Қарақалпақстан Республикасы Жоқарғы Кеңеси

⌂ ЎЗ ҚР РУ EN

Баспасөз ҳәм ғалаба хабар қураллары хызметкерлери күнине байланыслы Қарақалпақстан Республикасы Жоқарғы Кеӊеси менен Министрлер Кеӊесиниӊ байрам қутлықлаўы

«Бүгин биз жасап атырған, глобалласыў ҳәм интернет әсири деп аталған дәўирде прогрессти, турмысымызды заманагөй мәлимлеме ҳәм мәлимлеме коммуникация технологияларынан, телевидение ҳәм ғалаба хабар қуралларынан, сиз әзиз журналистлердиӊ жумысынан ажыратқан ҳалда көз алдымызға келтириўге болмайтуғынын ҳәммемиз жақсы түсинемиз және сизлердиӊ күтә машақатлы, соныӊ менен бирге, ҳүрметли мийнетиӊизди жоқары баҳалаймыз».

Ислам КАРИМОВ.

 

Әзиз дослар!

Бүгин кәсиплик байрамын кеӊ түрде белгилеп атырған барлық журналистлерди, баспа ҳәм полиграфия, радио ҳәм телевидение жәмәәтлерин, тараў ветеранларын Қарақалпақстан Республикасы Жоқарғы Кеӊеси ҳәм Министрлер Кеӊеси атынан 27-июнь - Баспасөз ҳәм ғалаба хабар қураллары хызметкерлери күни байрамы менен қызғын қутлықлаймыз.

Ҳәзирги глобалласыў әсири деп аталған дәўирде ҳәр бир дөретиўши инсан алдына қойылып атырған талаплардан келип шығып, Сизлердиӊ кеӊ жәмийетшиликти тек ғана жаӊалықлар ҳәм өзгерислер менен таныстырып қоймастан, мәлимлеме-коммуникация тармағын жетекши бағдарға айландырыў, материаллық, социаллық ҳәм руўхый тараўлардыӊ раўажланыўына қосып атырған мүнәсип үлеслериӊизди жоқары баҳалаймыз.

Бул сәне жаӊа жәмийет, жаӊа турмыс қурыў, мәмлекетимизди жаӊалаў ҳәм модернизациялаў, елимиз экономикасын және де раўажландырыў сыяқлы ийгиликли мақсетлерди өзинде жәмлеп, жаӊалыққа, руўхый дүньясын байытып барыўға умтылыўшаӊ, елимиз тынышлығын, халқымыз пәраўанлығын тәмийинлеў жолында мийнет етип атырған ҳәм де миллий идеямызға садық ҳәр бир инсан ушын әҳмийетли саналады.

Соны да айрықша атап өтиўимиз тийис, еркин ҳәм абат турмыс қурыў жолында халқымыздыӊ, әсиресе, жасларымыздыӊ руўхый дүньясын қәлиплестириўде, кеӊ жәмийетшиликти ескише көзқараслардан толық қутқарыўда, инсанларды уллы дөретиўшилик ислерге руўхландырыўда, бәрқулла сергек ҳәм қырағы болып жасаўда, Ана-әатанымызға садықлығымызды және де беккемлеўге баспасөз ҳәм ғалаба хабар қураллары хызметкерлериниӊ күш-жигери ҳәм талантына сүйенемиз.

Ҳүрметли Президентимиз И.А.Каримовтыӊ Сизлерге қарата «Мудамы алға умтылып, изленип жасайтуғын журналистлерди мен ҳәмийше қоллап-қуўатлаўға, керек пайытында жәрдем ҳәм көмек бериўге таяр екенимди, оларды өзимниӊ еӊ жақын пикирлеслерим ҳәм кеӊесгөйлерим деп билетуғынымды айтпақшыман» деген сөзлери ҳәр бириӊизге билдирилген жоқары исеним деп билемиз ҳәм де бәршеӊизди және де үлкен дөретиўшилик ислерге руўхландырады деп беккем исенемиз.

