Қарақалпақстан Республикасы Жоқарғы Кеңеси

⌂ ЎЗ ҚР РУ EN

Жерлеслеримиздиӊ жүзи жарқын

Президентимиз Ислам Кәримовтың басламасы менен шөлкемлестирилген ҳәм жасларымыздың сүйикли әнжуманына айланған үш басқышлы спорт жарыслары 2000-жылы Универсиада менен Наманганда басланған еди.

Академиялық лицей ҳәм кәсип-өнер колледжлери оқыўшылары  арасында өткерилип киятырған «Бәркамал әўлад» спорт жарыслары да быйыл Наманган қаласында үлкен шөлкемлескенлик жағда­йында өткерилди. Бул жарысларға Қарақалпақстан Республикасынан 68 жас спортшы табыслы қатнасты.

Екшемби күни Нөкис халықаралық аэропортында оларды салтанатлы күтип алыў мәресими болды.

Қарақалапақстан Республикасы Министрлер Кеңесиниң баслығы Б.Янгибаев спортшыларымызды қолға киргизген табыслары менен қызғын қутлықлап, келешегимиз болған жас әўладтың оқып билим алыўы, спорт пенен шуғылланыўы ҳәм саламатлығын беккемлеўи бағдарында кең көлемли ислердиң әмелге асырылғанын ҳәм келешекте бундай жумыслардың даўам ететуғынын айрықша атап өтти. Жаратылып атыр­ған мүмкиншиликлердиң арқасында спортшы жасларымыз көплеген халықаралық жарысларда, Жәҳән ҳәм Азия бириншиликлеринде ҳәм Олимпияда ойынларында жақсы нәтийжелерге ериспекте.

Республика ҳүкиметиниң басшысы алдағы ўақытлары жас спортшыларымыз «Универсиада», «Бәркамал әўлад», «Үмит нәлшелери» спорт жарысларында жаңа шеклерди ийелейтуғынына исеним билдирди.

Кескин ҳәм қызықлы өткен жарысларда Нөкис олимпиада резервлери колледжиниң оқыўшысы Эргаш Айтбаев дзюдо бойынша 90 килограмм салмақта барлық қарсыласларынан үстин келип, алтын медальды жеңип алды. Жеңил атлетика бойынша жерлесимиз Зухра Шагилова 800 метр­ге жуўырыўда екинши, 400 метрге жуўырыўда үшинши, ал эстафета жарысында қызларымыз Зухра Шагилова, Мария Лемзякова, Гүлжәҳән Генжемуратова ҳәм Альфия Қонысбаева үшинши орынды ийеледи. Теннис бойынша Санетулла Қутыбаев үшинши, баскетбол бойынша қызлар командамыз үшинши, бокс­шилеримиз Равшанбек Аминов, Наўрыз Ниязбеков ҳәм Қажымухан Ешимбетов үшинши орынды ийелеп, қола медалын жеңип алды. Сондай-ақ, жүзиўши қызымыз Айдын Султанова бир гүмис, бир қола медалын алыўға миясар болды. Таэквандо бо­йынша Алишер Нуржанов 55 килограмм салмақта үшинши орынды ийеледи. Солай етип, жерлеслеримиз бир алтын, еки гүмис ҳәм 19 қола медалын қолға киргизди.

— Бул жарысларда биринши орынды алыў маған аңсат болмады,-дейди Э.Айт­баев. — Барлық қарсыласларым күшли таярлық пенен келгени сезилди. Бирақ, тренерим менен узақ даўам еткен тынымсыз шынығыўларымыз зая кетпеди. Нәтийжеде маған алтын медаль несип етти. Буның ушын тренер-устазларыма, қоллап-қуўатлап турған ықласбентлерге өзимниң шексиз миннетдаршылығымды билдиремен ҳәм ендиги жарысларда да  табыслы қатнасыўға ўәде беремен.     

Мәресимге Қарақалпақстан Республикасы Жоқар­ғы Кеңесиниң комитет баслығы Б.Нурабуллаев қатнас­ты.

 

Басқа жаңалықлар RSS