Қарақалпақстан Республикасы Жоқарғы Кеңеси

⌂ ЎЗ ҚР РУ EN

Мәселелер додаланып, ўазыйпалар белгиленди

Усы жыл 25-июль күни Қарақалпақстан Республикасы Жоқарғы Кеңесинде 2014-жылдың дәслепки алты айында республикамызды социаллық-экономикалық жаўтан раўажландырыўдың жуўмақлары ҳәм жыл ақырына шекем белгиленген тийкарғы ўазыйпалардың орынланыўын тәмийинлеўге бағышланған мәжилис болып өтти. 

Онда зыян көрип ислеп атырған, экономикалық жағдайы төмен ҳәм рентабеллиги пәс болған кәрханаларды финанслық жақтан қоллап-қуўатлаў бойынша «Жол карталары»ның әмелге асырылыўы, сондай-ақ, нызамсыз миграцияның алдын алыў ҳәм пуқараларды жумысқа орналастырыў ҳаққындағы мәселелер кең түрде додаланды.

Мәжилисти Қарақалпақстан Республикасы Жоқарғы Кеңесиниң Баслығы М.Ерниязов кирис сөз бенен ашты ҳәм басқарып барды.

Мәжилиске Қарақалпақстан Республикасы Жоқарғы Кеңесиниң депутатлары, ҳүкимет ағзалары, ҳуқық қорғаў уйымлары басшылары, қала ҳәм район ҳәкимлери, министрликлер менен ведомстволардың басшылары, исбилерменлер ҳәм ғалаба хабар қуралларының ўәкиллери қатнасты.

Онда атап өтилгениндей, Қарақалпақстанды социаллық-экономикалық жақтан раўажландырыў бойынша белгиленген ең тийкарғы ўазыйпаларды орынлаў бағдарында әмелге асырылып атырған илажлар нәтийжесинде  быйылғы жылдың дәслепки алты айы даўамында экономиканың турақлы өсиў пәтлерине ерисилди. Атап айтқанда, жалпы аймақлық өним ислеп шығарыў көлеми 10,3 процентке, санаат өнимлерин ислеп шығарыў көлеми 15,8 процентке, тутыныў товарларын ислеп шығарыў көлеми 14,1 процентке, қурылыс жумыслары көлеми 11,4 процентке, хызмет көрсетиў көлеми 22,9 процентке, аўыл хожалығы өнимлерин ислеп шығарыў көлеми 6,5 процентке, саўда ҳәм жәмийетлик аўқатланыў 14,6 процентке өсти.

«Жол карталары»н әмелге асырыў бағдарында өткен жылдың жуўмағы бойынша зыян көрип ислеп атырған «Түйемойын-Нөкис», «Коммунал ыссылық орайы», «Тақыятас ЫЭС», «Шимолгазтаъминот» ҳәм экономикалық жағдайы төмен болған Кегейли, Төрткүл жол кәрханаларының қарыздарлықлары толығы менен сапластырылып, өткен алты айды пайда менен жуўмақлаўға еристи. Деген менен, додалаў барысында өндиристи модернизациялаў, техникалық ҳәм технологиялық жаңалаў, экономикаға шет ел инвестицияларын кеңнен тартыў бойынша қолда бар имканиятлардан толық пайдаланылмай атырғанлығы атап өтилди.

Мәжилисте исбилерменликти раўажландырыў есабынан жаңа жумыс орынларын жаратыў ҳәм усының есабынан миграцияның алдын алыў мәселелерине айрықша итибар қаратылды. Сондай-ақ, исбилерменлик субъектлери тәрепинен ислеп шығарылған өнимлерди экспорт етиў, исбилерменлерге кредит қаржыларын ажыратыў жумысларын жетилистириў, колледж питкериўшилериниң бәнтлигин тәмийинлеўде жергиликли ҳәкимият уйымларының жуўапкершилиги мәселелери кеңнен додаланды.

Күн тәртибиндеги мәселелер бойынша бир қатар тараў басшыларының, қала ҳәм район ҳәкимлериниң есабатлары тыңланды ҳәм оларға анық ўазыйпалар белгилеп берилди.

Онда Өзбекстан Республикасы Бас министриниң орынбасары А.Икрамов қаралып атырған мәселелер бойынша кең түрде шығып сөйледи.

Мәжилиске Қарақалпақстан Республикасы Министрлер Кеңесиниң Баслығы Б.Янгибаев қатнасты.

Мәжилисте қаралған мәселелер бойынша тийисли шешимлер қабыл етилди.

 

Басқа жаңалықлар RSS