Қарақалпақстан Республикасы Жоқарғы Кеңеси

⌂ ЎЗ ҚР РУ EN

Президент Ислам Каримовтың Өзбекстан Республикасы ғәрезсизлигиниң жигирма бир жыллығына бағышланған салтанатлы мәресимдеги қутлықлаў сөзи

Әзиз Ўатанласлар!

Ҳүрметли мийманлар!

Бүгин биз елимиз турмысындағы умытылмас тарийхый ўақыя — Өзбекстанымыз ғәрезсизликке ерискен күнниң жигирма бир жыллығын белгилемектемиз.

Әне усы уллы сәне менен, халқымыз әсирлер даўамында умтылып, ынтығып күткен, ҳақыйқатында да, бәршемиз ушын ең уллы, ең әзиз байрам болған Өзбекстанның, Ғәрезсизлик күни менен сиз әзизлерди, сизлер арқалы пүткил халқымызды шын жүректен қутлықлаў мен ушын үлкен бахыт.

Мен исенемен-әсирлер, заманлар өтеди. Бирақ бәршемизге өзлигимизди анлаў, инсаныйлық ар-намысымызды, қәдир-қымбатымызды, өз елимизге ийелик етиў ҳуқықын, тилимиз, муқаддес динимизди, қәдириятларымызды, үрп-әдетлеримизди қайтарып берген бул уллы әййям Ўатанымыз тарийхында алтын бет болып, мәнги сақланып қалмақшы.

Қәдирли Ўатанласларым!

Өз-өзинен белгили, адамзат тарийхында, дүнья картасында мәмлекетлердиң қәлиплесиўинде жигирма бир жыл оғада қысқа мүддет. Лекин Өзбекстанымыз усы дәўир ишинде, ҳеш гүмансыз, жүз жылларға тең. болған аралықты басып өтти.

Биз ески езиўшилик дүзим, оның, усыллары ҳәм идеологиясынан пүткиллей ўаз кешип, бойсыныўшылық ҳәм ғәрезлилик дәўирине шыдам берип, кешеги аянышлы, өзин өзи бағыўға күши жетпеген үлкеден бүгин өзинин күш-қүдирети менен потенциалына сүйенген, өз шегараларын, халқының, тыныш ҳәм татыў турмысын қорғаўға уқыплы, халықаралық шерикликте мүнәсип орын ийелеген, тез және турақлы пәтлер менен раўажланып атырған ғәрезсиз ҳәм суверен мәмлекетлер қатарына көтерилгенимизди айқын көрмектемиз.

Өткен дәўир ишинде биз алдымызға қойған уллы ўазыйпа — заманагөй раўажланған демократиялық мәмлекетлердиң қатарына кириў, пуқаралық жәмийетин қурыў, турмысымызды, экономикамызды модернизациялаў ҳәм диверсификациялаў есабынан қолға киргизген табысларымыз бенен үлкен шеклеримиздиң халықаралық майданда тән алынып атырғанын, Ўатанымыздьң потенциалы, материаллық, экономикалық ҳәм интеллектуаллық күш-қүдиретимиз барған сайын артып, қалалар менен аўылларымыздьң келбети ҳәм көриниси өзгерип, көркейип баратырғанын бүгин ҳеш ким инкар ете алмайды.

Көпшиликти таң қалдырып атырған бундай ҳақыйқатты тастыйықлап бериўши көплеген цифрлар ҳәм мағлыўматларды келтириў қыйын емес.

Усылардың, қатарында ғәрезсизлик жылларында Өзбекстан экономикасы дерлик 3,7 есе, халқымыздьң реал дәраматлары жан басына 7 есе, орташа пенсия муғдары дерлик 9 есе, айлық мийнет ҳақы болса 18 есе артқаны, адамларымыздьң өмир сүриў дәрежеси орташа 7 жылға узайғаны, жанылғы ҳәм ғәлле ғәрезсизлигине, өзимизди-өзимиз гөш, сүт ҳәм басқа тутыныў товарлары менен толық тәмийинлеўге ерискенимиз булардьң айқын дәлили болып табылады.

Булардың барлығы биринши гезекте ғәрезсизликке ерискен дәслепки күнлерден баслап «Реформа-реформа ушын емес, бәринен бурын инсан ушын» деген принципти турмысқа еңгизгенимиздиң, әмелий нәтийжеси, десек, ҳеш қандай қәте болмайды.

Өткен жыллар даўамында елимизде турақ жай көлеминиң көрсеткиши дерлик 2 есе артқаны, шанарақлардьщ 98,5 проценти өзинин жеке турақ жайы ямаса квартирасына, аўылларда жасап атырған шанарақлардын, 97,5 проценти жеке мөлдек жерине ийе болғанын әне усы мақсетте әмелге асырған миллий бағдарламаларымыздьң нәтийжеси деп қабыл етемиз.

