Қарақалпақстан Республикасы Жоқарғы Кеңеси

⌂ ЎЗ ҚР РУ EN

МҮРӘЖАТЛАР ИТИБАРДАН ШЕТТЕ ҚАЛМАДЫ

Усы жыл 1-май күни Қараөзек районының «Мәденият» аўыл пуқаралар жыйынында Қарақалпақстан Республикасы Жоқарғы Кеңесиниң Баслығы М.Ерниязовтың Қараөзек, Тахтакөпир, Шымбай ҳәм Кегейли районлары пуқараларын көшпели қабыллаўы болды.

Өзбекстан Республикасы Президентиниң Қарақалпақстан Республикасындағы Халық қабыллаўханасы тәрепинен шөлкемлестирилген илажға министрликлер менен ведомстволардың, ҳуқық қорғаў уйымларының, жоқарыда атап өтилген районлардың 4 сектор басшылары, жәмийетлик шөлкемлердиң, ғалаба хабар қуралларының ўәкиллери қатнасты.

Илажда пуқаралар тийкарынан турақ жай менен тәмийинлеў, жумысқа орналасыў, жол қурылысы, коммуналлық хызмет көрсетиў, емлениў, мектеп ҳәм мектепке мектепке шекемги билимлендириў мәкемелериниң жумыслары, жеңиллетилген кредит алыў ҳәм басқа да бир қатар мәселелер бойынша мүрәжат етти. Мәселен, Кегейли районы «Жаңабазар» аўыл пуқаралар жыйында жасаўшы Елмурат Кәлимбетов усы аймақтан өтетуғын каналға қурылған көпирди оңлаў бойынша Халық қабыллаўханасына мүрәжат еткен. Қарақалпақстан Республикасы Автомобиль жоллары бас басқармасы басшылары тәрепинен оның мүрәжаты көрип шығылып, унамлы шешимин тапты. Жақын арада көпир толық оңланып, пайдаланыўға тапсырылады.

Усы райондағы «Қазанкеткен» аўыл пуқаралар жыйынынан Орақбай Нағметуллаев 4Р-178 Кегейли-Бозатаў автомобиль жолы ҳәм көпирлердиң жағдайы бойынша мүрәжат еткен. Тараў басшыларының атап өткениндей, бул жолдың қурылысы быйылғы жылдың бағдарламасына киргизилип, 1 миллиард 975 миллион сум қаржы ажыратылған.

Усы күни Қарақалпақстан Республикасы Бәнтлик ҳәм мийнет қатнасықлары министрлиги тәрепинен бос жумыс орынларының ярмаркасы шөлкемлестирилди. Оған Қараөзек, Тахтакөпир, Шымбай ҳәм Кегейли районларынан 180 мәкеме ҳәм кәрхана өзлериндеги 726 бос жумыс орны менен қатнасты. Ярмарка даўамында 51 пуқара өз қәнигелиги бойынша жумысқа орналасқан болса, 453 пуқараға ис ҳақы төленетуғын  жәмийетлик жумыс усынылды.

-Бир нешше жылдан берли жумысқа орналаса алмай киятыр едим,-дейди Қараөзек районындағы Алғабас аўыл пуқаралар жыйынының турғыны Гүлбәҳәр Әбдикәримова.-Бүгинги ярмаркада районлық медицина бирлеспесине мийирбийке болып жумысқа орналастым. Бул ушын шөлкемлестириўшилерге миннетдаршылық билдиремен.

-Қараөзек районы «Қутлы мәкан» мәкан пуқаралар жыйынындағы Шанияз Ерниязов көшеси турғынларының машқаласы бойынша көшпели қабыллаўға келдим,-дейди Салтанат Жақсымова.-Себеби, жаўын-шашынлы күнлерде көшемизден жүриў, әсиресе, балаларымыздың оқыўға қатнаўы жүдә қыйын болып қалды. Бул бойынша тийисли орынларға хабарластым, бирақ нәтийже болмады. Республикамыздың басшысына рахмет, мениң мүрәжатымды итибарға алып, машқала жақын күнлерде шешилетуғынын билдирди.

