Қарақалпақстан Республикасы Жоқарғы Кеңеси

⌂ ЎЗ ҚР РУ EN

ҚАРАҚАЛПАҚСТАНЛЫ ИСБИЛЕРМЕНЛЕР ҚЫТАЙҒА БАРЫП ҚАЙТТЫ

Жақында Қарақалпақстан Республикасының қурылыс тараўы қəнигелери делегациясы қытайдың Пекин қаласында өткерилген «Constructtech-2018» қурылыс технологиялары, материаллары ҳəм үскенелери бойынша халықаралық көргизбеге, сондай-ақ, Өзбекстан Республикасы елшиханасы ҳəм Қытай Халықаралық саўданы раўажландырыў Кеңеси тəрепинен шөлкемлестирилген өзбек-қытай бизнес-форумына қатнасып, усы тараў бойынша жетекши компаниялар менен тəжирийбе алмасып қайтты.

Сапар Өзбекстан Республикасы сыртқы ислер министрлигиниң Нөкис қаласындағы Консуллық бөлими ҳəм Өзбекстан Республикасы Саўда-санаат палатасы тəрепинен шөлкемлестирилди.

Бүгинги күнде республикамыздың барлық аймақлары қатары Қарақалпақстанда да қурылыс жедел пəтлер менен əмелге асырылмақта. Қала ҳəм районларымызды жаңалаў шеңберинде билимлендириў, мəденият мəкемелери имаратларын, спорт комплекслерин қурыў сыяқлы көлемли жумыслар алып барылмақта. Сол ушын да делегацияның қурамына қурылыс секторынан 22 компания басшылары қамтып алынды. 

Сапар шеңберинде делегация ағзалары Қытайдың жетекши машина қурылысы санааты өндирис кəрханаларынан бири - «Sany» корпорациясының жумысы менен танысты. Корпорацияның тийкарғы жумысы — арнаўлы қурылыс техникасын ислеп шығарыў.

Қарақалпақстан исбилерменлер делегациясының сапары мүнəсибети менен Өзбекстан Республикасы елшиханасы ҳəм Қытай Халықаралық саўданы раўажландырыў Кеңеси тəрепинен Пекин қаласында өзбек-қытай бизнес-форумы шөлкемлестирилди. Оған Қытайдың  қурылыс тараўынан тысқары аўыл-хожалығы, медицина, азық-аўқат, текстиль, инвестиция, фармацевтика, туризм бойынша 60 тан аслам кəрхана ҳəм компанияларының басшылары қатнасты. Илаж даўамында қатнасыўшылардың дыққатына Өзбекстанның социал-экономикалық раўажланыўындағы жетискенликлери ҳəм ең соңғы тенденциялар ҳаққында мағлыўматлар усынылды.  

 Қарақалпақстанның бай экономикалық потенциалы, «Нукус фарм» еркин экономикалық зонасында ҳəм басқа да киши өндирислик зоналарда шет елли инвесторлар ушын жаратылған қолайлықлар, жеңилликлер, жоқары қуўатлы жəне экспортқа бағдарланған өним ислеп шығарыўшы кəрханалар ушын преференциялар менен таныстырылды. Қарақалпақстанның туристлик потенциалы, бул тараўды жедел раўажландырыў ҳəм тийисли инфраструктураны жақсылаў бо­йынша əмелге асырылып атыр­ған илажлар менен таныс­тырылып, тарийхый орынлар ҳаққындағы видеороликлер ҳəм фото-слайд-шоулар жыйнал­ғанлардың итибарына усынылды.

Илажда Қытай халықаралық саўданы раўажландырыў Кеңеси ўəкиллери шығып сөйлеп, Өзбекстанда экономиканы либералластырыўға, реал секторларды раўажландырыўға жəне киши ҳəм орта бизнестиң ролин күшейтиўге қаратылған бағдарламалар бойынша əмелге асырылып атырған жумысларға жоқары баҳа берди. Олар Қытайдың исбилерменлери Қарақалпақстандағы шериклери менен инвестициялық ҳəм саўда-экономикалық бирге ислесиўди орнатыўға үлкен қызығыўшылық билдирип атырғанын атап өтти. Кеңес ўəкиллери Қытай компанияларына Қарақалпақстанның тийисли кəрханалары менен коопера­цияны тереңлестириў бойынша ҳуқықый ҳəм техникалық жəрдем көрсетиўге таяр екенлигин айрықша атап өтти.

Илаж шеңберинде В2В форматындағы еки тəреплеме ушырасыўлар өткерилди. Онда Өзбекстанда боянтамырды қайта ислеў, жеңил санаат өнимлерин ҳəм қурылыс материалларын ислеп шығарыў, нефть-газ саласында жəне хызмет көрсетиў тараўында қоспа жойбарларды əмелге асырыў, сондай-ақ, Өзбекстан базарына жоқары технологиялық үскенелерди жеткерип бериў усыныс етилди. Қытайдың исбилерменлик орталығы  Қарақалпақстанда текстиль өнимин ислеп шығарыўды жолға қойыў, шығындыларды қайта ислеў заводын қурыў, боянтамыр тийкарында фармацевтикалық өнимди ислеп шығарыў мəселелери менен қызықсынды.   

