаты болып өтти.

09.05.2019 АТА-БАБАЛАРДЫ ЕСЛЕЎ-МУҚАДДЕС ҚӘДИРИЯТ

Пайтахтымыздағы «Ҳəсиретли ана» естелиги алдында 9-май — «Еслеў ҳəм қəдирлеў күни»не, сондай-ақ, Екинши жер жүзилик урыста қурбан болғанлардың ҳүрметине арналған мəресим болып өтти.