Тахтакөпир районы  «Тахтакөпир» посёлкалық пуқаралар жыйынынан екинши топар майыбы  Сабит Ешимов 7-класста оқыйтуғын қызының көзин операция ислетиўге материаллық жәрдем сорап мүрәжат еткен. Оның мүрәжаты район ҳәкимлиги ҳәм Қарақалпақстан Республикасы Денсаўлықты сақлаў министрлиги басшылары тәрепинен көрип шығылып, районлық медицина бирлеспеси тәрепинен бийпул ордер ҳәм район ҳәкимлиги тәрепинен 4 миллион 600 мың сум қаржы ажыратылатуғын болды. Сондай-ақ, усы райондағы   «Атакөл» аўыл пуқаралар жыйынынан Сәрбиназ Бектурсынова ишимлик суў машқаласы бойынша, «Қоңыраткөл» аўыл пуқаралар жыйынынан  Берикбай Даршеев, 18-санлы улыўма билим бериў мектебине компьютер класы кереклиги бойынша көшпели қабыллаўға келген. Олардың мүрәжаты тийисли тараў басшылары тәрепинен үйренип шығылып, унамлы шешилди.

Усы күни қабыллаўға жәми 200 ден аслам пуқара мүрәжат еткен болса, соның 60 проценти усы жердиң өзинде унамлы шешим тапты. Қалғанлары тийисли тараў басшылары тәрепинен көрип шығылмақта. Улыўма алғанда, көшпели қабыллаўға келген пуқаралардың ҳеш бириниң мүрәжаты итибардан шетте қалмады.

Буннан тысқары, Мәмлекетлик хызметлер агентлиги Қарақалпақстан Республикасы басқармасы тәрепинен көшпели хызмет көрсетиў жолға қойылды. Усы күни өз басымшалық пенен қурылған имарат ийелерине мүлк ийеси ҳуқықын бериўши ҳүжжетлер тапсырылды.

Илаж даўамында төрт район фермерлери   тәрепинен жетистирилген азық-аўқат ҳәм аўыл хожалығы өнимлериниң, исбилерменлердиң ислеп шығарған үй-руўзыгершилик буйымларының, сондай-ақ, китап ярмаркалары шөлкемлестирилди. Бул жерге келген халық оларды арзан баҳада сатып алыў имканиятына ийе болды.

 

Басқа жаңалықлар RSS

14.09.2019 М.Т.Кайпановты Бозатаў районы ҳәкими лаўазымына тайынлаў ҳаққында Қарақалпақстан Республикасы Жоқарғы Кеңеси Баслығының БИЙЛИГИ

Қарақалпақстан Республикасы Конституциясы 81-статьясының 6-бәнтине муўапық Кайпанов Махмуд Тенгелович Бозатаў районы ҳәкими лаўазымына тайынлансын.

 

14.09.2019 БОЗАТАЎ РАЙОНЛЫҚ КЕҢЕСИНИҢ БИРИНШИ СЕССИЯСЫ БОЛЫП ӨТТИ

14-сентябрь күни халық депутатлары Бозатаў районлық кеңесиниң биринши сессиясы болып өтти.

05.09.2019 Қарақалпақстан Республикасы Бозатаў районын шөлкемлестириў туўралы

Усы жылдың 4-сентябрь күни Қарақалпақстан Республикасы Жоқарғы Кеңесиниң ХХVII сессиясы болып өтти. Сессияда Қарақалпақстан Республикасының Бозатаў районын шөлкемлестириў ҳаққында Жоқарғы Кеңестиң арнаўлы қарары қабыл етилди. Төменде қарар тексти менен толық танысыўыңыз мүмкин.