Қарақалпақстан Республикасы Жоқарғы Кеңеси

⌂ ЎЗ ҚР РУ EN

УРЫС ҚАТНАСЫЎШЫСЫНА САЎҒА ТАПСЫРЫЛДЫ

Қарақалпақстан Республикасы Жоқарғы Кеңесиниң Баслығы М.Ерниязов Еслеў ҳәм қәдирлеў күни алдынан Қараөзек районы А.Досназаров аўыл пуқаралар жыйыны аймағында жасаўшы  Генжемурат Алланиязовтың шаңарағында болып, байрам саўғаларын тапсырды.

Республикамыз басшысы ветеранды 9-май улыўмахалықлық байрам – Еслеў ҳәм қәдирлеў күни, сондай-ақ, 1941-1945-жыллардағы Екинши жер жүзилик урыста фашизм үстинен ерисилген жеңистиң  74 жыллығы менен қызғын қутлықлады.

Атап өтилгениндей, Президентимиздиң усы жыл 23-апрельдеги «Екинши жер жүзилик урыс қатнасыўшыларын хошаметлеў ҳаққында»ғы пәрманы тийкарында бүгин де қатарымызда турып Ўатанның абырай-мәртебесин көтериўге, жасларды руўхый-әдеп-икрамлылық жақтан тәрбиялаўға үлес қосып атырған ветеранларды қәдирлеў, урыс қатнасыўшыларын ҳәм майыпларды материаллық хошаметлеў бағдарында кең көлемли илажлар әмелге асырылмақта. Усы пәрманға муўапық ветеранға Өзбекстан Республикасы Президенти атынан 7 500 000 (жети миллион бес жүз мың) сум муғдарында ақшалай сыйлықты республикамыз басшысы салтанатлы жағдайда тапсырды. Сондай-ақ, бир бас саўын сыйыр, телевизор ҳәм кир жуўыў машинасы тапсырылды.

-Биз урыс ветеранларына көрсетип атырған бундай айрықша ғамқорлығы ушын Президентимизге шексиз миннетдаршылық билдиремиз,-дейди Генжемурат ата Алланиязов.- Аспанымыз ашық, турмысымыз буннан да абат, перзентлеримиз бахытлы болсын.

Илаж соңында республикамыз көркем өнер шеберлери тәрепинен урыс жылларының қосық ҳәм намалары атқарылды.

 

Басқа жаңалықлар RSS