Буннан жигирма бир жыл бурын ҳәр он шаңарақтан бары-жоғы биреўи жеке меншик машинаға ийе болған болса, бүгинги күнде ҳәр үш шаңарақтың биреўинде автомобиль бар екени, ҳәр үш жерлесимизден бири интернет тармағынан пайдаланып киятырғаны халқымыздың абаданлығы барған сайын артып баратырғанын, оның емин-еркин жасап атырғанын көрсетеди.

Усы жерде және бир мысал келтириў орынлы болады.

Бүгин барлық мәмлекетлерди үлкен тәшўишке салып атырған, елеге шекем даўам етип атырған, жәҳән көлеминде ең әҳмийетли, ең аўыр мәселе болып турған финанслық-экономикалық дағдарысты есапқа алған ҳалда, Өзбекстан соңғы жети жыл даўамында дүньядағы санаўлы мәмлекетлердиң қатарында орташа 8-8,5 процент экономикалық өсимге ерисип атырғаны елимиздиң потенциалы турақлы раўажланып баратырғанының айқын дәлили болып табылады.

Бәршемиз ўатанымызды раўажландырыў жолында ерискен шеклеримизди дәслепки қәдемлер сыпатында қабыл етип, бир ҳақыйқатты терең түсинип алыўымыз керек.

Бүгин тез пәт пенен өзгерип атырған глобалласыў дәўириниң кескин талапларына, дүнья базарында барған сайын күшейип баратырған аяўсыз бәсеки гүресине шыдам бере алатуғын, тек исеним менен алдыға умтылып атырған, өзинин узақты гөзлеген раўажланыў стратегиясына ийе болған мәмлекет ғана раўажланыўдың үлкен жолында өзиниң ийгиликли мақсетлерине ерисиўи мүмкин.

Заманның өзи ортаға қойып атырған әне усындай кескин талапларды инабатқа алған ҳалда, бизиң алдымызда турған ең тийкарғы ўазыйпамыз — баслаған ислеримизди избе-из даўам еттириў, елимизди жаңалаў ҳәм модернизациялаў, демократиялық реформаларды тереңлестириў, жәмийетимиздиң барлық салаларын еркинлестириў процеслерин жаңа басқышқа көтериў, турмысымыздың дәрежеси менен сапасын буннан былай да жетилистириў болып табылады.

Биз ушын бийбаҳа байлық болған тынышлық пенен татыўлықты, жәмийетимиздеги меҳир-мүриўбет, пуқаралар ҳәм миллетлер аралық татыўлық және аўызбиршиликти көздиң қарашығындай абайлап сақлаў ҳәмийше дыққат орайымызда турыўы кереклигин ҳеш қашан умытпаўымыз тийис.

Бүгинги тәшўишли ҳәм қурамалы заман, жақын ҳәм узақ әтирапымызда, регионымызда көптен берли даўам етип атырған келиспеўшиликлер менен қарама-қарсылықлар, барған сайын кескинлесип баратырған жағдай бизден бәрқулла қырағы, сергек ҳәм сезгир болып жасаўды, қәўипсизлигимизге қәўип салып атырған ҳәр қандай бәле-қаданың алдын алыўды талап етпекте.
Ғәрезсиз раўажланыў жолында әмелге асырған, санамызды, өмиримизди түп-тийкарынан өзгерткен ислеримизге баҳа берер екенбиз, биз ерискен табыслар менен шеклерди қолға киргизиў аңсат болмағанын атап өтиўимиз орынлы.

Бул жолда ел-журтымыз қандай қыйын ҳәм қәўипли сынақларды, тосқынлықларды жеңиўде ҳәр қыйлы жаўызлық және зорлық етиў ҳәрекетлери алдында бас иймегени, өз исениминен қайтпағаны, бәринен бурын өзиниң мийнет сүйгишлиги, мәртлиги ҳәм шыдамлылығы есабынан бүгинги жарық күнлерге жетип келгенимизди ҳеш қашан умытпаслығымызды қәлер едим.

Ҳәзирги күнлерде де бизиң таңлаған жолымызға гүман туўдырыў, кешеги дәўирди көрмеген, тәжирийбеси жетерли болмаған жасларды жолдан аздырыўға, ғәрезсизлигимиздиң мәнис-мазмунын бурмалаўға, бизди және ески қәлип ҳәм қуллыққа қайтарыўға урынатуғын күшлер менен ҳәрекетлер аз емес.

Лекин, бул күшлер бир ҳақыйқатты аңлап алыўы керек. Бүгин биз кешеги — 90-жыллардағы күтә сада, ҳеш қандай сиясий тәжирийбеге ийе болмаған адамлар емеспиз.

Биз бүгин ғәрезсизлик жылларында үлкен қыйыншылықлар менен сынақларда тапланған, дүнья қарасы, сиясий ҳәм пуқаралық дәрежеси, социаллық белсендилиги өсип баратырған, әпиўайыластырып айтқанда, биз бүгин ақ-қараны айыра алатуғын халықпыз.

