Қарақалпақстан Республикасы Жоқарғы Кеңеси

⌂ ЎЗ ҚР РУ EN

«Медицина хызметкерлери күни» кәсиплик байрамы мүнәсибети менен Қарақалпақстан Республикасы Жоқарғы Кеӊеси ҳәм Министрлер Кеӊесиниӊ қутлықлаўы

Ҳүрметли шыпакерлер ҳәм медицина тараўы хызметкерлери!

Еӊ дәслеп, Сизлерди кәсиплик байрамыӊыз - «Медицина хызметкерлери күни» менен Қарақалпақстан Республикасы Жоқарғы Кеӊеси ҳәм Минис­трлер Кеӊеси атынан қызғын қутлықлап, халқымыздыӊ саламатлығын қорғаў ҳәм қәстелерге шыпа бағышлаўдай ийгиликли ислериӊизде тасқын табыслар тилеймиз.

Ғәрезсизлик жылларында елимизде медицина тараўын раўажландырыў, оныӊ потенциалын арттырыў, хызмет көрсетиўдиӊ сапасын жақсылаў бойынша ҳуқықый тийкарлардыӊ жаратылыўы өзлериниӊ өмирин халық саламатлығын қорғаўдай оғада жуўапкерли ўазыйпаға бағышлаған медицина хызметкерлерине деген айрықша итибардыӊ айқын көриниси саналады.

Себеби, халқымыз Сизлерди өзлериниӊ сүйениши ретинде тән алып, жүреклерге үмит, муӊлы көзлерге мәдет, сынық кеўиллерге қуўат бағышлаўшы илаҳий кәсип ийелери сыпатында айрықша қәдирлейди.

Соӊғы жыллары тараўда жүргизилип атырған реформалар нәтийжесинде халықтыӊ денсаўлығын, аналықты ҳәм балалықты қорғаў, физикалық жақтан саламат ҳәм руўхый жақтан жетилискен әўладты тәрбия­лаў, медициналық хызмет көрсетиўди жаӊа басқышларға көтериў, фармацевтика өнимлерин ислеп шығарыўды кеӊейтиў, емлеў мәкемелерин заманагөй медициналық әсбап-үскенелер менен тәми­йинлеў бағдарларында кеӊ көлемли жумыслар алып барылмақта.

Булардыӊ нәтийжесин қала ҳәм аўылларымызда ҳәрекет етип турған 40 стационар, 13 диспансер, 243 амбулатория-поликлиника мәкемелери, соныӊ ишинде «Саламатлық» жойбарлары тийкарында өткен жыллар ишинде 10 миллиард сумнан аслам қаржы есабынан медициналық әсбап-үскенелер менен тәмийинленген 190 аўыллық-шыпакерлик пунктлери, олар тәрепинен көрсетилип атырған сапалы медициналық хызметлер мысалында көремиз.

Ҳүрметли Президентимиз тәрепинен ден-саўлықты сақлаў тараўына қаратылып атырған айрықша итибар нәтийжесинде 2009-2013-жыллар аралығында 26 емлеў-профилактикалық мәкемелеринде 75 миллиард сумнан аслам қаржы есабынан жаӊа қурылыс ҳәм реконструкция жумыслары алып барылды.

Заман талапларына толық жуўап беретуғын, раўажланған еллердиӊ алдынғы технологиялары менен үскенеленген емлеў-профилактика мәкемелеринде бүгинги күнде 3600ден аслам шыпакерлер ҳәм 17 мыӊға жақын орта буўын медицина хызметкерлери күни-түни хал­қымызға сапалы медициналық жәр­дем көрсетип атырғанын айрықша қанаатланыўшылық пенен атап өтиўимиз тийис.

Өткен жыллар даўамында бир қатар медицина хызметкерлери акушер-гинеколог, анестезиолог, хирург, неонатолог ҳәм бас­қа да қәнигеликлер бо­йынша АҚШ, Япония, Түркия, Эстония, Уллыбритания, Корея, Польша, Россия ҳәм Украина сыяқлы мәмлекетлерде өзлериниӊ билимлерин жетилистирип қайт­қаны елимизде халық саламатлығын қорғаўға қаратылған жоқары итибардыӊ әмелий көриниси саналады.

