Қарақалпақстан Республикасы Жоқарғы Кеңеси

⌂ ЎЗ ҚР РУ EN

Миллий өнерментшиликти раўажландырыў жолында

Жақында пайтахтымыздың «Орайлық дийқан базары»ның ашық майданында Өзбекистан Республикасы Президентиниң 1997-жыл 31-марттағы «Халық әмелий көркем-өнерин раўажландырыўды мәмлекет көлеминде қоллап-қуўатлаў ис-илажлары ҳаққында»ғы Пәрманының орынланыўын тәмийинлеў мақсетинде ҳәм Германия халықаралық бирге ислесиў шөлкеминиң (GIZ) «Республикамыздың айырым аймақларында экономиканы турақлы раўажландырыўға көмеклесиў Бағдарламасы»на тийкарланып Қарақалпақстан Республикасы Министрлер Кеңеси, Өзбекистан Саўда-санаат палатасы, «Өнермент» ассоциациясы Қарақалпақстан Республикалық басқармалары, Исбилермен ҳаяллар ассоциациясының Қарақалпақстан Республикалық филиалы ҳәм Республика көркем-өнер акаде­мия­лары шөлкемлестириўинде республикамыз өнерментлериниң биринши саўда-ярмаркасы өткерилди.

Илажды Өзбекистан Саўда-санаат палатасы Қарақалпақстан Республикалық басқармасы баслығы Х.Қайыпназаров ашты. Соңынан, Германия халықаралық бирге ислесиў шөлкеминиң (GIZ) республикамыздағы координаторы М.Камалова, Өзбекистан Республикасы «Өнермент» басқармасы баслығы Д.Алламбергеновалар шығып сөйледи.

Саўда-ярмарканы өткериўдеги тийкарғы мақсет ­ республикамызда жумыс алып барып атырған өнерментлерди қоллап-қуўатлаў, оларды ҳәм олар тәрепинен ислеп шығарылып атырған өнимлерди халықтың кең қатламына танытыў, сондай-ақ, елимизге сырт елли туристлерди ҳәм турақлы қарыйдарларды тартыў болып есапланады. Ярмаркаға республикамыздың барлық қала ҳәм районларынан 100 ге жақын өнерментлер өз өнимлери менен қатнасты.

Кеше шеңберинде шөл­кемлестириўшилер тәрепинен қатнасыўшыларды хошаметлеў мақсетинде бир қатар номинациялар белгиленди ҳәм «Ең жақсы өнермент» номинациясының 1-орын жеңимпазы болған Гулнара Ембергенова Германия халықаралық бирге ислесиў шөлкеми (GIZ) тәрепинен Ҳиндистан Республикасында өнерментшилик тараўында тәжирийбе алмасыў ушын жолламаны қолға киргизди.

­ Ҳақыйқатында да, республикамызда биринши мәртебе шөлкемлестирилип атырған өнерментлеримиздиң саўда-ярмаркасы миллий өнерментшилигимизди раўажландырыўда, әсиресе, келешегимиз болған жас әўладтың қәлбинде миллий өнерментшилигимизге болған меҳир-муҳаббатын оятады,-дейди ярмарка қатнасыўшысы, Нөкисли темирши уста Қылышбай Акимов.

Илажға Өзбекистан Республикасы Олий Мажлиси депутаты У.Жалменов, республикамыздың жоқары ҳәм орта арнаўлы оқыў орынлары студент-жаслары, республикамыз пуқаралары ҳәм жәмийетшилик ўәкиллери қатнасты.

 

Басқа жаңалықлар RSS