Қарақалпақстан Республикасы Жоқарғы Кеңеси

⌂ ЎЗ ҚР РУ EN

Республика ҳаял-қызларына байрам қутлықлаўы

Қәдирли аналар ҳәм ҳүрметли ҳаял-қызлар!


Гөззал тәбиятымызға бәршемиз асығып күткен бәҳәр нәпеси кирип келген усы жарық күнлерде Сизлерди ояныў паслының туңғыш әййямы, мийрим-шәпәәт ҳәм меҳир-муҳаббат, гөззаллық тымсалы болған 8-март - ҳаял-қызлар байрамы менен Қарақалпақстан Республикасы Жоқарғы Кеңеси ҳәм Министрлер Кеңеси атынан қызғын қутлықлаймыз.

Әсирлер даўамында халқымыз тәрепинен аналарды, ҳаял-қызларды ҳүрметлеў ең ийгиликли қәдириятлардан бири сыпатында айрықша қәдирленип келмекте. Себеби, меҳир-муҳаббат ҳәм адамгершиликтиң дәслепки сабақлары ҳәр биримиздиң жүрегимизге ана ҳәййиўи менен кирип, өмир соқпағы ҳәм турмыс сабағы шаңарақ уйытқысы болған меҳрийбан аналарымыз тәрбиясынан, апа-қарындасларымыздың меҳир-муҳаббатынан басланады.

Сизлерди бәрқулла пидайылық, опадарлық, садықлық, гөззаллық ҳәм сулыўлық тымсалы ретинде улығлаў менен бирге, өзлериңизге тән болған бай руўхый дүньяңыз, ақыл-парасатыңыз, зийреклигиңиз ҳәм даналығыңыз бенен жәмийетлик-сиясий турмысымызда ылайықлы орын ийелеп киятырғаныңызды айрықша мақтаныш етемиз.

Әсиресе, елимиздиң ғәрезсиз раўажланыўы жолында көпшиликке ибрат боларлық мийнет үлгилерин көрсетип, тынышлық ҳәм татыўлықты, меҳир-мүриўбет ҳәм аўызбиршиликти, миллетлер аралық туўысқанлықты беккемлеўдей ийгиликли ис әтирапында жәмлескениңизди бәршемиз жақсы билемиз ҳәм бундай қайырлы ислериңизди жоқары баҳалаймыз.
Усы жерде ҳүрметли Президентимиз И.Ә.Кәримовтың «Шаңарақты ҳақыйқатында да беккем шаңарақ етиў, оны шын мәнисинде жәмийетимиздиң шешиўши буўынына айландырыўда шаңарақларымыздың шырағы, көрки ҳәм пайызы болған сиз, ҳүрметли ҳаяллардың орны және тәсирин ҳеш нәрсе менен өлшеп, баҳалап болмайды» деген пикирлери бийықтыяр ядымызға түседи.

Ҳақыйқатында да миллеттиң күши, Ўатанымыздың азатлығы ҳәм абатлығы, инсанның бахты, елимиз келешеги тиккелей аналарымыз, жәмийет саламатлығы ҳаял-қызларымыз бенен байланыслы десек қәтелеспеймиз.
Соңғы жыллары елимизде қолға киргизилген әҳмийетли табыслардан бири — ҳаял-қызларымызды қоллап-қуўатлаў, аналықты ҳәм балалықты қорғаў бойынша кең көлемли ислерде өзиниң көринисин таппақта.

Ҳүрметли Президентимиздиң басламасы менен «Өзбекстанды ана ҳәм бала саламатлығын қорғаўдың миллий модели: «Саламат ана — саламат бала» темасындағы халықаралық симпозиумның шөлкемлестирилиўи халықтың денсаўлығын, соның ишинде, ана ҳәм бала саламатлығын қорғаў және беккемлеў, саламат әўладты камалға келтириў сыяқлы ийгиликли мақсетлерди жәмлегени менен ажыралып турады.

Быйылғы «Абат турмыс жылы» Мәмлекетлик бағдарламасына муўапық, ҳаял-қызлардың шаңарақтағы ҳәм жәмийеттеги ролин күшейтиў, олардың социаллық белсендилигин арттырыў, бәнтлигин тәмийинлеў, елимиз экономикасының барлық тараўларында хызмет етип атырған ҳаял-қызларымыздың мийнетин мүнәсип хошаметлеў, талантын жүзеге шығарыў, қолайлы социаллық-турмыслық шараятлар жаратып бериўди әмелге асырыў ўазыйпалары белгилеп алынды.

Соңғы жыллары елимизде өзлериниң билими, таланты ҳәм шеберлиги менен ажыралып туратуғын қызларымыз ушын Зульфия атындағы мәмлекетлик сыйлықтың шөлкемлестирилиўи, ҳәр жыл сайын бул сыйлық ийелери санының көбейип барыўы билимлендириўге, миллий мәдениятымызға, әдебиятымызға, көркем-өнеримизге ҳәм спортқа қаратылған жоқары итибардың әмелий көриниси саналады. Мине, быйылғы жылы да билимлендириў бағдарында қолға киргизип киятырған жоқары нәтийжелери ушын ҳүрметли Президентимиздиң қарары тийкарында Қарақалпақ мәмлекетлик университетиниң студенти Айшолпан Оразымбетова Зульфия атындағы мәмлекетлик сыйлыққа ылайық деп табылды.

Бизиң қол-қанатымыз болған Сиз ҳаял-қызлардың жәмийетлик турмыстағы орныңызды және де беккемлеў, ҳуқық ҳәм нызамлы мәплериңизди қорғаў, ҳәр тәреплеме қолайлы шараятлар жаратып бериў, руўхый ҳәм материаллық жақтан қоллап-қуўатлаў ҳәр биримиздиң тийкарғы ўазыйпамыз болып қала береди.
Әдиўли аналар, қәдирли ҳаял-қызлар !

Турмысымызды және де саламат ҳәм абат етиўде, алдымызға қойған жоқары мақсет ҳәм нийетлерди орынлаўда, елимиздиң уллы келешеги жолындағы ийгиликли ислерде, барлық басламаларда Сизлердиң күш-жигериңизге, билим ҳәм тәжирийбеңизге, пидайылығыңызға сүйенемиз.

Сизлерди 8-март — Ҳаял-қызлар байрамы менен және бир мәрте қызғын қутлықлап, бәршеңизге беккем денсаўлық, шаңарақларыңызға аман-есенлик, аўызбиршилик, мол берекет, алдағы ийгиликли ислериңизде тасқын табыслар тилеймиз.

  

Қарақалпақстан Республикасы
Жоқарғы Кеңеси

Қарақалпақстан Республикасы
Министрлер Кеңеси

 

Басқа жаңалықлар RSS

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

08.07.2019 ИСБИЛЕРМЕНЛЕРДИҢ МАШҚАЛАЛАРЫ ҮЙРЕНИЛДИ

Усы жыл 8-июль күни Қарақалпақстан Республикасы Жоқарғы Кеңесинде исбилерменлер менен ушырасыў болып өтти.