Қарақалпақстан Республикасы Жоқарғы Кеңеси

⌂ ЎЗ ҚР РУ EN

Парахат турмысымыздың исенимли қорғаны

Азат ҳәм абат Ўатанымыздағы бүгинги тыныш және парахат турмыс, аўызбиршилик ҳәм абаданшылық бийбаҳа байлығымыз болып табылады. Халқымыз әзелден тынышлық ҳәм парахатшылықты Ўатан, ана, азатлық сыяқлы муқаддес түсиниклер қатарында улығлап, қәдирлеп келеди. Ўатанымыздың азатлығы, тынышлығы менен қәўипсизлигин қорғаўшылар болса бәрқулла ҳүрмет-иззетте.

Быйыл елимизде Ўатан қорғаўшылары күни ҳәм Қураллы Күшлеримиздиң 21 жыллығы кеңнен белгиленбекте.

Байрам салтанатлары 14-январь күни пайтахтымыздағы "Ҳәсиретли ана" естелигине гүл шеңберлерин қойыў мәресими менен басланды.
Қарақалпақстан Республикасы Жоқарғы Кеңесиниң Баслығы М.Ерниязов, Министрлер Кеңесиниң Баслығы Б.Янгибаев ҳәм басқа да рәсмий адамлар естелик алдына гүл шеңберлерин қойды. Сондай-ақ, қала ҳәкимлиги, министрликлер менен ведомстволардың, оқыў орынлары ҳәм жәмийетлик шөлкемлердиң атынан да гүл шеңберлер қойылды.

Арқа-Батыс әскерий округиниң әскерлери майдан бойлап сап дүзеп өтти.

Усы күни пайтахтымыздағы Бердақ атындағы Қарақалпақ мәмлекетлик сазлы театрында байрамға бағышланған салтанатлы жыйналыс болып өтти. Илажға республика парламенти ҳәм ҳүкиметиниң ағзалары, жоқары ҳәм орта арнаўлы оқыў орынларының оқытыўшылары менен студент жаслары, министрликлер менен шөлкемлердиң басшылары, пайтахт жәмийетшилигиниң ўәкиллери, Арқа-Батыс әскерий округиниң офицерлери ҳәм әскерлер қатнасты.

Салтанатлы жыйналысты Нөкис қаласының ҳәкими Ж.Опаев кирис сөз бенен ашты.

Өзбекстан ҳәм Қарақалпақстан Республикаларының мәмлекетлик гимнлери атқарылды.

Қарақалпақстан Республикасы Жоқарғы Кеңесиниң Баслығы М.Ерниязов қутлықлаў сөз сөйледи. Республика басшысының атап өткениндей, Қураллы Күшлер қатарында хызмет етиўдиң абырайы артып, бул жас жигитлер ушын ең ҳүрметли кәсипке айланды.

Әскерий хызмет жасларымызды физикалық ҳәм руўхый жақтан шынықтырыў менен бирге, олардың қәлбинде ҳәм санасында Ўатанды сүйиўшилик, пидайылық, әскерий антқа садықлық пазыйлетлерин қәлиплестиреди.

Әскерий хызметкерлердиң жумыс ҳәм жасаў шараятларын жақсылаў, оларды турақ-жай менен тәмийинлеў бағдарында анық мақсетли, комплексли илажлардың әмелге асырылыўы әскерий хызметкерлер менен олардың шаңарақ ағзаларының материаллық, социаллық-турмыс жағдайларын сезилерли дәрежеде жақсылаў имканын бермекте. Өткен жылдың өзинде 20 жас әскерий хызметкер барлық қолайлықларға ийе заманагөй турақ-жай менен тәмийинленди.

Арқа-Батыс әскерий округинде заманагөй оқыў базасы бар, айырым жасларымыз сержантлар таярлаў мектеплеринде оқып, билим ҳәм тәжирийбесин арттырып атыр.

Жыйналыста Арқа-Батыс әскерий округиниң командири Т.Эргашев кең түрде баянат жасады.

Буннан соң Қаршы қаласында әскерий хызметин өтеп атырған жерлесимиздиң анасы Б.Панаева, Қарақалпақстан Республикасына хызмет көрсеткен артист, «Ниҳол» сыйлығының лауреаты, мобилизациялық шақырыў хызмети әскери Ж.Пиязов, шайыр Х.Дәўлетназаров қутлықлаў сөз сөйледи.

Илаж республика көркем өнер шеберлери, жас атқарыўшылары ҳәм әскерий округ ансамблиниң қатнасыўындағы байрам концерти менен жуўмақланды.

Жыйналысқа Қарақалпақстан Республикасы Министрлер Кеңесиниң Баслығы Б.Янгибаев, Жоқарғы Кеңес Баслығының орынбасары А.Хамраев қатнасты.

Ўатан қорғаўшыларының байрамы республикамыздың барлық қала ҳәм районларында, оқыў орынлары менен мийнет жәмәәтлеринде көтериңкилик жағдайында белгиленди.

 

Басқа жаңалықлар RSS