Қарақалпақстан Республикасы Жоқарғы Кеңеси

⌂ ЎЗ ҚР РУ EN

ПРЕЗИДЕНТ МЕКТЕБИНИҢ ТЫРНАҚ ТАСЫ ҚАЛАНДЫ

Усы жыл 7-март күни Нөкис қаласынан қурылатуғын Президент мектебиниң дәслепки тырнақ тасы қаланды.
Илажда  Өзбекстан Республикасы Бас министриниң биринши орынбасары А.Раматов, Өзбекстан Республикасының Бас прокуроры О.Мурадов, Қарақалпақстан Республикасы Жоқарғы Кеңесиниң Баслығы М.Ерниязов ҳәм басқалар қатнасып, Президент мектеби қурылыс жумысларының жойбары менен танысты.
Атап өтилгениндей, елимизде жаслардың интеллектуаллық ҳәм дөретиўшилик потенциалын раўажландырыў, қәбилетли балаларды қоллап-қуўатлаў бағдарында кең көлемли илажлар әмелге асырылмақта. Өзбекстан Республикасы Президенти Шавкат Мирзиёев орынларда әмелге асырылып атырған реформалар, дөретиўшилик жумыслары, ири жойбарлар менен танысыў мақсетинде 2018-жылдың 15-16-ноябрь күнлери  республикамызға сапары ўақтында жоқары потенциаллы кадрларды тәрбиялаў мақсетинде елимиздиң ҳәр бир аймағында биреўден жаңа типтеги Президент мектеплерин шөлкемлестириў, бул жумысты Қарақалпақстаннан, Нөкис қаласынан баслаўды усыныс еткен еди. Елбасшымыздың 2019-жыл 20-февраль күни «Президент мектеплерин шөлкемлестириў илажлары ҳаққында»ғы қарары қабыл етилип, бул бағдардағы жумыслар баслап жиберилди.
Президент мектебиниң жаңа имараты ушын Нөкис қаласындағы «Қурылысшы» мәкан пуқаралар жыйыны аймағынан, Бердақ атындағы Қарақалпақ мәмлекетлик университети жаныннан 2х3 гектар жер майданы ажыратылып, қурылыс жумысларын усы жылдың 20 августына шекем толық жуўмақлаў жобаластырылған. Сентябрь айында жаңа оқыў жылы басланып, 5-10-класслардың ҳәр бирине 24 оқыўшыдан – жәми 144 оқыўшы оқыўға қабыл етиледи.
Президент мектеплеринде оқыўшылар Кембридж университетиниң халықаралық имтихан бөлиминиң тәжирийбели қәнигелери тәрепинен сайлап алынып, STEAM – билимлендириў» (Science – тәбийғый пәнлер, Technology – технология, Engineering – техникалық дөретиўшилик, Art – көркем өнер, Mathematics – математика) бағдарламасы енгизиледи.
—Бул мектеп қурылысының Нөкис қаласынан басланып атырғаны Президентимиздиң республикамыз халқына, соның ишинде, жасларымызға болған айрықша итибар ҳәм ғамқорлығы болып табылады,— дейди  Қарақалпақстан Республикасы Халық билимлендириў министри Аманжол Аяпов. —Жаңа мектепте оқыў инглис тилинде алып барылатуғынлығы есапқа алып, сырт елли тәжирийбели педагогларды кеңнен тартыў жумыслары алып барылмақта.
Усы күни Президент мектебиниң дәслепки тырнақ тасы қаланып, қурылыс жумыслары баслап жиберилди.

 

Басқа жаңалықлар RSS

12.03.2019 54 ШАҢАРАҚ ТУРАҚ ЖАЙ МЕНЕН ТƏМИЙИНЛЕНДИ

Усы жылы 12-март күни Тақыятас районында республикамыз бойынша 54 кем тәмийинленген шаңараққа Өзбекстан кәсиплик аўқамлары Федерациясының қәўендерлигинде жаңа турақ жайларды тапсырыў салтанаты болып өтти.

11.03.2019 СОЦИАЛЛЫҚ ТАРАЎДЫ РАЎАЖЛАНДЫРЫЎҒА ИТИБАР

Усы жыл 11-март күни Қарақалпақстан Республикасы Жоқарғы Кеңесинде 2017-2021-жылларда Өзбекстан Республикасын раўажландырыўдың бес тийкарғы бағдары бойынша Ҳәрекетлер стратегиясын «Жедел инвестициялар ҳәм социаллық раўажланыў жылы»нда  әмелге асырыўға байланыслы Мәмлекетлик бағдарламаның, соның ишинде, социаллық тараўды раўажландырыў бойынша ўазыйпалардың орынланыўына бағышланған семинар болып өтти.