Қарақалпақстан Республикасы Жоқарғы Кеңеси

⌂ ЎЗ ҚР РУ EN

«НӨКИС ХАЛЫҚАРАЛЫҚ АЭРОПОРТЫ» ЖАҢАРМАҚТА

Ғәрезсизлигимиздиң дәслепки күнлеринен-ақ елимизде барлық тараўлар сыяқлы авиация саласы да тез пәт пенен раўажлана баслады. 1992-жылы 28-январьда қайта шөлкемлестирилген «Өзбекстан ҳаўа жоллары» миллий авиакомпаниясы Халықаралық Пуқаралық авиация (ИКАО) шөлкеминиң тең ҳуқықлы ағзасы болып, халықаралық авиатасыўлар базарында мүнәсип орын ийелеўге ерис­ти. Елимиздеги барлық аэропортлар қайта реконструкцияланып, заманагөй ҳаўа лайнерлери менен тәмийинленди ҳәм бул илажлар бүгинги күнде де даўам етпекте.

Өткен күни Нөкис халық­аралық аэропортында қуўанышлы ўақыя жүз берди. Қайта реконструкциядан шығарылған Нөкис халық­аралық аэропортының ашылыў салтанаты болып өтти.

Салтанатлы мәресимди Нөкис қаласы ҳәкиминиң ўазыйпасын атқарыўшы  П.Төрешов басқарып барды. Илажда Өзбекстан Республикасы Бас Министриниң Биринши орынбасары О.Раматов ҳәм Қарақалпақстан Республикасы Жоқарғы Кеңесиниң Баслығы М.Ерния­зовлар шығып сөйлеп, жаңадан иске түсип атырған аэропорт жәмәәтин, пүткил халқымызды қутлықлады.

— Өткен жылдың 1-май сәнесинен басланған аэропорттың қайта реконструкция жумыслары жуўмақланып, усы жылдың 2-июль күни сынақ ретинде Москва қаласына туўрыдан-туўры халықаралық қатнаў әмелге асырылды,-дейди Нөкис халықаралық аэропортының жолаўшылардың тасыўын шөлкемлестириў хызметиниң баслығы Қоныс Нураддинов. — Сондай-ақ, аэропорттың жаңадан иске түскен жолаўшы терминалы саатына 400 жолаўшыға хызмет көрсетип, барлық түрдеги самолёт ҳәм вертолётларды қабыл етиўге мөлшерленген. Жолаўшыларға барлық түрдеги заманагөй хызмет көрсетиў жақсы жолға қойылып, миллий архитектуралық көринистеги жолаўшылар залы, ана ҳәм балалар ханасы, саламатлық ҳәм валюта алмасыў пункти, естелик-саў­ғалар дүканы, кафе-бар ҳәм басқа да қолайлықлар жаратылған.

Салтанатлы илажға Қарақалпақстан Республикасы Министрлер Кеңесиниң Баслығы Қ.Сариев, «Ўзбекистон ҳаво йўллари» Миллий авиакомпаниясының бас директоры Б.Ҳакимов, Қарақалпақстан Республикасы Жоқарғы Кеңесиниң комитет баслықлары, министрлик ҳәм ведомстволар басшылары, район ҳәкимлери, ғалаба хабар қураллары ҳәм кең жәми­йетшилик ўәкиллери қат­насты.

Илаж соңында республикамыздың көркем өнер шеберлериниң концерт бағдарламасы қойып берилди. Әсиресе, Өзбекстан халық артисти О.Назарбековтың атқарыўындағы қосықлар илаж қатнасыўшыларына өзгеше заўық бағышлады.

