Қарақалпақстан Республикасы Жоқарғы Кеңеси

⌂ ЎЗ ҚР РУ EN

АЎЫЛЛАРЫМЫЗ ЕЛЕ ДЕ АБАТ БОЛАДЫ

Елимизде барлық тараўларда алып барылып атырған кең көлемли реформалар халқымыздың өмиринде ҳәм күнделикли турмысында өзиниң айқын көринисин таппақта. «Халық мәмлекетлик уйымларға емес, ал, мәмлекетлик уйымлар халқымызға хызмет етиўи керек» деген идея бул бағдардағы жумыслардың тийкарғы өлшемине айланып, халқымыздың жәмийетлик белсендилигин, олардың ертеңги күнге исенимин арттырмақта.

Ҳүрметли Президентимиздиң басламасы менен турмысқа енгизилип атырған жаңа система-«Абат аўыл» бағдарламасы шеңберинде бизиң республикамызда да кең көлемли жумыслар әмелге асырылмақта. Атап айтқанда, Беруний районының  «Бийбазар» аўыл пуқаралар жыйыны, «Хорезм» ҳәм «Палваш» мәкан пуқаралар жыйынлары аймақларында жүргизилип атырған қурылыс ҳәм абаданластырыў жумыслары буның айқын мысалы болып табылады.

 «Бийбазар» аўыл пуқаралар жыйынының «Пахташы» елатлы пункти районның ең шетинде жайласқан болып, бүгинги күни бул жерде 223 шаңарақ жасап келмекте. Жасыратуғыны жоқ, соңғы жыллары аўыл халқының күнделикли турмысында бир қатар машқалалар топланып қалған еди. Айырым турғынлар турақ жайларының жанына өзбасымшалық пенен түрли көринистеги, ҳеш қандай талап және нормаларға жуўап бермейтуғын нызамсыз қурылыслар қурып алған. Ишки жоллардың жағдайы ашынарлы жағдайда.

Бүгинги күни елатлы пунктте Өзбекстан Республикасы Президентиниң 2017-жыл 8-августтағы «Аймақлардың жедел социаллық-экономикалық раўажланыўын тәмийинлеўге байланыслы тийкарғы илажлар ҳаққында»ғы қарарына муўапық шөлкемлестирилген секторлар тәрепинен айтарлықтай жумыслар алып барылмақта. Елимиз басшысының басламасы менен басланған  иске бәрше жәмлескенлик пенен қатнаспақта. Аўылды абаданластырыў мақсетинде нызамсыз қурылыслар алып тасланып, аймақтағы 66 шаңарақтың турақ жайының төбеси ҳәм фасады, 157 шаңарақтың фасады оңланып, бояў жумыслары алып барылмақта. Сондай-ақ, 4,7 километр узынлықтағы автомобиль ҳәм ишки жолға қум-шағыл тас төселип, 1,5 километр узынлықтағы жолды оңлаў, 26-санлы улыўма билим бериў мектеби, 56-санлы мектепке шекемги билимлендириў мәкемесиниң имаратларында қайта оңлаў жумыслары жүргизилмекте.

Бағдарлама бойынша қурылыс ҳәм абаданластырыў жумыслары райондағы «Хорезм» мәҳәлле пуқаралар жыйыны аймағындағы Кат көшесинде де алып барылмақта. Көшедеги 9 көп қабатлы турақ жайдың әтирапындағы нызамсыз қурылыслар алып тасланды. Турақ жайдың төбеси ҳәм фасады оңланбақта. Жайға кирер жердеги есиклер, подъездлери қайта оңланып, электр шырақлары орнатылмақта. Балалар спорт майданшасы, түнги жақтыландырыў шырақлары, автомобиль жоллары қурылмақта.  Пиядалар жүретуғын жолларға бетон қапламалары жатқарылмақта.

«Палваш» мәкан пуқаралар жыйыны аймағындағы 52-санлы улыўма билим бериў мектебиниң имараты, усы мектепке баратуғын 1,5 километр узынлықтағы асфальт жол, 700 метр узынлықтағы пиядалар жүретуғын жолдың қурылысы питкерилип, әтирапын абаданластырыў жумыслары алып барылмақта. Бундай қа­йырлы ислерге мәкан пуқаралар жыйынының турғынлары да белсене қатнаспақта. Аймақтағы фермер хожалықлары бул жумысларға қатнасып атырғанларды ыссы аўқат пенен тәмийинлеп, қайырлы ислерге өзлериниң үлеслерин қосып келмекте.

— Ҳақыйқатында да, көп жыллардан бери топланып қалған машқалалар Президентимиз басламасы менен әмелге асырылып атырған бағдарлама шеңберинде өзиниң унамлы шешимин таппақта,-дейди «Хорезм» мәкан пуқаралар жыйынының баслығы Бахтияр Абдуллаев.  Бир нешше миллет ўәкиллери бир шаңарақ ағзаларындай аўызбиршиликте жасап ҳәм мийнет етип киятырған аўыл турғынлары бундай саўап ислерден оғада миннетдар...