Әсиресе, соӊғы жыллары елимизде баспасөз ҳәм ғалаба хабар қуралларын ҳәр тәреплеме раўажландырыў бойынша әмелге асырылып атырған илажлар, олардыӊ сан ҳәм сапа жағынан түпкиликли өзгериўи, мобиль-телевидение, интернет-телевидение, интернет-радио сыяқлы заманагөй мәлимлеме тармақлары көпшиликтиӊ қызығыўшылығын ҳәм талабын қанаатландырыўда айрықша орын ийелемекте.

Сондай-ақ, еӊ оператив ҳәм тәсиршеӊ мәлимлеме қуралы болған интернет журналистикасыныӊ раўажланыўы, көплеген мәмлекетлик емес ғалаба хабар қуралларыныӊ жумыс баслаўы, баспасөз тараўыныӊ финанслық ғәрезсизлигин тәмийинлеў ҳәм олардыӊ турақлы раўажланыўы ушын қолайлы шараятлардыӊ жаратылыўы бүгинги күнде өзиниӊ унамлы нәтийжелерин бермекте.

Өзлериӊизге мәлим, ҳүрметли Президентимиздиӊ «Мәмлекетимизде демократиялық реформаларды және де тереӊлестириў ҳәм пуқаралық жәмийетин раўажландырыў Концепциясы»нда орын алған пикир ҳәм идеялардан келип шығып, ғалаба хабар қураллары тараўында да бир қатар нызам жойбарларын таярлаў ҳәм оларды қабыл етиў бойынша үлкен өзгерислер болмақта.

Жәмийетлик-сиясий, руўхый-ҳуқықый турмысымыздағы мине усындай жаӊаланыўлар тийкарында тараў хызметкерлериниӊ алдына бир қатар жуўапкерли ўазыйпалар қойылмақта. Соныӊ ишинде, ҳәр бириӊизден бәрқулла излениў, турмыс ҳақыйқатлығын айқын ҳәм қалыс сәўлелендириў, кәсиплик билим, шеберлик ҳәм тәжирийбени арттырып барыў, кәсипке садықлық ҳәм мәртлик, пидайылық ҳәм еркинлик талап етилмекте.

Соны да айрықша атап өтиўимиз тийис, бүгинги күнде баспасөз тараўында оперативликти күшейтиў, өткир ҳәм кеўилге қонымлы темалар үстинде излениў, басылымлардыӊ полиграфиялық сапасын жаӊа басқышларға көтериў, телерадио журналистикасында кадрлар потенциалын күшейтиў, жәмәәтте қарақалпақ ҳәм өзбек тиллери өлшемлерин толық өзлестирген ҳәм де шет тиллерде еркин пикирлей алатуғын, сөйлеў ҳәм кийиниў, өзин услап тутыў мәденияты, экранға жарасықлылығы менен ажыралып туратуғын жасларымыз санын арттырыў, олардыӊ ҳуқықый ҳәм сиясий билимлерин, шөлкемлестириўшилик уқыбын жетилистириўге болған талапты қанаатландырыў зәрүр.

Дәўир талабын жүректен сезинип, мине усындай жуўапкерли пазыйлетлериӊиз бенен ҳәр бириӊиз телерадио журналистикасын және де раўажландырыўға, миллий баспасөзимизди жәҳән стандартлары талаплары дәрежесине көтериўге мүнәсип үлес қосасыз,  деп беккем исенемиз.

Қәдирли дослар!

Сизлерди кәсиплик байрамыӊыз бенен және бир мәрте қызғын қутлықлап, бәршеӊизге беккем денсаўлық, шаӊарағыӊызға аманлық, мол ырысқы-несийбе, бахыт-ығбал, дөретиўшилик жумысларыӊызда тасқын табыслар тилеймиз.

 

Қарақалпақстан Республикасы
Жоқарғы Кеӊеси

Қарақалпақстан Республикасы
Министрлер Кеӊеси

 

 

Басқа жаңалықлар RSS

10.10.2019 Хошхабар: Тақыятас районы пахта тапсырыў шəртнамасын орынлады

Тақыятаслы пидайы, мийнеткеш пахтакешлердиң аўызбиршиликте  еткен мийнетлериниң нəтийжесинде бул район мəмлекетимизге пахта тапсырыў бойынша шəртнамалық режесин биринши болып артығы менен, яғный, 100,6 пайызға орынлап, мийнет жеңисине еристи.