Қарақалпақстан Республикасы Жоқарғы Кеңеси

⌂ ЎЗ ҚР РУ EN

Сайлаўларға таярлық көриў ҳәм оны өткериў бойынша қарар қабыл етилди

Усы жыл 3-июнь күни Қарақалпақстан Республикасы Орайлық сайлаў комиссиясы тәрепинен Қарақалпақстан Республикасы Жоқарғы Кеңесине, халық депутатлары районлық ҳәм қалалық Кеңеслерге сайлаўларға таярлық көриў ҳәм өткериў бойынша ис-илажлар бағдарламасы ҳаққындағы қарар қабыл етилди.

«Қарақалпақстан Республикасы Жоқарғы Кеңесине сайлаў ҳаққында»ғы Қарақалпақстан Республикасы Нызамының 11-статьясына, «Қарақалпақстан Республикасы Орайлық сайлаў комиссиясы ҳаққында»ғы Қарақалпақстан Республикасы Нызамының 5, 9, 10-статьяларына муўапық қабыл етилген бул қарардан гөзленген тийкарғы мақсет – декабрь айында болып өтетуғын сайлаўларды нызамшылық талаплары, халықаралық сайлаў стандартларына муўапық демократиялық талаплар тийкарында таярлықлар көриўден ҳәм өткериўден ибарат. Сондай-ақ, бул қарар пуқаралардың мәмлекет ҳәкимияты ўәкилликли уйымларына еркин сайлаў ҳәм сайланыў менен байланыслы конституциялық ҳуқықларын жүзеге шығарыўда, сиясий партиялардың мәмлекетлик ҳәкимият уйымларын қәлиплестириў процессинде белсене қатнасыўы ушын шараятлар жаратып бериўде әҳмийетли орын тутады.

Мине, усы қарар тийкарында Қарақалпақстан Республикасы Жоқарғы Кеңесине, халық депутатлары районлық ҳәм қалалық Кеңеслерге сайлаўларға таярлық көриў ҳәм өткериў бойынша ис-илажлар бағдарламасы тастыйықланды. Сондай-ақ, қарарда сайлаўларға таярлық көриў ҳәм өткериў менен байланыслы мәселелер дөгерегинде ислениўи тийис илажлар белгилеп алынды.

 

Басқа жаңалықлар RSS