Сапар жуўмағы бойынша 2018-жылдың апрель айында Қытай исбилерменлери топарының Қарақалпақстанға сапар етиўине келисип алынды. Еки тəреплеме сөйлесиўлер барысында мəмлекетлердиң хожалық басқарыў субъектлери арасында экспорт ҳəм импорт шəртнамаларына қол қойылды.

Солай етип, Қарақалпақстанлы исбилерменлердиң Қытай мəмлекетине сапары нəтийжели болды.

 

 

Басқа жаңалықлар RSS

02.08.2018 ЖЫНАЯТШЫЛЫҚҚА ҚАРСЫ ГҮРЕСИЎДЕ БИРГЕ ИСЛЕСИЎДИ КҮШЕЙТИЎИМИЗ ТИЙИС

Бердақ атындағы Қарақалпақ мәмлекетлик академиялық музыкалы театрында Өзбекстан Республикасы Президенти Шавкат Мирзиёевтиң басшылығында усы жыл 27-июль күни жынаятшылықтың ерте алдын алыў бағдарындағы жумыслардың бүгинги жағдайы, бул бойынша ишки ислер уйымлары ҳәм басқа да мәмлекетлик уйымлардың жуўапкершилигин арттырыў, системада жүзеге келген машқалалар менен кемшиликлерди сапластырыў мәселелерине бағышланып болып өткен  видеоселектор мәжилисинен келип шығатуғын ўазыйпаларға арналған ушырасыў болып өтти.
 

02.08.2018 ИНВЕСТИЦИЯЛЫҚ ЖОЙБАРЛАРДЫҢ ОРЫНЛАНЫЎ БАРЫСЫ ДОДАЛАНДЫ

Қарақалпақстан Республикасы Жоқарғы Кеңесинде республикамыз делегациясының сырт еллерге сапары даўамында дүзилген инвестициялық жойбарлардың ҳәм басқа да шәртнамалардың орынланыў барысы, бул бағдарда орын алып атырған айырым машқалалар және оның шешими бойынша алда турған ўазыйпаларға бағышланған мәжилис болып өтти.

24.07.2018 АРАЛ УЛТАНЫНДА ЖӘНЕ БИР ГАЗ ҚУДЫҒЫНАН ГАЗ ШЫҚТЫ

Бурын хабар еткенимиздей, «Үстирт геофизика экспедициясы» филиалы жәмәәти бүгинги күнде Үстирт кеңислиги ҳәм Аралбойы аймақларында ҳәм оның ултанында шет ел («Лукойл», “ERIEL”) компаниялары менен биргеликте тәбийғый жер асты байлықларын излеў ҳәм изертлеў жумысларын алып бармақта. Январь айында, олар тәрепинен төменги Сүргил кәни ашылып, оны өзлестириў бойынша жумыслар баслап жиберилген еди. Үстирт излеў-бураўлаў басқармасы менен биргеликте алып барылған жумыслар нәтийжесинде күни кеше бул жерде қазылған тағы бир қудықтан газ шыға баслады.

22.07.2018 КУБОК ЖЕҢИМПАЗЛАРЫ АНЫҚЛАНДЫ

Пайтахтымыз Нөкис қаласында спорттың мини футбол, волейбол ҳәм стол тенниси бойынша Қарақалпақстан Республикасы Жоқарғы Кеңесиниң кубогы ушын болып өткен жарыс жуўмақланып, жеңимпазлар анықланды.

20.07.2018 КӨШПЕЛИ ҚАБЫЛЛАЎЛАР

Өзбекстан Республикасы Президентиниң тапсырмасына бола, бүгинги күнде республикамыздың барлық қала ҳәм районларында көшпели қабыллаўханалар шөлкемлестириў режелестирилген. Қарақалпақстан Республикасы Жоқарғы Кеңесиниң Баслығы Муўса Ерниязов республикамыздың ең шетки аймақларынан бири болған — Қоңырат районының «Қарақалпақстан» посёлкасы турғынлары менен ушырасты.

17.07.2018 ПАЙТАХТЫМЫЗДА 55 МЕТР БИЙИКЛИКТЕГИ БАЙРАҚЛАР ОРНАТЫЛАДЫ

Өзбекстан Республикасы мәмлекетлик ғәрезсизлигиниң жигирма жети жыллық байрамы алдында Нөкис қаласында Өзбекстан ҳәм Қарақалпақстан Республикаларының мәмлекетлик байрақлары орнатылады.

16.07.2018 СПОРТ ОЙЫНЛАРЫНА СТАРТ БЕРИЛДИ

Республикалық ойын түрлери ҳәм жеңил атлетика бойынша қәнигелестирилген балалар ҳәм жас өспиримлер спорт мектебинде жарыстың ашылыў салтанаты болып өтти. Илажда  Қарақалпақстан Республикасы Жоқарғы Кеңесиниң комитет баслығы С.Турманов шығып сөйлеп, жарыс қатнасыўшыларына әўмет тиледи.