Қарақалпақстан Республикасы Жоқарғы Кеңеси

⌂ ЎЗ ҚР РУ EN

Жоқарғы Кеӊесте қабыллаў

Бурын хабар еткенимиздей, Бердақ атындағы Қарақалпақ мәмлекетлик университети қарақалпақ филологиясы факультети журналистика қәнигелигиниӊ 1-курс студенти Айшолпан Оразымбетова билимлендириў жөнелиси бойынша Зульфия атындағы мәмлекетлик сыйлықтыӊ лауреаты болған еди.

Өткен күни Қарақалпақстан Республикасы Жоқарғы Кеӊесинде жеӊимпазды қабыллаў мәресими болып өтти. Мәресимде Жоқарғы Кеӊес Баслығы М.Ерниязов мәмлекетимизде Президентимиз басшылығында өсип киятырған жас әўладқа ҳәр тәреплеме шараятлар жаратылып атырғанын айрықша атап өтти ҳәм А.Оразымбетованы қолға киргизген жетискенлиги менен қызғын қутлықлады, оқыўларында ҳәм алдағы дөретиўшилик ислеринде табыслар тилеп, Қарақалпақстан Республикасы Жоқарғы Кеӊеси тәрепинен баҳалы саўға тапсырды.

Өз гезегинде сыйлық ийеси Айшолпан Оразымбетова да сөзге шығып, жыллы жүзлилик пенен қабыл еткени ушын республикамыз басшысына тереӊ миннетдаршылық билдирди ҳәм өзиниӊ бар билими менен күш-жигерин Ўатанымыздыӊ гүллеп-жаснаўы жолында жумсайтуғынына исендирди.

Қабыллаў мәресимине Қарақалпақстан Республикасы Жоқарғы Кеӊеси Баслығыныӊ орынбасары А.Ҳамраев, Жоқарғы Кеӊестиӊ комитет баслығы Б.Нурабуллаев ҳәм кеӊ жәмийетшилик ўәкиллери қатнасты.
 

 

Басқа жаңалықлар RSS

10.10.2019 Хошхабар: Тақыятас районы пахта тапсырыў шəртнамасын орынлады

Тақыятаслы пидайы, мийнеткеш пахтакешлердиң аўызбиршиликте  еткен мийнетлериниң нəтийжесинде бул район мəмлекетимизге пахта тапсырыў бойынша шəртнамалық режесин биринши болып артығы менен, яғный, 100,6 пайызға орынлап, мийнет жеңисине еристи.