Қарақалпақстан Республикасы Жоқарғы Кеңеси

⌂ ЎЗ ҚР РУ EN

ҚАРАҚАЛПАҚСТАН РЕСПУБЛИКАСЫ ЖОҚАРҒЫ КЕҢЕСИНИҢ ОН ТОҒЫЗЫНШЫ СЕССИЯСЫ ҲАҚҚЫНДА МƏЛИМЛЕМЕ

2017-жыл 30-декабрь күни Нөкисте Қарақалпақстан Республикасы Жоқар­ғы Кеңесиниң он тоғызыншы сессиясы болып өтти.

Сессия жумысына Өзбекистан Республикасы Олий Мажлиси Сенатының ҳəм Қарақалпақстан Республикасы Ҳүкиметиниң ағзалары, ҳуқық қорғаў уйымлары басшылары, ғалаба хабар қуралларының ўəкиллери қатнасты.

Сессияны Қарақалпақстан Республикасы Жоқар­ғы Кеңесиниң Баслығы М.Т.Ерниязов басқарып барды.

Дəслеп депутатлар сес­сияның Секретариатын сайлады ҳəм күн тəртибин тастыйықлады.

Республика басшысы өзиниң кирис сөзинде турмысымызда ушырасып атыр­ған мəселелерди унамлы шешиў ҳəм халқымызды буннан ыразы етиў бағдарында əмелге асырылып атырған кең көлемли жумысларға тоқтап өтти. Атап өтилгениндей, жуўмақланып атырған жылда халқымыз турмысында бурын болмаған жоқары нəтийжелерге ерисилди. Буған мысал ретинде қысқа ўақыт ишинде қурып питкерилген ҳəм пайдаланыўға тапсырылған «Нөкис электро аппарат», «Нөкис полимер», «Самсунг» бренди астында телевизорлар ислеп шығарыў кəрханаларын, Өзбекистан Қаҳарманы, Халық шайыры Ибрайым Юсупов атындағы инталы балалар мектеп-интернатын, спорт комплексин, муқаддес мешитти, сондай-ақ, «Бухара-Мискин» темир жол линиясының иске түсиўин атап өтсек болады.

Президентимиздиң Денсаўлықты сақлаў тараўына қаратып атырған айрықша итибары нəтийжесинде бы­йылғы жылдың өзинде 72 тез жəрдем машиналары сатып алынды. Сондай-ақ, Ишки ислер министрлигиниң профилактика инспекторлары ушын хызмет үйлери жаңадан қурып питкерилип, оларға жеңиллетилген кредит тийкарында 372 автомашиналар берилди. Буннан тысқары, барлық Аўыл ҳəм суў хожалығы бөлимлерине, Мийнет ҳəм бəнтликке көмеклесиў орайларына хызмет автомашиналары ажыратылды. Пайтахтымызда əскерий хызметкерлер ушын 18 квартиралы еки турақ жай қурып питкерилип пайдаланыўға тапсырылды. Кем тəмийинленген, турақ жайларға ҳəм социаллық жəрдемге мүтəж шаңарақларға 139 турақ жай бийпул берилди. Нөкис қаласында жəми 315 квартиралы бес қабатлы арзанластырыл­ған жети жайдың қурылысы жуўмақланып, өз ийелерине салтанатлы түрде тапсырылды.

Келеси 2018-жыл Қарақалпақстанда «Мектепке шекемги билимлендириў жылы» деп белгиленип, мəмлекетлик-жеке сектор шериклиги тийкарында 170 бала бақшасын жаңадан қурыў режелестирилмекте. Улыўма келеси жылы республикамыз бойынша 4 триллион сумнан аслам қаржы есабынан 367 ири жойбарды əмелге асырыў режелестирилген.

Күн тəртибиндеги биринши мəселе — 2018-жыл­ғы Бюджет жойбары ҳаққында Қарақалпақстан Республикасы Қаржы минис­три М.Содиқов баянат жасады.

Биринши мəселе бойынша Қараөзек районының ҳəкими Д.Утемуратов ҳəм  Өзбекистан Республикасы қаржы министриниң орынбасары А.Кəримов шығып сөйлеп, пикир-усынысларын билдирди ҳəм бул бо­йынша тийисли қарар қабыл етилди.

Соң «Дене тəрбия ҳəм спорт ҳаққында»ғы Қарақалпақстан Республикасы Нызамының (жаңа редакцияда) жойбары туўралы Жоқарғы Кеңестиң комитет баслығы Д.Қурбаниязов, «Ҳайўанатлар дүньясын қорғаў ҳəм оннан пайдаланыў ҳаққында»ғы Қарақалпақстан Республикасы Нызамының (жаңа редакцияда) жойбары туўралы Жоқарғы Кеңестиң комитет баслығы И.Юнусов,  «Қарақалпақстан Республикасының айы­рым нызамларына өзгерислер ҳəм қосымшалар киргизиў ҳаққында»ғы Қарақалпақстан Республикасы Нызамының жойбары бойынша Жоқарғы Кеңестиң комитет баслығы С.Турмановлар баянат жасады. Булар бойынша тийисли қарарлар қабыл етилди.

