Қарақалпақстан Республикасы Жоқарғы Кеңеси

⌂ ЎЗ ҚР РУ EN

Аймақларды раўажландырыўда депутатлардыӊ роли

Усы жыл 20-февраль күни Нөкисте Өзбекстан Республикасы Олий Мажлиси Сенатының жергиликли ҳәкимияттың ўәкилликли уйымларының жумысын күшейтиўге көмеклесиўши комиссиясы ҳәм Қарақалпақстан Республикасы Жоқарғы Кеңесиниң шөлкемлестириўинде «Елимиз раўажланыўының ҳәзирги  басқышында сенаторлар ҳәм халық депутатлары жергиликли Кеңеслери депутатларының аймақтағы машқалаларды шешиўдеги роли» темасында семинар-тренинг болып өтти. Оған  Олий Мажлис Сенатының ағзалары, Жоқарғы Кеңестиң комитет баслықлары ҳәм жуўаплы хызметкерлери, Министрлер Кеңеси Баслығының орынбасарлары, халық депутатлары районлық ҳәм қалалық кеңеслериниң баслықлары, район, қала ҳәкимлери ҳәм орынбасарлары, турақлы комиссиялардың басшылары, барлық дәрежедеги депутатлар, сиясий партиялардың республикалық Кеңеслериниң басшылары, пуқаралық жәмийетиниң қәлиплесиўин мониторинг етиў бийғәрез институты Қарақалпақстан республикалық аймақлық бөлиминиң басшылары ҳәм жетекши қәнигелери, ғалаба хабар қуралларының ўәкиллери қатнасты.

Семинарды Қарақалпақстан Республикасы Жоқарғы Кеңеси Баслығының орынбасары А.Хамраев алып барды.

Өзбекстан Республикасы Олий Мажлиси Сенаты Баслығының орынбасары, Олий Мажлис Сенатының жергиликли ҳәкимияттың ўәкилликли уйымларының жумысын күшейтиўге көмеклесиўши комиссиясының баслығы М.Раджабова семинардың мақсети ҳәм ўазыйпалары ҳаққында түсиник берди.

Күн тәртибиндеги  мәселе бойынша Қарақалпақстан Республикасы Министрлер Кеңеси Баслығының орынбасары Н.Ерлепесов, Өзбекстан Республикасы Олий Мажлиси Сенаты аппаратының жуўаплы хызметкери А.Махмудов, Олий Мажлис Сенатының жергиликли ҳәкимияттың ўәкилликли уйымларының жумысын  күшейтиўге көмеклесиўши комиссиясының хаткери, сенатор Д.Сидиков, Пуқаралық жәмийетиниң қәлиплесиўин мониторинг етиў бийғәрез институты Қарақалпақстан Республикалық аймақлық бөлиминиң басшысы М.Сарыбаев, Өзбекстан халық демократиялық партиясының Қарақалпақстан Республикалық Кеңесиниң баслығы Қ.Қурбанбаев, «Адолат» социал-демократиялық партиясы республикалық Кеңеси баслығының орынбасары Р.Отарбаев, «Миллий тикланиш» демократиялық партиясының республикалық Кеңеси баслығының орынбасары-аппарат басшысы Е.Баўетдинов, Исбилерменлер ҳәрекети-Өзбекстан Либерал-демократиялық партиясы республикалық Кеңеси атқарыў комитети баслығының биринши орынбасары Б.Бекчановтың баянатлары тыңланды.

Атап өтилгениндей,  Елбасшымыздың Өзбекстан Республикасы Министрлер Кабинетиниң 2012-жылда елимизди социаллық-экономикалық раўажландырыўдың жуўмақлары және быйылғы жылға белгиленген экономикалық бағдарламаның ең әҳмийетли ўазыйпаларына  бағышланған мәжилисиндеги баянатында ҳәр бир аймақ ушын жетекши тармақларды анықлаў, тәбийғый шийки зат ресурсларынан  толығырақ пайдаланыў, санаат өндирисин, әсиресе қайта ислеў тармақларын, хызмет көрсетиў саласын, өндирислик ҳәм социаллық инфраструктураны  жедел ҳәм мақсетке муўапық раўажландырыў арқалы аймақларды комплексли раўажландырыўды тәмийинлеў  ўазыйпасы қойылған еди.

Мине усы  әҳмийетли ўазыйпаны орынлаў ҳәр бир сенатордан, жергиликли ҳәкимияттың ўәкилликли уйымларының депутатынан жоқары шөлкемлескенликти ҳәм инталылықты, халық депутатлары районлық, қалалық Кеңеслери ҳәм олардың турақлы комиссияларының аймақларды социаллық-экономикалық раўажландырыўға қаратылған жумысында нәтийжелилиликти арттырыў талап етиледи.

Соңғы жыллары орынларда депутатлар корпусының ролин арттырыўда айтарлықтай унамлы нәтийжелерге ерисилди. Республикамызда ҳәзирги ўақытта 483 депутат жумыс ислеп атыр. Халық депутатлары жергиликли Кеңеслериниң сессияларында аймақларды социаллық-экономикалық раўажландырыўдың, нызамлар, мәмлекетлик бағдарламалар ҳәм аймақлық бағдарламалардың орынланыўын тәмийинлеўдиң әҳмийетли мәселелери көрип шығылды, атқарыўшы ҳәкимият уйымлары басшыларының есаплары тыңланды. Сенаторлар, халық депутатлары районлық ҳәм қалалық Кеңеслериниң депутатлары аймақларды социаллық-экономикалық раўажландырыўды тәмийинлеў бойынша анық илажларды ислеп шығыўға өзлериниң үлесин қоспақта. Бунда сиясий партиялардың депутатлар топарлары да белсене қатнаспақта.

Илажда «Сенаторлар ҳәм халық депутатлары жергиликли Кеңеслери депутатлары тәрепинен аймақтағы машқалаларды анықлаў ҳәм оларды Кеңес сессиялары ямаса турақлы комиссиялардың мәжилислеринде додалаў ҳаққында», «Өзбекстан Республикасы Олий Мажлиси Сенатының жергиликли ҳәкимияттың ўәкилликли уйымларының жумысын күшейтиўге көмеклесиўши  комиссиясына жәрдем бериўши жумысшы топарлардың жумысын күшейтиў мәселелери», «Халық депутатлары жергиликли Кеңеслери сессиялары ямаса олардың турақлы комиссияларының мәжилислеринде аймақ ушын үлкен әҳмийетке ийе социаллық-экономикалық мәселелерди додалаўда сиясий партиялардың депутатлық топарларының қатнасы ҳаққында»ғы ҳәм басқа да нызам ҳүжжетлери туўралы кең түрде түсиник берилди.

Илаж қатнасыўшылары өзлерин қызықтырған сораўларға жуўап алды.

 

Басқа жаңалықлар RSS

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

08.07.2019 ИСБИЛЕРМЕНЛЕРДИҢ МАШҚАЛАЛАРЫ ҮЙРЕНИЛДИ

Усы жыл 8-июль күни Қарақалпақстан Республикасы Жоқарғы Кеңесинде исбилерменлер менен ушырасыў болып өтти.