 

Басқа жаңалықлар RSS

02.08.2018 ЖЫНАЯТШЫЛЫҚҚА ҚАРСЫ ГҮРЕСИЎДЕ БИРГЕ ИСЛЕСИЎДИ КҮШЕЙТИЎИМИЗ ТИЙИС

Бердақ атындағы Қарақалпақ мәмлекетлик академиялық музыкалы театрында Өзбекстан Республикасы Президенти Шавкат Мирзиёевтиң басшылығында усы жыл 27-июль күни жынаятшылықтың ерте алдын алыў бағдарындағы жумыслардың бүгинги жағдайы, бул бойынша ишки ислер уйымлары ҳәм басқа да мәмлекетлик уйымлардың жуўапкершилигин арттырыў, системада жүзеге келген машқалалар менен кемшиликлерди сапластырыў мәселелерине бағышланып болып өткен  видеоселектор мәжилисинен келип шығатуғын ўазыйпаларға арналған ушырасыў болып өтти.
 

02.08.2018 ИНВЕСТИЦИЯЛЫҚ ЖОЙБАРЛАРДЫҢ ОРЫНЛАНЫЎ БАРЫСЫ ДОДАЛАНДЫ

Қарақалпақстан Республикасы Жоқарғы Кеңесинде республикамыз делегациясының сырт еллерге сапары даўамында дүзилген инвестициялық жойбарлардың ҳәм басқа да шәртнамалардың орынланыў барысы, бул бағдарда орын алып атырған айырым машқалалар және оның шешими бойынша алда турған ўазыйпаларға бағышланған мәжилис болып өтти.

24.07.2018 АРАЛ УЛТАНЫНДА ЖӘНЕ БИР ГАЗ ҚУДЫҒЫНАН ГАЗ ШЫҚТЫ

Бурын хабар еткенимиздей, «Үстирт геофизика экспедициясы» филиалы жәмәәти бүгинги күнде Үстирт кеңислиги ҳәм Аралбойы аймақларында ҳәм оның ултанында шет ел («Лукойл», “ERIEL”) компаниялары менен биргеликте тәбийғый жер асты байлықларын излеў ҳәм изертлеў жумысларын алып бармақта. Январь айында, олар тәрепинен төменги Сүргил кәни ашылып, оны өзлестириў бойынша жумыслар баслап жиберилген еди. Үстирт излеў-бураўлаў басқармасы менен биргеликте алып барылған жумыслар нәтийжесинде күни кеше бул жерде қазылған тағы бир қудықтан газ шыға баслады.

22.07.2018 КУБОК ЖЕҢИМПАЗЛАРЫ АНЫҚЛАНДЫ

Пайтахтымыз Нөкис қаласында спорттың мини футбол, волейбол ҳәм стол тенниси бойынша Қарақалпақстан Республикасы Жоқарғы Кеңесиниң кубогы ушын болып өткен жарыс жуўмақланып, жеңимпазлар анықланды.

20.07.2018 КӨШПЕЛИ ҚАБЫЛЛАЎЛАР

Өзбекстан Республикасы Президентиниң тапсырмасына бола, бүгинги күнде республикамыздың барлық қала ҳәм районларында көшпели қабыллаўханалар шөлкемлестириў режелестирилген. Қарақалпақстан Республикасы Жоқарғы Кеңесиниң Баслығы Муўса Ерниязов республикамыздың ең шетки аймақларынан бири болған — Қоңырат районының «Қарақалпақстан» посёлкасы турғынлары менен ушырасты.

17.07.2018 ПАЙТАХТЫМЫЗДА 55 МЕТР БИЙИКЛИКТЕГИ БАЙРАҚЛАР ОРНАТЫЛАДЫ

Өзбекстан Республикасы мәмлекетлик ғәрезсизлигиниң жигирма жети жыллық байрамы алдында Нөкис қаласында Өзбекстан ҳәм Қарақалпақстан Республикаларының мәмлекетлик байрақлары орнатылады.

16.07.2018 СПОРТ ОЙЫНЛАРЫНА СТАРТ БЕРИЛДИ

Республикалық ойын түрлери ҳәм жеңил атлетика бойынша қәнигелестирилген балалар ҳәм жас өспиримлер спорт мектебинде жарыстың ашылыў салтанаты болып өтти. Илажда  Қарақалпақстан Республикасы Жоқарғы Кеңесиниң комитет баслығы С.Турманов шығып сөйлеп, жарыс қатнасыўшыларына әўмет тиледи.