Қарақалпақстан Республикасы Жоқарғы Кеңеси

⌂ ЎЗ ҚР РУ EN

ҚАРАҚАЛПАҚСТАН РЕСПУБЛИКАСЫ ЖОҚАРҒЫ КЕҢЕСИНИҢ ГЕЗЕКСИЗ СЕССИЯСЫ ҲАҚҚЫНДА МӘЛИМЛЕМЕ

Усы жыл 4-июнь күни Қарақалпақстан Республикасы Жоқарғы Кеңесиниң гезексиз жигирма биринши сессиясы болып өтти.

Видеоселектор тәризинде өткерилген сессияның жумысына Өзбекстан Республикасы Олий Мажлис Сенатының комитет баслығы Б.Матмуратов Нызамшылық палатасының депутатлары, Олий Мажлис Сенатының, Қарақалпақстан Республикасы ҳүкиметиниң ағзалары, тийисли кәрхана, мәкеме, ҳуқық қорғаў уйымларының басшылары, ғалаба хабар қуралларының ўәкиллери қатнасты.

Сессияны Қарақалпақстан Республикасы Жоқарғы Кеңесиниң Баслығы М.Ерниязов басқарып барды.

Ең дәслеп, депутатлар сессияның Секретариатын сайлады ҳәм күн тәртибин тастыйықлады.

Атап өтилгениндей, Өзбекстан Республикасы Президенти Шавкат Мирзиёевтың басшылығында усы жылдың 29-май күни экспорт-импорт, жергиликли бюджетке қосымша түсимлерди тәмийинлеў, аўыл хожалығында ғаўаша тәрбиясы, бийдай орым-жыйыны, тәкирарый егинлер ҳәм суўдан ақылға уғрас пайдаланыў сыяқлы әҳмийетли илажларды нәтийжели өткериўге байланыслы мәселелерге бағышланған видеоселектор мәжилисинде елимиздиң экономикасын турақлы раўажландырыў, соның ишинде Аўыл хожалығы тараўында кешиктирип болмайтуғын мәселелерге айрықша итибар қаратылып, анық ўазыйпалар белгилеп берилди. Суўдан мақсетли пайдаланыўды қатаң қадағалаға алыў, суўды үнемлейтуғын заманагөй технологияларды енгизиў, топырақтың ығаллығын сақлаў ушын ҳәр гектарға 10 тонна есабынан жергиликли төгин шығарыў, суўғарыў жумысларын тек шербет усылында алып барыў, ис өнимдарлдығын арттырыў мақсетинде суўшы, механизатор ҳәм жумысшыларға қолайлы мийнет шараятын жаратыў, оларды ўақтында ис-ҳақылары менен тәмийинлеў бүгиниги күндеги ең баслы ўазыйпалардан саналады.

Суўдың жетиспеўшилиги күтилип атырған быйылғы жылдың шараятында ғәлледен босаған майданларға егилетуғын тәкирарый егинлердиң көлемин 10 мың гектарға қысқартыў, олардың орнына суўды аз талап ететуғын мәш, лобия ҳәм басқа да азықлық егинлерди егиў белгиленбекте. Болып өткен видеоселектор мәжилисинде «Ғаўашадан кепилленген зүрәәт топлаў» бир айлығы белгилеп алынды.

Бүгинги күни ҳүрметли Президентимиздиң басшылығында елимиз экономикасының барлық тараўларында, соның ишинде аўыл хожалығында кең көлемли өзгерислер жүз бермекте. Быйылғы жылдың өзинде пахта ҳәм ғәлле жетистириўди қаржыландырыў, қыйтақ жерлерден пайдаланыў бойынша жаңа система жаратылды. Атап айтқанда, пахта жетистириў ушын 359 миллиард 190 миллион сум жеңилликли кредит ажыратылмақта. Бағдарлама тийкарында «Агромаш-сервис» МТПларға он жыл мүддетке 5 процентлик кредит есабынан 71 миллиард 742 миллион сумлық 313 дана техника және агрегат алып келинген болса, қалған 628 данасын алып келиў күтилмекте. Бар суўдан үнемли ҳәм нәтийжели пайдаланыў мақсетинде Өзбекстан Республикасы Министрлер Кабинетиниң арнаўлы қарары тийкарында 94 дана, Өзбекстан Республикасы Суў хожалығы министрлиги тәрепинен 100 дана, жергиликли бюджет есабынан 300 дана, жәми 494 дана көшпели дизель насос агрегатын алып келиў нәзерде тутылмақта. Соннан бүгинги күнге 390 данасы фермерлерге хызмет көрсетпекте.

Быйылғы жылы жерлердиң мелиоративлик жағдайын жақсылаўға жәми 81 миллиард 53 миллион сум қаржы ажыратылмақта. Усы тийкарда қабыл етилген бағдарлама тийкарында қоллекторларда қурылыс ҳәм реконструкция жумыслары ушын 22 миллиард 192 миллион сум, тиклеў және оңлаў жумысларын алып барыў ушын 26 миллиард 635 миллион сумлық, каналларда қурылыс ҳәм реконструкция жумысларына 32 миллиард 226 миллион сум қаржы ажыратылмақта.

