Қарақалпақстан Республикасы Жоқарғы Кеңеси

⌂ ЎЗ ҚР РУ EN

Қарақалпақстан Республикасы Жоқарғы Кеңесиниң оныншы сессиясы ҳаққында мәлимлеме

Усы жыл 11-декабрь күни Нөкисте Қарақалпақстан Республикасы Жоқарғы Кеңесиниң оныншы сессиясы болып өтти. Оған Өзбекстан Республикасы Олий Мажлиси Сенатының, Қарақалпақстан Республикасы ҳүкиметиниң ағзалары, ғалаба хабар қуралларының ўәкиллери қатнасты.

Сессияны Қарақалпақстан Республикасы Жоқарғы Кеңесиниң Баслығы
Муса Тәжетдинович Ерниязов басқарып барды.

Депутатлар сессияның Секретариатын сайлады ҳәм күн тәртибин тастыйықлады.
Күн тәртибиндеги «Қәўендерлик ҳаққында»ғы Қарақалпақстан Республикасы Нызамының жойбары ҳаққында 17-санлы «Ақбашлы» сайлаў округинен депутат, Жоқарғы Кеңестиң Социаллық раўажланыў ҳәм жәмийетлик бирлеспелер мәселелери комитетиниң баслығы Б.Нурабуллаев мәлимлеме жасады.

Нызам жойбары бойынша 72-санлы «Халқабад» сайлаў округинен депутат, Кегейли районының ҳәкими П.Турдымуратов, 38-санлы «А.Қадирий» сайлаў округинен депутат О.Халимов шығып сөйледи.

Нызам қабыл етилди ҳәм өз күшине енгизилди.

«Қарақалпақстан Республикасының айырым нызамларына өзгерислер ҳәм қосымшалар киргизиў ҳаққында»ғы Қарақалпақстан Республикасы Нызамының жойбары ҳаққында 44-санлы «Қыпшақ» сайлаў округинен депутат, Жоқарғы Кеңестиң Нызамшылық, суд-ҳуқық ҳәм пуқаралардың өзин өзи басқарыў уйымлары мәселелери комитетиниң баслығы С.Хожаназаров баянат жасады.

Бул мәселе бойынша 63-санлы «Алтынкөл» сайлаў округинен депутат, Қоңырат районының ҳәкими З.Зайтов, 2-санлы «А.Досназаров» сайлаў округинен депутат Қ.Жәнибеков пикир-усыныслар билдирди.

Депутатлар нызамды қабыл етти ҳәм өз күшине енгизди.

Сессия Тақыятас қаласын республика бойсыныўындағы қала статусынан район бойсыныўындағы қала статусына өзгертип, Хожели районы қурамына қосыў туўралы Қарақалпақстан Республикасы Министрлер Кеңесиниң Баслығы Б.Янгибаев, «Мәҳәлле» қайырқомлық жәмийетлик қоры Тақыятас қалалық бөлиминиң баслығы Х.Қудайбергенов, Хожели районындағы «Санобар Сапарбаева» фермер хожалығының баслығы Қ.Жуманиязова, Хожели районындағы «Найман» аўыл пуқаралар жыйынының баслығы Г.Тағанбердиев шығып сөйлегеннен кейин бул мәселе бойынша тийисли қарар қабыл етилди.

Қарақалпақстан Республикасында 2012-жылы жумыс орынларын шөлкемлестириў ҳәм халықтың бәнтлигин тәмийинлеў Бағдарламасының орынланыўы ҳәм 2013-жылға Бағдарлама жойбары туўралы Мийнет ҳәм халықты социаллық қорғаў министри Р.Аллабергеновтың баянаты тыңланды.

Бул бойынша 40-санлы «Қылышбай» сайлаў округинен депутат, Жоқарғы Кеңестиң Экономика, санаат, қурылыс, транспорт ҳәм байланыс мәселелери комитетиниң баслығы Б.Мырзаев, 11-санлы «Пристань» сайлаў округинен депутат, Нөкис қаласының ҳәкими Ж.Опаев, 14-санлы «Төрткүл» сайлаў округинен депутат М.Мамутов өз пикир-усыныслары менен ортақласты.
Депутатлар бул бойынша тийисли қарар қабыл етти.

Сессия «Қарақалпақстан Республикасы айырым судлары судьяларының ўәкилликлери ҳаққында»ғы мәселени көрип шығып, Палмурза Қалмурзаевич Хожабековты Қарақалпақстан Республикасы Жынаят ислери бойынша Жоқарғы судының баслығы, Сайлаўбай Аманбаевич Мәмбетқадыровты Қарақалпақстан Республикасы Жынаят ислери бойынша Жоқарғы судының судьясы, Саодат Алимбетовна Қайыпназарованы Қарақалпақстан Республикасы Пуқаралық ислери бойынша Жоқарғы судының судьясы етип сайлады ҳәм тийисли қарар қабыл етти.
Депутатлар Қарақалпақстан Республикасы Жоқарғы Кеңеси Президиумының сессиялар аралығында қабыл еткен қарарларын тастыйықлады.

Усының менен Қарақалпақстан Республикасы Жоқарғы Кеңесиниң оныншы сессиясы өз жумысын жуўмақлады.

 

Басқа жаңалықлар RSS