Соны да айрықша атап өтиўимиз тийис, ҳүрметли Президентимиздиӊ тиккелей басламасы тийкарында дүньяда бириншилерден болып елимизде ҳаял-қызлардыӊ саламатлығын беккемлеў мәселесине мәмлекетлик сиясат дәрежесинде итибар қаратылды. Бул өз гезегинде аналар ҳәм балалар арасында наўқаслықтыӊ, халқымыз перзентлериниӊ нуқсанлар менен дүньяға келиўиниӊ алдын алыўда әҳмийетли орын тутпақта.

Халқымызға тән болған адамгершиликтиӊ еӊ жоқары пазыйлетлерине тийкарланған аналықты ҳәм балалықты қорғаў бойынша миллий моделимиз Дүнья жүзилик денсаўлықты сақлаў шөлкеми тәрепинен айрықша баҳаланып, раўажланған мәмлекетлерге үлги сыпатында усынылыўы елимизде инсан қәдириниӊ қаншелли үстин туратуғынын және бир мәрте дәлиллейди.

Денсаўлықты сақлаў тараўын түпкиликли реформалаў бойынша әмелге асырылып атырған мине усындай көлемли жумыслар ҳәм олардыӊ нәтийжелери, соӊғы жыллары қолға киргизилген жетискенликлерди елимиз турмысындағы көплеген мысалларда көриўимизге болады.

Еӊ әҳмийетлиси, бундай унамлы өзгерислер халықтыӊ турмыс дәрежесиниӊ жақсыланыўына, қала ҳәм аўылларымыздыӊ абат болыўына, бүгингиниӊ кешегиден, ертеӊги күнимиздиӊ бүгингиден жақсырақ болыўына беккем тийкар жаратады.

Ҳүрметли шыпакерлер ҳәм медицина тараўы хызметкерлери!

Елимиз турмысындағы еӊ жоқары байлығымыз саналған халқымыздыӊ денсаўлығын сақлаўдай оғада жуўапкерли ҳәм ийгиликли исте Сизлердиӊ кәсиплик шеберлигиӊизге, билим ҳәм тәжирийбеӊизге, адамгершилик пазыйлетлериӊизге, пидайылығыӊыз бенен жанкүйерлигиӊизге беккем исенемиз.

Ҳәр бириӊиздиӊ халық саламатлығын қорғаў, қәстелерге шыпа бағышлаў ушын тынымсыз излениўлер алып барып, пүткил саналы өмириӊизди денсаўлықты сақлаў тараўына бағышлап, кеселлениўшиликтиӊ алдын алыў, шаӊарақларда медициналық мәдениятты көтериў, саламат әўладты дүньяға келтириў ҳәм оларды тәрбиялаў сыяқлы мәмлекетлик ўазыйпаларды ат­қарыўдағы пидәкерли мийнетлериӊизди жоқары баҳалаймыз.

Сизлерди және бир мәрте кәсиплик байрамыӊыз бенен қутлықлай отырып, бәршеӊизге беккем денсаўлық, шаӊарақларыӊызға аманлық, инсан саламатлығын қорғаўдай оғада жуўапкерли ҳәм әдиўли ислериӊизде тасқын табыслар тилеймиз!

 

Қарақалпақстан Республикасы
Жоқарғы Кеӊеси


Қарақалпақстан Республикасы
Министрлер Кеӊеси

 

Басқа жаңалықлар RSS

10.05.2019 «МЕҲНАТ ФАХРИЙСИ» КӨКИРЕК БЕЛГИСИ ТАПСЫРЫЛДЫ

Усы жыл 10-май күни Нөкисте Өзбекстан Республикасы Президентиниң 2016-жыл 28-декабрьдеги «Өзбекстан ветеранларын социаллық қоллап-қуўатлаў «Нураний» қорының жумысын буннан былай да жетилистириў илажлары ҳаққында»ғы Пәрманы тийкарында шөлкемлестирилген I, II, III дәрежели «Меҳнат фахрийси» көкирек белгилерин тапсырыў салтанаты болып өтти.

09.05.2019 АТА-БАБАЛАРДЫ ЕСЛЕЎ-МУҚАДДЕС ҚӘДИРИЯТ

Пайтахтымыздағы «Ҳəсиретли ана» естелиги алдында 9-май — «Еслеў ҳəм қəдирлеў күни»не, сондай-ақ, Екинши жер жүзилик урыста қурбан болғанлардың ҳүрметине арналған мəресим болып өтти.