Өзбекстан Республикасы Президентиниң усы жыл 17-апрельдеги «Аўыл ҳәм суў хожалығы тараўында мәмлекетлик басқарыў системасын түп-тийкарынан жетилистириў илажлары ҳаққында»ғы Пәрманы тийкарында суў хожалығының өз алдына министрлик болып шөлкемлестирилиўи, тараўдың ҳақыйқый жағдайын және раўажланыў перспективаларын терең үйрениў, оларды стратегиялық раўажландырыў бойынша тәсиршең жумысларды жолға қойыў, басқарыў системасын түп-тийкарынан жетилистириў ўазыйпасын белгилеп берди. Бул өз гезегинде бир неше жыллар даўамында тараўда пайдалынылмай атырған имканиятларды иске қосыўда, суў ресурсларынан мақсетли пайдаланыўда айрықша әҳмийетке ийе.

Президентимиз өткен жылдың декабрь айында Қарақалпақстанға сапары даўамында мелиорация ҳәм ирригация тармақларын қурыў ҳәм реконструкциялаў жойбарлары менен танысып, бир қатар ўазыйпалар белгилеп берген еди. Усы тийкарда Төрткүл районындағы «Шорбулақ» суў сақлағышын қурыў бойынша 4 миллиард сумлық шәртнама дүзилип, жумыслар баслап жиберилди. Сондай-ақ, «Бостан» каналының қурылыс бойынша жойбарлаў-сметалық ҳүжжетлери таярланбақта. Буннан тысқары, суўды үнемлеўши технологияларды енгизиў бойынша еки жыллық бағдарлама ислеп шығылды.

Сессияда Өзбекстан Республикасы Олий Мажлиси Сенатының комитет баслығы Б.Матмуратов шығып сөйлеп, суў ресурсларынан ақылға уғрас пайдаланыў бойынша алда турған жуўапкерли ўазйыпаларға тоқтап өтти.

Сондай-ақ, сессияда Қарақалпақстан Республикасы Министрлер Кеңесиниң баслығы Қ.Сариев Президентимиздиң басшылығында болып өткен видеоселектор мәжилисинен келип шығатуғын ўазыйпалар, пахта ҳәм ғалледен мол зүрәәт топлаў, азық-аўқат қәўипсизлигин тәмийинлеўде 4 сектор басшыларының жуўапкершилиги бойынша баянат жасады.

Буннан кейин Қарақалпақстан Республикасы Министрлер Кеңеси Баслығының орынбасары С.Хожаметов, Қарақалпақстан Республикасы фермер дийхан хожалықлары ҳәм қыйтақ жер ийелери кеңесиниң баслығы Қ.Нурымбетов, Өзбекстан Республикасы Бас прокуратурасы жанындағы Агросанаат комплекси ҳәм азық-аўқат қәўипсизлиги тәмийинлениўи үстинен қадағалаў инспекциясы Карақалпақстан Республикасы басқармасының баслығы М,Матчанов аўыл хожалығы егинлерин, соның ишинде ғаўаша майданларын суўғарыўды шөлкемлестириў, ғәлледен босаған майданларға суў кем талап ететуғын егинлерди жайластырыў, суўдан үнемли пайдалыныў бойынша әмелге асырылатуғын илажларға тоқтап өтти.

Күн тәртибиндеги мәселе бойынша тийисли қарар қабыл етилди.

Депутатлар Қарақалпақстан Республикасы Президумының сессиялар аралығында қабыл еткен қарарларын тастыйықлады.

Усының менен Қарақалпақстан Республикасы Жоқарғы Кеңсиниң гезексиз жигирма биринши сессиясы өз жумысын жуўмақлады. 

 

Басқа жаңалықлар RSS

11.12.2018 ЖОҚАРҒЫ КЕҢЕСТЕГИ ҚАБЫЛЛАЎ ҲƏМ ПРЕЗЕНТАЦИЯ

Бəршемизге мəлим, Ҳүрметли Президентимиздиң усы жылдың 15-16-ноябрь күнлери Қарақалпақстанға сапары ўақтында берилген тапсырмалар ҳəм кеңейтирилген тəризде өткерилген мəжилис протоколы тийкарында елимиздиң Қытай, Корея, Кувейт, Германия, Япония мəмлекетлериндеги елшилери алдына усы аймаққа 7 триллион 341 миллиард сумлық 30 проектти əмелге асырыў ўазыйпалары белгилеп берилген еди ҳəм бул бағдардағы ийгиликли ислер басланып кетти.

08.12.2018 «МАҲАЛЛА ИФТИХОРИ» КӨКИРЕК БЕЛГИСИ ТАПСЫРЫЛДЫ

Пуқаралардың өзин-өзи басқарыў уйымлары жумысларын муўапықластырыў бойынша Қарақалпақстан Республикасы Кеңесинде «Маҳалла ифтихори» көкирек белгисин тапсырыў салтанаты болып өтти.

 

08.12.2018 ҚАРАҚАЛПАҚСТАН РЕСПУБЛИКАСЫ ЖОҚАРҒЫ КЕҢЕСИНИҢ БАСЛЫҒЫ М.ЕРНИЯЗОВТЫҢ БМШтың АРАЛБОЙЫ РЕГИОНЫ УШЫН ТРАСТ ФОНДЫНЫҢ ПРЕЗЕНТАЦИЯСЫ ҲӘМ БАСПАСӨЗ КОНФЕРЕНЦИЯСЫНДАҒЫ БАЯНАТЫ

Ҳүрметли ханымлар ҳәм мырзалар! 
Бүгин мен Аралбойы регионының дерлик 2 миллионлық халқы атынан шығып сөйлер екенмен, усы аймақтың халқы Арал теңизиниң кескин гуманитар ҳәм экологиялық апатшылығы ақыбетлеринен ҳәммеден көп ҳәм тиккелей жәбир шегип атырғанлығын мәлим етип билдирмекшимен.