Қарақалпақстан Республикасы Жоқарғы Кеңеси

⌂ ЎЗ ҚР РУ EN

Жәмийетлик қадағалаўдың миллий ҳәм сырт ел тәжирийбесине арналды

23-июль күни Нөкисте «Омбудсман ҳәм пуқаралық жәмийетиниң өз-ара бирге ислесиўи: жәмийетлик қадағалаўды әмелге асырыўдың миллий ҳәм сырт ел тәжирийбеси» темасында Конрад Аденауэр қорының Өзбекстан Республикасындағы ўәкилханасы менен бирликте шөлкемлестирилген дөгерек сәўбети болып өтти.

Дөгерек сәўбетин Өзбекстан «Мәҳәлле» қайырқомлық жәмийетлик фонды, «Маҳалла зиёси» Республикалық оқыў-методикалық орайы директорының орынбасары Г.Йўлчиева ашты.

Онда Өзбекстан Республикасы Олий Мажлисиниң инсан ҳуқықлары бойынша ўәкили (Омбудсман) С.Рашидова, германиялы адвокат Х.Бюлер, Өзбекстан Республикасы Бас прокуратурасы Жоқарғы курсларының үлкен оқытыўшысы У.Хусанов, Өзбекстан Республикасы Олий Мажлиси Нызамшылық палатасының депутаты, Өзбекстан Экологиялық ҳәрекети депутатлық топарының ағзасы С.Джакбаров ҳәм басқалардың баянатлары тыңланды.

Баянатларда атап өтилгениндей, соңғы жылларда Өзбекстан Республикасы Олий Мажлисиниң Инсан ҳуқықлары бойынша ўәкили тәрепинен халықтың ҳуқықый саўатлылығын жетилистириўге, лаўазымлы шахслардың, тийкарынан ҳуқық қорғаў уйымы басшыларының жумыс ислеў мәдениятын арттырыўға үлкен итибар қаратылмақта. Мәмлекетлик уйымлар менен пуқаралық жәмийети институтлары арасындағы өз-ара бирге ислесиўдиң миллий әмелияты, инсан ҳуқықлары саласындағы халықаралық стандартлар, сырт ел тәжирийбеси ҳаққындағы мәлимлемелер де жәмийетшиликтиң итибарына жеткерилмекте.

Дөгерек сәўбетинде баянатлар ҳәр тәреплеме додаланып, қатнасыўшылар өз-ара пикир алысып, өзлерин қызықтырған сораўларға жуўап алды.

Илажға Прокуратура, Ишки ислер министрлиги, кәсиплик аўқамлары менен тийисли тараў хызметкерлери ҳәм ғалаба хабар қуралларының ўәкиллери қатнасты.

 

Басқа жаңалықлар RSS