Қарақалпақстан Республикасы Жоқарғы Кеңеси

⌂ ЎЗ ҚР РУ EN

Итибар ҳәм исеним - дөретиўшилик дәреги

Елимизде 27-июнь — Баспасөз ҳәм ғалаба хабар қураллары хызметкерлери күни, деп жәрияланып,  журналистлердиң кәсиплик байрамы сыпатында кеңнен белгилене баслағанына быйыл 20 жыл толды.

Мәмлекетимиздиң сиясий ҳәм экономикалық ғәрезсизлигин беккемлеў, демократиялық ҳуқықый мәмлекет ҳәм пуқаралық жәмийетин қурыў, халқымыздың мүнәсип турмыс дәрежесин тәмийинлеўге бағдарланған кең көлемли реформалардың әҳмийетин үгит-нәсиятлаўда, адамлардың руўхый дүньясын байытып барыўда баспасөз ҳәм ғалаба хабар қураллары хызметкерлериниң мийнети айрықша.

Президентимиз Ислам Кәримовтың миллий баспасөзимизди раўажландырыўға болған үлкен итибары  ҳәм ғамқорлығы нәтийжесинде журналистлердиң белсендилиги артып, жуўапкершилиги күшеймекте. Өзбекстан Республикасы Конституциясынан баслап көплеген нызам ҳүжжетлери ғалаба хабар қуралларының еркин ҳәм нәтийжели жумыс ислеўин тәмийинлеўге хызмет етпекте. Миллий баспасөзимизди заман талабына сай раўажландырыў, оның жәмийетлик-сиясий турмыстағы ролин арттырыў ушын зәрүр шараят ҳәм имканиятлар жаратыў бойынша кең көлемли илажлар әмелге асырылмақта. Әсиресе, телерадиоканаллардың жумысына заманагөй мәлимлеме технологияларын енгизиў, кадрлардың кәсиплик маманлығын ҳәм шеберлигин жетилистириў, дөретиўшилик мийнетти мүнәсип хошаметлеў мәселелерине дыққат күшейтилди. Республикамызда Интернет журналистикасының жедел раўажланып атырғаны пуқаралардың мәлимлеме алыўға болған итияжын тәмийинлеўде, елимиз турмысына байланыслы жаңалық ҳәм ўақыялардан жәмийетшиликти өз ўақтында хабардар етиўде әҳмийетли фактор болмақта.

Президентимиздиң 2011-жыл 30-декабрьде қабыл етилген «Ғалаба хабар қуралларын буннан былай да раўажландырыў ушын қосымша салық жеңилликлерин ҳәм абзаллықларын бериў ҳаққында»ғы қарары бәрше баспалардың, баспаханалардың ҳәм газета-журналларды тарқатыўшы шөлкемлердиң жумысын жақсылаў ушын қолайлы шараятлар жаратыў, олардың еркинлигин тәмийинлеў, мәмлекетлик ҳәкимият ҳәм басқарыў уйымларының жумысы үстинен жәмийетлик қадағалаўды орнатыўда жаңа имканиятлар ашпақта.

26-июнь күни Нөкисте баспасөз ҳәм ғалаба хабар қураллары хызметкерлериниң кәсиплик байрамына бағышланған салтанатлы кеше болып өтти.

Қарақалпақстан Республикасы Жоқарғы Кеңеси менен Министрлер Кеңесиниң тараў хызметкерлерине байрам қутлықлаўын Жоқарғы Кеңестиң комитет баслығы Б.Нурабуллаев оқып еситтирди.

Қарақалпақстан Республикасы Министрлер Кеңеси Баслығының орынбасары, Республикалық ҳаял-қызлар комитетиниң баслығы З.Ибрагимова ҳәм Өзбекстан Республикасы Олий Мажлиси Нызамшылық палатасының депутаты У.Жәлменов журналистлерди шын жүректен қутлықлап, дөретиўшилик жумысында табыслар тиледи.

Сондай-ақ, илажда Өзбекстан Журналистлери дөретиўшилик Аўқамы Қарақалпақстан бөлиминиң баслығы К.Реймов, Қарақалпақстан жазыўшылар аўқамының баслығы, сенатор К.Каримов, «Қорақалпоғистон тонги» газетасының бас редакторы Г.Аннақлычева, Қарақалпақстан Республикасы Руўхый үгит-нәсият орайының басшысы Ш.Уснатдинов, Қарақалпақстан Баспасөз ҳәм хабар агентлигиниң директоры Ф.Палымов ҳәм басқалар сөзге шығып, тараў хызметкерлериниң халық ийгилиги жолындағы пидайы мийнети ҳәм алдағы режелери туўралы кең түрде айтып өтти.

Кеше қатнасыўшылары быйылғы жылы «Қарақалпақстан» баспасының шөлкемлестирилгенине 85 жыл, «Қарақалпақстан мәденияты ҳәм спорты» газетасының шыға баслағанына 20 жыл, «Устаз жолы» газетасының шыға баслағанына 15 жыл  толыў мүнәсибети менен олардың жәмәәт ағзаларына ең жақсы тилеклерин билдирди.  

Илажда тараў белсендилерине Ҳүрмет жарлықлары ҳәм естелик саўғалар тапсырылды.

Кеше республика көркем-өнер шеберлериниң концерт бағдарламасы менен жуўмақланды.

 

Басқа жаңалықлар RSS

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

08.07.2019 ИСБИЛЕРМЕНЛЕРДИҢ МАШҚАЛАЛАРЫ ҮЙРЕНИЛДИ

Усы жыл 8-июль күни Қарақалпақстан Республикасы Жоқарғы Кеңесинде исбилерменлер менен ушырасыў болып өтти.