Қарақалпақстан Республикасы Жоқарғы Кеңеси

⌂ ЎЗ ҚР РУ EN

ЖЫЛЫТЫЎ МӘЎСИМИНЕ ҲӘМ САЙЛАЎЛАРҒА ТАЯРЛЫҚ ЖУМЫСЛАРЫ ДОДАЛАНДЫ

Қарақалпақстан Республикасы Жоқарғы Кеңесинде гүз-қыз мәўсимине, сондай-ақ усы жыл 22-декабрь күни Өзбекстан Республикасы Олий Мажлиси Нызамшылық палатасына, Қарақалпақстан Республикасы Жоқарғы Кеңесине, халық депутатлары қалалық ҳәм районлық Кеңеслерине болажақ сайлаўларға таярлық жумысларының барысына бағышланған мәжилис болып өтти.

Илажды Қарақалпақстан Республикасы Жоқарғы Кеңесиниң Баслығы М.Ерниязов басқырып барды ҳәм бул бағдарда ушырасып атырған машқалалар, оны сапластырыў илажларына тоқтап өтти.

 Атап өтилгениндей, республикамызда гүз-қыс мәўсимине бир қатар таярлық жумыслары алып барылды. Деген менен, айрым орынларды тәбийғый газ басымының төменлиги, электр тәмийнатындағы үзилислер, әсиресе, ең шетки аўыллық орынлардағы емлеў мәкемелеринде, улыўма билим бериў мектеплериндеги жыллылық системасының жетерли дәрежеде жолға қойылмағанлығы бүгинги күни пуқаралардан келип түсип атырған мүрәжатлардың тийкарғы бөлегин қурайды. Сонлықтанда жол қойылып атырған кемшиликлерди тез арада сапластырыў, солай етип, сайлаў мапазын шөлкемлескенлик пенен өткериў ҳәр бир басшының бүгинги күнги тийкарғы ўазыйпасы болып табылады.

Республимызда Олий Мажлис Нызамшылық палатасына 8, Қарақалпақстан Республикасы Жоқарғы Кеңесине 65, халық депутатлары қалалық ҳәм районлық Кеңеслерине 425 сайлаў округинде, соның менен бирге, 622 сайлаў участкасында сайлаўлар алып барылады. Соннан 538 улыўма билим бериў мектебинде, 49 кәсип-өнер колледжи менен академиялық лицейде, 3 пуқаралар жыйынының имаратында, 4 денсаўлықты сақлаў мәкемесинде, 7 жоқары оқыў орнында, 25 басқа кәрхана ҳәм шөлкемлер жайласқан. Бул орынларда сайлаўды шөлкемлескенлик пенен өткериў бойынша таярлық жумыслары алып барылды.

Деген менен айырым сайлаў участкаларында кемшиликлер ушырасады. Бул биринши гезекте жоллардың талапқа жуўап бермейтуғынлығы, тәбийғый газ басымының төменлиги, электр тәмийнатындағы үзилислер, абаданластырыў жумысларының толық жуўмақланбағанлығы үйрениўлер барысында мәлим болды. Бул жағдайдар Төрткүл, Беруний, Елликқала, Әмиўдәрья, Тахтакөпир, Хожели, Тақыятас, Кегейли ҳәм Нөкис районларында көбирек ушырасады.

Мәжилисте сайлаў өткерилетуғын орынларды абаданластырыў, жылытыў системасы, электр энергиясы менен үзликсиз тәмийинлеў, жолларды оңлаў сыяқлы анықланған кемшиликлерди тез күнлер ишинде сапластырыў, солай етип, болажақ сайлаўларды көтериңкилик рухта өткериў бойынша ўазыйпалар белгиленди.

 

Басқа жаңалықлар RSS