Қарақалпақстан Республикасы Жоқарғы Кеңеси

⌂ ЎЗ ҚР РУ EN

Үстирт газ-химия комплексин қурыў жойбары 2012-жылдағы дүньяның он глобал инвестициялық жойбарының қатарынан орын алды

Абырайлы «Дилоджик» консалтинг компаниясы (Уллыбритания) тәрепинен жәрияланған рейтингке бола, Сүргил кәни негизинде Үстирт газ-химия комплексин қурыў жойбары 2012-жылдың жуўмақлары бойынша, дүньяның он глобаль инвестициялық жойбарының қатарынан орын алды.

«Дилоджик» компаниясы 1983-жылдан берли коммерциялық банклер, баҳалы қағазлар базары қатнасыўшылары ҳәм инвесторлары ушын қаржы базарлары, баҳалы қағазлар ҳәм инвестициялық жумыс мәселелери бойынша талқылаў ҳәм консалтинг хызметлерин көрсетип келмекте. Ҳәзирги ўақытта ол ең ири инвестициялық жойбарлар, инвестициялық банклер ҳәм консалтинг компанияларының жыллық рейтинглерин жәриялап барады. Жақында «Уолл стрит джорнал» менен бирликте «Дилоджик» компаниясы реал ўақыт режиминде дүнья регионлары бойынша инвестициялық белсендиликке байланыслы электрон бюллетенди жәриялай баслады.

Планетамыздың 2012-жылдағы глобаль инвестициялық жойбарлар рейтингине дүньяның барлық аймақлары бойлап санаат тармақлары ҳәм инфраструктураларында әмелге асырылған ең ири инвестициялық жойбарлар киргизилди.

Улыўма, 2012-жылда дүньяда жойбарлық қаржыландырыў тийкарында улыўма нырқы 382 миллиард долларға тең тоғыз жүзден аслам жойбар әмелге асырыла баслаған. Ҳәзирги ўақытта олардың көпшилик бөлеги Азия регионына (28 процент), Австралияға (22 процент) туўра келеди. Европада жойбарлық қаржыландырыўдың көлеми улыўма қаржыландырыў көлеминиң 16 процентин қурап, бир жылда 38 процентке кемейген, Арқа Америкада бул көрсеткиш 13 процентти, Қубла Америкада 11 процентти қурайды. Сондай-ақ, Жақын Шығыс ҳәм Арқа Африка еллеринде де жойбарлық қаржыландырыўдың көлеми 29 процентке кемейип, улыўма муғдардың 9 процентин қурады.

Тармақлар бойынша жетекши орынды - 30 процентти транспорт ҳәм коммуналлық инфраструктураны раўажландырыў жойбарлары ийеледи, нефть-газ ҳәм нефть-химия санааты жойбарлары, сондай-ақ, электроэнергия саласындағы жойбарлардың ҳәр бири 29 процентти қурады. Қалған бөлеги телекоммуникация, таў-кән санааты ҳәм санааттың басқа тармақларындағы жойбарлар болып табылады.

Дүньяның ең жақсы он инвестициялық жойбары қатарынан нефть-газ, таў-кән санааты, транспорт ҳәм коммуналлық инфраструктуралардың жойбарлары орын алды. Олар Австралияда (төрт жойбар), АҚШ, Франция, Уллыбритания, Сингапур, Германия ҳәм Өзбекстанда (бир жойбардан) әмелге асырылмақта.
Глобаль жойбарлардың «онлығына» киргизилген Үстирт газ-химия комплексин қурыў жойбары раўажланып атырған еллер базарындағы ең ири инвестициялық жойбар, деп тән алынды.

Үстирт газ-химия комплексин қурыў жойбарында ири Сүргил газ кәнин өзлестириўди буннан былай да жеделлестириў, тәбийғый газди ажыратып алыў, крекинг ҳәм ақырғы өнимди ислеп шығарыў заводларын қурыў нәзерде тутылған. Бул комплекс 4,5 миллиард куб метр тәбийғый газди қайта ислеўдиң нәтийжесинде 400 мың тонна полиэтилен ҳәм 100 мың тонна полипропилен ислеп шығарыў имканын береди. Жыллық экспорттың көлеми 750 миллион доллардан асады. Өнимниң тийкарынан Европа, Шығыс ҳәм Қубла-шығыс Азия базарларында сатылыўы мөлшерленбекте. Үстирт газ-химия комплекси 2016-жылда иске түсириледи.

Үстирт газ-химия комплексин қурыў жойбарын «Өз-Кор газ кемикал» қоспа кәрханасы әмелге асырады. Бул қоспа кәрхана «Өзбекнефтьгаз» миллий холдинг команиясы және Қубла Кореяның «Когаз», «Лотте групп» ҳәм «СТЭкс энерджи» компанияларының инвестициялық консорциумы тәрепинен шөлкемлестирилген.

Жойбардың улыўма нырқы 4 миллиард доллардан аслам. Соннан 2,54 миллиард доллары Өзбекстан Республикасы ҳүкиметиниң кепиллигисиз 16 банк, қамсызландырыў компаниялары ҳәм қаржы институтларынан ибарат халықаралық кредит консорциумы тәрепинен жойбарлық қаржыландырылыўы нәзерде тутылған. Жойбардың қалған бөлеги шөлкемлестириўшилердиң есабынан қаржыландырылады.

Бурын хабар етилгениндей, «Томсан-Рейтер» жәҳән бизнес мәлимлеме агентлигиниң бөлимшеси - «Прожект файненс интернэшнл» журналы 2012-жылдың жуўмақлары бойынша жойбардың бийтәкирар ҳәм жаңалық екенин айрықша атап өтип, өз рейтингинде Үстирт газ-химия комплексин қурыў жойбарын нефть-химия тараўындағы жылдың ең жақсы жойбары, бурынғы аўқам аймағындағы ең ири нефть-химия жойбары, деп тән алған еди.

 

Басқа жаңалықлар RSS

10.10.2019 Хошхабар: Тақыятас районы пахта тапсырыў шəртнамасын орынлады

Тақыятаслы пидайы, мийнеткеш пахтакешлердиң аўызбиршиликте  еткен мийнетлериниң нəтийжесинде бул район мəмлекетимизге пахта тапсырыў бойынша шəртнамалық режесин биринши болып артығы менен, яғный, 100,6 пайызға орынлап, мийнет жеңисине еристи.