Бизиң халқымыз, бәринен бурын жигирма бир жыл даўамында ержеткен, еркин пикирлеўге, өсип баратырған сана-сезимге ийе наўқыран әўладымыз, айдын келешегимизге үлкен исеним менен қарайды ҳәм өзиниң таңлап алған жолынан ҳеш қашан – тәкирарлап айтаман – ҳеш қашан артқа қайтпайды.

Бүгин дүнья шериклиги менен теңдей, узақ ҳәм жақын сырт еллер менен дослық, бирге ислесиў ҳәм өз-ара мәпдарлы байланысларды және де беккемлеў, шет ел инвестицияларын ҳәм ең заманагөй технологияларды алып келиў мақсетинде елимизде қолайлы ықлым және жеңилликли шараятларды буннан былай да кеңейтиў, бизге тилеклес болған мәмлекетлер менен шериклик қатнасықларын жаңа басқышқа көтериў — булардың ҳәммеси бәрқулла дыққат-орайымызда болыўы шәрт.

Пурсаттан пайдаланып, усы саўлатлы майданда жыйналған сырт еллердиң елшилери менен халықаралық шөлкемлердиң ўәкиллерине, барлық мийманларымызға бүгинги салтанатымызда байрам қуўанышын биз бенен бөлисип атырғанлары ушын сизлердиң атыңыздан, пүткил халқымыздың атынан миннетдаршылық билдириўге рухсат еткейсиз.

Бүгинги қуўанышлы демлерде бизиң сүйенишимиз, үмитимиз болған жасларға қарата айтпақшыман:

Қәдирдан перзентлерим, ҳеш қашан умытпаң:
Сиз кимниң қандай уллы адамлардың әўладысыз!
Сиз қандай теңи-тайы жоқ ҳәм бийтәкирар мийрас ийелерисиз!

Өз күш-ғайратыңыз, билим ҳәм қәбилетиңизге, уллы Ўатанымыздың қүдиретине сүйенип, бәлент шеклерди гөзлең, әзиз балаларым!

Сизин ерисетуғын ҳәр бир жеңисиңиз — елимиздиң жеңиси, Өзбекстанның жеңиси!

Әзизлерим, қәдирданларым!

Бәршеңизди баўырыма басып, Ғәрезсизлик байрамы менен және бир мәрте шын жүректен қутлықлап, сизлерге саў-саламатлық, бахыт ҳәм әўмет, шаңарақларыңызға қут-берекет тилеймен.
Бүгин мине усындай жарық күнлерге жеткерген, ийгиликли ислеримизде Өзи мәдаткар болған Жаратқанымызға шүкиршилик етемиз.

Журтымыз тыныш, халқымыз аман болсын!

Ғәрезсизлигимиз мәнги болсын! 

 

Басқа жаңалықлар RSS

08.07.2019 ИСБИЛЕРМЕНЛЕРДИҢ МАШҚАЛАЛАРЫ ҮЙРЕНИЛДИ

Усы жыл 8-июль күни Қарақалпақстан Республикасы Жоқарғы Кеңесинде исбилерменлер менен ушырасыў болып өтти.

06.07.2019 «ЖАСЛЫҚ»ТА КӨШПЕЛИ ҚАБЫЛЛАЎ

Усы жылдың 6-июль күни Қарақалпақстан Республикасы Жоқарғы Кеңесиниң Баслығы М.Ер­ния­зовтың пуқараларды көшпели қабыллаўы пайтахтымыз Нөкис қаласынан 300 км узақлықтағы, республикамыздың  ең шетки аймақларының бири есапланған Қоңырат районының «Жаслық» посёлка пуқаралар жыйынында болып өтти.

06.07.2019 ЖУМЫСЛАР ЖУЎАПКЕРШИЛИГИ ЖАНЛАНАЖАҚ

6-июль күни Өзбекстан Республикасы Бас министриниң орынбасары, Республика Ҳаял-қызлар комитети баслығы Элмира Боситхонова Өзбекстан Республикасы Президенти Ш.Мирзиёев тәрепинен Олий Мажлис Сенатының жигирмаланшы жалпы мәжилисинде белгилеп берилген ўазыйпалардың орынланыўын ҳәм Ҳаял-қызлар комитети хызметиниң әпиўайы ҳәм халықшыл болыўын тәми­йинлеў, усы тараў жумысларын системалы шөлкемлестириў, халық, әсиресе, ҳаял-қызлардың жасаў шараятын жақсылаўдағы тәсирин күшейтиў мақсетинде республикамызда болды.

05.07.2019 СПОРТ ҲӘПТЕЛИГИ ЖУЎМАҚЛАНДЫ

Республикамызда «Олимпиада күни»не бағышланған спорт ҳәптелиги кең түрде белгиленди. Илаж шеңберинде Нөкис қаласында ҳәм районларда спорт жарыслары, белгили спортшылар ҳәм ветеранлар менен ушырасыўлар өткерилди.