Қарақалпақстан Республикасы Жоқарғы Кеңеси

⌂ ЎЗ ҚР РУ EN

ТОЙ-МЕРЕКЕЛЕРДИ ЫҚШАМ ӨТКЕРИЎ МӘСЕЛЕСИ ДОДАЛАНДЫ

Нөкис қаласында пуқаралардың өзин-өзи басқарыў уйымларының бир топар белсендилерине «Маҳалла ифтихори» көкирек белгисин тапсырыў, сондай-ақ, Өзбекстан Республикасы Олий Мажлиси Нызамшылық палатасы ҳәм Сенаты Кенгашларының усы жыл 14-сентябрьдеги «Тойлар, шаңарақлық салтанатлар, мереке ҳәм мәресимлердиң өткерилиўин тәртипке салыў системасын буннан былай да жетилистириў ҳаққында»ғы қарарының мазмун-мәнисин кең жәмийетшиликке жеткериўге бағышланған мәжилис болып өтти.

Қарақалпақстан Республикасы Жоқарғы Кеңеси Баслығының орынбасары А.Ҳамраев басқарып барған илажға мәпдар министрликлер, кәрхана ҳәм мәкемелердиң, жәмийетлик шөлкемлердиң басшылары, қала ҳәм район ҳәкимлериниң орынбасарлары, пуқаралардың өзин-өзи басқырыў уйымларының баслықлары менен белсендилери, ғалаба хабар қуралларының ўәкиллери қатнасты.

Атап өтилгениндей, Өзбекстан Республикасы Президентиниң 2017-жыл 3-февральдағы «Мәҳәлле институтын буннан былай да жетилистириў илажлары ҳаққындағы» Пәрманы пуқаралардың өзин-өзи басқарыў уйымларына жүкленген ўазыйпаларды нәтийжели орынлаў, олардың жумысын муўапықластырыў, мәмлекетлик уйымлар ҳәм пуқаралық жәмийети институтлары менен өз-ара бирге ислесиўин буннан былай да беккемлеўде айрықша әҳмийетке ийе болды. Президентимиздиң 2017-жыл 13-июльдеги қарарына тийкарында пуқаралардың өзин-өзи басқарыў уйымларына жүкленген ўазыйпалардың әмелге асырылыўына мүнәсип үлес қосқан инталы пуқараларды ҳәм жәмийетлик структуралардың ўәкиллерин хошаметлеў мақсетинде «Маҳалла ифтихори» көкирек белгиси енгизилген еди. Быйылғы жылы республикамыздан 15 белсенди пуқара усы көкирек белгисине мүнәсип деп табылды. Илажда сыйлықлар өз ийелерине салтанатлы жағдайды тапсырылды.

Күн тәртибиндеги екинши мәселе бойынша Тойлар, шаңарақлық салтанатлар, мереке ҳәм мәресимлердиң өткерилиўин муўапықластырыў бойынша республикалық комиссияның ағзасы, Өзбекстан Республикасы Денсаўлықты сақлаў министриниң  биринши орынбасары Б.Юсупалиев, «Нураний» қоры Қарақалпастан Республикасы бөлиминиң баслығы Ш.Уснатдинов, Пуқаралардың өзин-өзи басқарыў уйымлары жумысын муўапықластырыў бойынша Қарақалпақстан Республикасы Шымбай районлық Кеңеси баслығының биринши орынбасары Б.Абдуллаев, Ташкент педиатрия медицина институты Нөкис филиалының директоры,  Олий Мажлис Сенатының ағзасы О.Атаниязова шығып сөйлеп, Олий Мажлис Нызамшылық палатасы ҳәм Сенат Кенгашларының усы жыл  14-сентябрьдеги «Тойлар, шаңарақлық салтанатлар, мереке ҳәм мәресимлердиң өткерилиўин тәртипке салыў системасын  буннан былай да жетилистириў ҳаққында»ғы қарарының мазмун-мәнисине ҳәм оның әҳмийетине тоқтап өтти.

Той-елдиң ғәзийнеси. Халқымызда тапқан-тутқаның тойға буйырсын, деген даналық гәп бар. Деген менен соңғы жыллары тойлар, шаңарақлық салтанатлар, мереке ҳәм мәресимлерди өткериўде дәбдебепазлық ким озарлық иллетлери, орын алмақта. Атап өтилген қарардың тийкарғы мазмуны, той-мерекелеримизди миллий салт-дәстүрлеримизге сай ымшамлы, ысырапгершиликсиз өткериў болып табылады.

Қарардың орынланыўын тәмийинлеў мақсетинде үш бағдар бойынша 20 бәнттен ибарат «Жол картасы» ислеп шығылып, мәпдар министрликлер менен уйымларға аның ўазыйпалар белгилеп берилип, орынлданыўы қадағалаўға алынды. Қарардың мазмун-мәнисине ҳәм оның әҳмийетин кең жәмийетшиликке жеткериў бойынша жумысшы топар дүзилип, қала ҳәм районларға жуўапкерлер бекитилди. Соның менен бирге, қарардың орынланыўын тәмийинлеў бойынша  алып барылған жумыслар,  бул бағдарда  кең жәмийетшиликтиң пикирин ғалаба хабар қураллары арқалы халыққа жеткериў мақсетинде Медиа-реже ислеп шығылды.

Илажда тойлар, шаңарақлық салтанатлар, мереке ҳәм мәресимлерди ықшамлы, ысырапгершиликсиз өткериў бойынша тийисли қарар қабыл етилди.

 

Басқа жаңалықлар RSS