Жуўмақлап айтқанда, «Абат аўыл» бағдарламасы шеңберинде алып барылып атырған кең көлемли жумыслар халқымызды мийрим-шәпәәт, бир-биреўге ҳүрмет және жәмлескенликке шақырып, аўылларымыздың еле де көркем, халқымыз турмысының абадан, перзентлеримиздиң бахытлы келешегине хызмет  етиўи менен әҳмийетли.

 

Басқа жаңалықлар RSS

02.08.2018 ЖЫНАЯТШЫЛЫҚҚА ҚАРСЫ ГҮРЕСИЎДЕ БИРГЕ ИСЛЕСИЎДИ КҮШЕЙТИЎИМИЗ ТИЙИС

Бердақ атындағы Қарақалпақ мәмлекетлик академиялық музыкалы театрында Өзбекстан Республикасы Президенти Шавкат Мирзиёевтиң басшылығында усы жыл 27-июль күни жынаятшылықтың ерте алдын алыў бағдарындағы жумыслардың бүгинги жағдайы, бул бойынша ишки ислер уйымлары ҳәм басқа да мәмлекетлик уйымлардың жуўапкершилигин арттырыў, системада жүзеге келген машқалалар менен кемшиликлерди сапластырыў мәселелерине бағышланып болып өткен  видеоселектор мәжилисинен келип шығатуғын ўазыйпаларға арналған ушырасыў болып өтти.
 

02.08.2018 ИНВЕСТИЦИЯЛЫҚ ЖОЙБАРЛАРДЫҢ ОРЫНЛАНЫЎ БАРЫСЫ ДОДАЛАНДЫ

Қарақалпақстан Республикасы Жоқарғы Кеңесинде республикамыз делегациясының сырт еллерге сапары даўамында дүзилген инвестициялық жойбарлардың ҳәм басқа да шәртнамалардың орынланыў барысы, бул бағдарда орын алып атырған айырым машқалалар және оның шешими бойынша алда турған ўазыйпаларға бағышланған мәжилис болып өтти.

24.07.2018 АРАЛ УЛТАНЫНДА ЖӘНЕ БИР ГАЗ ҚУДЫҒЫНАН ГАЗ ШЫҚТЫ

Бурын хабар еткенимиздей, «Үстирт геофизика экспедициясы» филиалы жәмәәти бүгинги күнде Үстирт кеңислиги ҳәм Аралбойы аймақларында ҳәм оның ултанында шет ел («Лукойл», “ERIEL”) компаниялары менен биргеликте тәбийғый жер асты байлықларын излеў ҳәм изертлеў жумысларын алып бармақта. Январь айында, олар тәрепинен төменги Сүргил кәни ашылып, оны өзлестириў бойынша жумыслар баслап жиберилген еди. Үстирт излеў-бураўлаў басқармасы менен биргеликте алып барылған жумыслар нәтийжесинде күни кеше бул жерде қазылған тағы бир қудықтан газ шыға баслады.

22.07.2018 КУБОК ЖЕҢИМПАЗЛАРЫ АНЫҚЛАНДЫ

Пайтахтымыз Нөкис қаласында спорттың мини футбол, волейбол ҳәм стол тенниси бойынша Қарақалпақстан Республикасы Жоқарғы Кеңесиниң кубогы ушын болып өткен жарыс жуўмақланып, жеңимпазлар анықланды.

20.07.2018 КӨШПЕЛИ ҚАБЫЛЛАЎЛАР

Өзбекстан Республикасы Президентиниң тапсырмасына бола, бүгинги күнде республикамыздың барлық қала ҳәм районларында көшпели қабыллаўханалар шөлкемлестириў режелестирилген. Қарақалпақстан Республикасы Жоқарғы Кеңесиниң Баслығы Муўса Ерниязов республикамыздың ең шетки аймақларынан бири болған — Қоңырат районының «Қарақалпақстан» посёлкасы турғынлары менен ушырасты.

17.07.2018 ПАЙТАХТЫМЫЗДА 55 МЕТР БИЙИКЛИКТЕГИ БАЙРАҚЛАР ОРНАТЫЛАДЫ

Өзбекстан Республикасы мәмлекетлик ғәрезсизлигиниң жигирма жети жыллық байрамы алдында Нөкис қаласында Өзбекстан ҳәм Қарақалпақстан Республикаларының мәмлекетлик байрақлары орнатылады.

16.07.2018 СПОРТ ОЙЫНЛАРЫНА СТАРТ БЕРИЛДИ

Республикалық ойын түрлери ҳәм жеңил атлетика бойынша қәнигелестирилген балалар ҳәм жас өспиримлер спорт мектебинде жарыстың ашылыў салтанаты болып өтти. Илажда  Қарақалпақстан Республикасы Жоқарғы Кеңесиниң комитет баслығы С.Турманов шығып сөйлеп, жарыс қатнасыўшыларына әўмет тиледи.