Сессияда «Халық пенен пикирлесиў ҳəм инсан мəплери жылы»нда əмелге асырыўға бағдарланған Мəмлекетлик бағдарламаның республика аймағында орынланыўы бойынша Қарақалпақстан Республикасы Министрлер Кеңесиниң Баслығы Қ.Сариев баянат жасады. 

Бул мəселе бойынша Өзбекистан Республикасы Президентиниң Қарақалпақстан Республикасындағы Халық қабыллаўханасының баслығы Х.Халимов ҳəм Мойнақ районының ҳəкими С.Данияров шығып сөйледи. Депутатлар бул мəселе бойынша тийисли қарар қабыл етти.

 Буннан соң депутатлар «Инсан ҳуқықлары ҳəм еркинликлерин тəмийинлеўде нызам ҳүжжетлерине бойсынылыўы үстинен прокурор қадағалаўының жағдайы ҳəм оны буннан былай да күшейтиў илажлары ҳаққындағы Республика прокурорының есабаты туўралы» Қарақалпақстан Республикасы прокуроры Р.Рахматовтың есабатын тыңлады ҳəм тийисли қарар қабыл етти.

Сессияда, сондай-ақ, депутатлар Ҳуқықбузарлықтың алдын алыў ҳəм олардың профилактикасы ҳақ­қында Қарақалпақстан Республикасы ишки ислер министри А.Темирхановтың, Қарақалпақстан Республикасы денсаўлықты сақлаў министрлигиниң 2017-жыл даўамында əмелге асырған жумыслары ҳаққында денсаўлықты сақлаў министри Д.Ходжиевтың баянатларын тыңлады ҳəм қарар қабыл етти.

Сессияда Жоқарғы Кеңес­тиң айырым комитетлери ҳəм комиссиясы қурамына өзгерислер киргизиў ҳаққындағы мəселе көрип шығылды.

Ҳүрметли Президентимиздиң 2017-жыл 5-июльдеги «Жасларға тийисли мəмлекетлик сиясаттың нəтийжелилигин арттырыў ҳəм Жаслар аўқамының жумысын қоллап-қуўатлаў ҳаққында»ғы Пəрманына муўапық Жоқарғы Кеңестиң жаслар сиясаты ҳəм саламат əўладты тəр­биялаў мəселелери бойынша комитети шөлкемлестирилди. Депутатлар усы комитеттиң баслығы етип, жəмийетлик тийкарда 52-санлы «Қырантаў» сайлаў округинен депутат, Жаслар аўқамының Қарақалпақстан Республикалық Кеңесиниң баслығы А.Данияровты сайлады ҳəм тийисли қарар қабыл етти. 

Сондай-ақ, депутатлар Қарақалпақстан Республикасы Жоқарғы Кеңесиниң Регламент ҳəм депутатлық əдеплилик комиссиясы баслығы лаўазымына 45-санлы «Шоманай» сайлаў округинен депутат К.Кəримовты бир аўыздан сайлады ҳəм тийисли қарар қабыл етти.

Сессияда Қарақалпақстан Республикасы Ҳəкимшилик суды баслығын сайлаў мəселеси көрип шығылып, депутатлар бул лаўазымға Абылай Адиловты  сайлады ҳəм тийисли қарар қабыл етти.

Депутатлар Қарақалпақстан Республикасы Жоқар­ғы Кеңеси Президиумы тəрепинен сессиялар аралығында қабыл етилген қарарларды тастыйықлады ҳəм қарар қабыл етти.

Усының менен Қарақалпақстан Республикасы Жоқарғы Кеңесиниң он тоғызыншы  сессиясы өз жумысын жуўмақлады.

 

 

 

Басқа жаңалықлар RSS

09.04.2018 ЖАСЛАР УШЫН ШЕБЕРЛИК МЕКТЕБИ

Пайтахтымызда елимизде исбилерменлик тараўында жоқары нəтийжелерге ерискен бир топар исбилерменлер менен жаслардың ушырасыўлары болып өтти.

09.04.2018 КОНСТИТУЦИЯМЫЗДЫҢ ШЕРЕК ӘСИРЛИК БАЙРАМЫ

Пайтахтымыздағы Бердақ атындағы Қарақалпақ мәмлекетлик академиялық музыкалы театрында 9-апрель — Қарақалпақстан Республикасы Конституциясы қабыл етилгениниң 25 жыллығына бағышланған салтанатлы мәжилис болып өтти.

07.04.2018 ҲЕШ БИР МҮРӘЖАТ ИТИБАРДАН ШЕТТЕ ҚАЛМАЙДЫ

Президентимиздиң «Халық мәмлекетлик уйымларға емес, ал, мәмлекетлик уйымлар халқымызға хызмет етиўи керек», - деген принципи тийкарында орынларда шөлкемлестирилген Халық қабыллаўханалары пуқараларымыздың мүрәжатларын тыңлап, турмыслық машқалаларын шешиўде мәмлекет ҳәм халық арасында байланыстырыўшы  көпир ўазыйпасын ат­қарып келмекте.

