Қарақалпақстан Республикасы Жоқарғы Кеңеси

⌂ ЎЗ ҚР РУ EN

Сайлаўшылар менен ушырасыў

Усы күнлери Өзбекистан Республикасы Олий Мажлиси Сенаты ағзаларының ҳәм Нызамшылық палатасы депутатларының орынларда өз сайлаўшылары менен ушырасыўлары шөлкемлестирилип, оларда парламент тәрепинен жаңадан қабыл етилген нызамлар ҳәм айырым нызамларға киргизилген өзгерислер ҳәм қосымшалар ҳаққында түсиник берилмекте.

Қанлыкөл районында Олий Мажлис Нызамшылық палатасының депутаты, ӨзЛиДеП фракциясының ағзасы П.Реймовтың өз сайлаўшылары менен ушырасыўы болып өтти.

Илажда П.Реймов жыйналғанларға Олий Мажлис Нызамшылық палатасы тәрепинен соңғы ўақытлары қабыл етилген нызамлар ҳаққында кең түрде түсиник берди. Атап айтқанда, «Қымбат баҳалы қағазлар базары ҳаққында»ғы, «Мәмлекетлик ҳәкимият ҳәм басқарыў уйымлары жумысының ашық-айдынлығы ҳаққында»ғы, «Ҳуқықбузарлықтың профилактикасы ҳаққында»ғы, «Акционерлик жәмийетлер ҳәм акционерлердиң ҳуқықларын қорғаў ҳаққында»ғы Өзбекис­тан Республикасы Нызамлары, сондай-ақ, Өзбекистан Республикасы Конституциясының айырым (32,78,93,98,103 ҳәм 117) статьяларына киргизилген өзгерислер ҳәм қосымшалар ҳәкимияттың нызам шығарыўшы ҳәм атқарыўшы уйым­ларының жумысын буннан былай да демократияластырыў, сиясий пар­тия­лардың белсендилигин арттырыў, олар арасында бәсекини күшейтиўдиң ҳуқықый тийкары болып хызмет ететуғынына айрықша итибар қаратты.

Сондай-ақ, илажда усы жылдың декабрь айында өткерилетуғын Олий Мажлис Нызамшылық палатасына, халық депутатлары жергиликли кеңеслерине сайлаўға байланыслы шөлкемлестириў жумысларын ҳәзирден баслаў керек екенлиги атап өтилди. Мәмлекетлик ҳәкимият ҳәм басқарыў уйымлары жумысы үстинен жәмийетлик қадағалаўдың бирден бир системасын енгизиў бойынша бул ушын тийисли ҳуқықый нормаларды беккемлеў ҳаққында сөз болды.

Илаж қатнасыўшылары өзлерин қызықтырған сораўларына жуўап алды.

 

Басқа жаңалықлар RSS