Қарақалпақстан Республикасы Жоқарғы Кеңеси

⌂ ЎЗ ҚР РУ EN

Қарақалпақстан Республикасы Жоқарғы Кеңесиниң он биринши сессиясы ҳаққында мәлимлеме

Усы жыл 28-декабрь күни Нөкисте Қарақалпақстан Республикасы Жоқарғы Кеңесиниң он биринши сессиясы болып өтти. Сессияға Өзбекстан Республикасы Олий Мажлиси Сенатының ағзалары, Қарақалпақстан Республикасының Ҳүкимет ағзалары ҳәм ғалаба хабар қуралларының ўәкиллери қатнасты.

Сессияны Қарақалпақстан Республикасы Жоқарғы Кеңесиниң Баслығы
Муса Тәжетдинович Ерниязов алып барды.

Депутатлар сессияның Секретариатын сайлады ҳәм күн тәртибин тастыйықлады.

Күн тәртибиндеги биринши мәселе, «Бала ҳуқықлары кепилликлери ҳаққында»ғы Қарақалпақстан Республикасы Нызамының жойбары ҳаққында 17-санлы «Ақбашлы» сайлаў округинен депутат, Жоқарғы Кеңестиң Социаллық раўажланыў ҳәм жәмийетлик бирлеспелер мәселелери комитетиниң баслығы Б.Нурабуллаев баянат жасады.

Баянат бойынша 86-санлы «Мойнақ аўыллық» сайлаў округинен депутат, Мойнақ районының ҳәкими Қ.Өтениязов, «Мәҳәлле» қайырқомлық жәмийетлик қоры Қарақалпақстан бөлиминиң баслығы Х.Елмуратов шығып сөйледи.
Депутатлар бул нызамды қабыл етти ҳәм өз күшине енгизди.

«Исбилерменлик жумыслары еркинлигиниң кепилликлери ҳаққында»ғы Қарақалпақстан Республикасы Нызамының (жаңа редакцияда) жойбары туўралы 40-санлы «Қылышбай» сайлаў округинен депутат, Жоқарғы Кеңестиң Экономика, санаат, қурылыс, транспорт ҳәм байланыс мәселелери комитетиниң баслығы Б.Мырзаев мәлимлеме берди.

Бул мәселе бойынша Қарақалпақстан Республикасы Әдиллик министри С.Худайбергенов ҳәм 28-санлы «Ақшакөл» сайлаў округинен депутат, Елликқала районының ҳәкими Н.Худайбергенов өз пикир-усынысларын билдирди. Депутатлар тәрепинен бул нызам қабыл етилип өз күшине енгизилди.

Буннан соң Қарақалпақстан Республикасының 2013-жылғы Бюджети туўралы мәселе көрип шығылып, бул бойынша Қарақалпақстан Республикасы Қаржы министри М.Содиқов шығып сөйледи.

Бул мәселе бойынша 40-санлы «Қылышбай» сайлаў округинен депутат, Жоқарғы Кеңестиң Экономика, санаат, қурылыс, транспорт ҳәм байланыс мәселелери комитетиниң баслығы Б.Мырзаев, Қарақалпақстан Республикасы Халық билимлендириў министри Р.Матқурбанов, Денсаўлықты сақлаў министри Д.Ходжиев өз пикир-усынысларын билдирди. Сессияда бул бойынша тийисли қарар қабыл етилди.

Сессияда Қарақалпақстан Республикасының социаллық-экономикалық раўажланыўы бағдарында республика ҳүкимети тәрепинен 2012-жылы әмелге асырылған жумыслар туўралы 77-санлы «Тазғара» сайлаў округинен депутат, Министрлер Кеңесиниң Баслығы Б.Янгибаев баянат жасады. Сессияда бул мәселе бойынша тийисли қарар қабыл етилди.

Нызамшылықты беккемлеў, әмелдеги нызамшылықтың орынланыўы үстинен бақлаў жумысларының нәтийжелилигин арттырыў бағдарында алып барылып атырған жумыслар ҳаққында Қарақалпақстан Республикасы Прокуроры С.Самадовтың мәлимлемеси тыңланды ҳәм депутатлар бул бойынша қарар қабыл етти.

Депутатлар Қарақалпақстан Республикасы Жоқарғы Кеңеси Президиумы тәрепинен Жоқарғы Кеңестиң сессиялары аралығында қабыл етилген қарарларын тастыйықлады.

Усының менен Қарақалпақстан Республикасы Жоқарғы Кеңесиниң он биринши сессиясы өз жумысын тамамлады.

 

Басқа жаңалықлар RSS