Өткен шемби күни Қарақалпақстан Республикасы Жоқар­ғы Кеңесиниң Баслығы М.Ерниязов пайтахтымызда жайласқан Өзбекстан Республикасы Президентиниң Қарақалпақстан Республикасындағы Халық қабыллаўханасында болып, кең жәмийетшилик ўәкиллери менен ушырасты ҳәм олардың мүрәжатларын тыңлады.

03.04.2018 «МЕНИҢ ҚУЯШЫМ» БАЛАЛАР БАҚШАСЫ ПАЙДАЛАНЫЎҒА ТАПСЫРЫЛДЫ

Пайтахтымыздағы 32-санлы «Қосбулақ» мәкан пуқаралар жыйыны аймағында «Мениң қуяшым» мектепке шекемги билимлендириў мәкемеси пайдаланыўға тапсырылды.

01.04.2018 «ҚЫЙТАҚ ЖЕРГЕ ЕГИН ЕГИЎ» АЙЛЫҒЫ БАСЛАНДЫ

Аўыл хожалығын жедел раўажландырыў ҳәм реформаларды терең­лес­тириў бойынша жумыслардың нәтийжелилигине бағышланып өткерилген видеоселектор мәжилисинде қый­тақ жерлерден нәтийжели пайдаланыўды шөл­кемлестириў мәселесине де айрықша итибар қаратылды.

01.04.2018 НӨКИСТЕ СТОМАТОЛОГИЯНЫҢ ӘҲМИЙЕТЛИ МӘСЕЛЕЛЕРИ ДОДАЛАНДЫ

Пайтахтымызда еки күн даўамында стоматологияның әҳмийетли мәселелерине бағышланған республикалық конференция болып өтти. Оған Ташкент қаласы, Әндижан, Бухара ўәлаяты ҳәм республикамыздың қала ҳәм районларынан келген тараў басшылары ҳәм қәнигелери қатнасты.

Илаждың биринши күнинде Бердақ атындағы Қарақалпақ мәмлекетлик академиялық музыкалы театрында жалпы мәжилис өткерилди.

Оны Қарақалпақстан Республикасы денсаўлықты сақлаў министри Д.Ходжиев алып барды.

01.04.2018 АЎЫЛЛАРЫМЫЗ ЕЛЕ ДЕ АБАТ БОЛАДЫ

Елимизде барлық тараўларда алып барылып атырған кең көлемли реформалар халқымыздың өмиринде ҳәм күнделикли турмысында өзиниң айқын көринисин таппақта. «Халық мәмлекетлик уйымларға емес, ал, мәмлекетлик уйымлар халқымызға хызмет етиўи керек» деген идея бул бағдардағы жумыслардың тийкарғы өлшемине айланып, халқымыздың жәмийетлик белсендилигин, олардың ертеңги күнге исенимин арттырмақта.

Ҳүрметли Президентимиздиң басламасы менен турмысқа енгизилип атырған жаңа система-«Абат аўыл» бағдарламасы шеңберинде бизиң республикамызда да кең көлемли жумыслар әмелге асырылмақта. Атап айтқанда, Беруний районының  «Бийбазар» аўыл пуқаралар жыйыны, «Хорезм» ҳәм «Палваш» мәкан пуқаралар жыйынлары аймақларында жүргизилип атырған қурылыс ҳәм абаданластырыў жумыслары буның айқын мысалы болып табылады.

28.03.2018 ҚАРАҚАЛПАҚСТАНЛЫ ИСБИЛЕРМЕНЛЕР ҚЫТАЙҒА БАРЫП ҚАЙТТЫ

Жақында Қарақалпақстан Республикасының қурылыс тараўы қəнигелери делегациясы қытайдың Пекин қаласында өткерилген «Constructtech-2018» қурылыс технологиялары, материаллары ҳəм үскенелери бойынша халықаралық көргизбеге, сондай-ақ, Өзбекстан Республикасы елшиханасы ҳəм Қытай Халықаралық саўданы раўажландырыў Кеңеси тəрепинен шөлкемлестирилген өзбек-қытай бизнес-форумына қатнасып, усы тараў бойынша жетекши компаниялар менен тəжирийбе алмасып қайтты.

25.03.2018 ЎАТАНҒА САДЫҚЛЫҚТЫҢ ƏМЕЛДЕГИ КӨРИНИСИ

«... Соңғы нəпесим қал­ғанша Ана-Ўатанымның садық перзенти болып қалыўға, əскерий хызметтиң барлық машақат ҳəм қы­йыншылықларын шыдамлылық пенен жеңиўге, мəмлекетлик ҳəм əскерий сырларды беккем сақлаўға ата-бабаларым руўхы алдында ант етемен».

Ўатан қорғаўшысы болыўды қəлеген ҳəр бир жигит айтыўды əрман еткен бул сөзлер екшемби күни пайтахтымыз орайында 870 мəрте бəлент жаңлады. «Бахыт үйи» алдындағы кең майданда Өзбекстан Республикасы Қураллы Күшлери қурамында өзлериниң əскерий хызметлерин баслаған усыншама жаўынгер салтанатлы түрде ант берди.