Қарақалпақстан Республикасы Жоқарғы Кеңеси

⌂ ЎЗ ҚР РУ EN

Қәдир-қымбатым, сүйенишим ҳәм мақтанышымсаң, Ғәрезсиз Өзбекстан!

Ғәрезсизлик - ең уллы, ең әзиз жемис.

Елимизде барлық тараўларда ерисилип атырған жетискенликлер, үлкен қурылыс ислери, халық турмысының абаданласыўы, бәринен бурын, ғәрезсизлигимиздиң шарапаты болып табылады. Сол ушын пүткил республикамыз халқы ҳәр жылы бул даңқлы сәнени үлкен көтериңкилик пенен салтанатлы жағдайда күтип алады. Быйыл бул қутлы байрам пүткил елимиз бойлап  «Қәдир-қымбатым, сүйенишим ҳәм мақтанышымсаң, ғәрезсиз Өзбекстан!» сүрени астында кеңнен нышанланбақта.

2013-жыл, 30-август. Қәдирдан Нөкисимиз, оның күн са­йын көркейип атырған кең көшелери, әсиресе, Ашық театр бүгин  ҳәр қашанғыдан да гөззал түске енген. Театрды айлана орнатыл­ған Өзбекстан ҳәм Қарақалпақстанымыздың миллий байрақлары халқымыз жүрегиндеги мақтаныш, қуўаныш сезимлериниң тымсалы сыяқлы бәлент желбиреп тур. Ал, сахна болса  мәмлекетимиздиң дүнья тән алған жеңислери, жетискенликлери менен гөззал тәбияты  сәўлеленген рәң-бәрең сүўретлер, баннерлер, плакатлар менен безелген.

Бул жерге республика басшылары, Олий Мажлис Сенатының ағзалары, Нызамшылық палатасының, Жоқарғы Кеңестиң депутатлары, Өзбекстан Қаҳарманлары, илим, мәденият ҳәм көркем-өнер ғайраткерлери, өндирис алдынғылары, исбилерменлер, жәмийетлик шөлкемлердиң ўәкиллери жыйналды.

Саат 19.00. Шақырық намасы жаңлады. Қарақалпақстан Республикасы Жоқарғы Кеңесиниң Баслығы Муса Тажетдинович Ерниязов минберге шығып, пүткил халқымызды ғәрезсизлигимиздиң 22 жыллығы менен қызғын қутлықлады.

Өзбекстан ҳәм Қарақалпақстан Республикаларының Мәм­лекетлик гимнлери жаңлады.

Усы мәўритлерде еркин ҳәм азат турмысымызға дәслепки қәдем қойылып, ғәрезсизлик жәрия­ланған күннен баслап Президентимиз Ислам Кәримовтың басшылығында тарийхый қысқа дәўирде басып өткен әсирлерге татырлық раўажланыў жолымыз, әмелге асырған уллы ислеримиз ериксиз көз алдымызға келеди. Бул жыллар, демокра­тиялық принциплер ҳәм базар экономикасы нызамларына сүйенген жаңа жәмийет, жаңа мәмлекет қурыў жолында ерискен табысларымыз Ўатанымыздың тарийхый жылнамасына алтын ҳәриплер менен жазылатуғынына гүман жоқ.

Ҳәр бир қатары жүректи толқытып, кеўилге йош бағышлайтуғын  гимнлеримиз жаңлап бол­ған соң,  «Қәдир-қымбатым, сүйенишим ҳәм мақтанышымсаң, ғәрезсиз Өзбекстан!» атлы театрластырылған әдебий-музыкалы - хореографиялық байрам тамашалары басланды. Кон­церт­тиң бас режиссёры ҳәм көркемлик жақтан басшысы,  Қарақалпақстанға хызмет көрсеткен көркем-өнер ғайраткери Б.Өтебаев, сценарий авторы, Қарақалпақстанға хызмет көрсеткен көркем-өнер ғайраткери П.Айтмуратов, бас балетмейстер, «Қарақалпақстанға мийнети сиңген жаслар устазы» З.Пирлепесова ҳәм басқалардың мийнети арқасында концерт бағдарламасы күтә  шырайлы шығып, тамашагөйлерге айрықша заўық бағышлады.  

Өзбекстан халық артисти Ёдгор Саъдиев, Өзбекстанға хызмет көрсеткен артист Дилноза Исмияминова, «Ниҳол» сыйлығының лауреатлары Сәрбиназ Аннақулова, Гүлназ Утепова, Өзбекстан ҳәм Қарақалпақстанға хызмет көрсеткен артистлер Элиза Айтниязова, Мақсет Өтемуратов, Өзбекстанға хызмет көрсеткен артист, Қарақалпақстан халық артисти Базаргүл Каримова,  Өзбекстан ҳәм Қарақалпақстан  халық артисти Гүлхатийша Айымбетова, Қарақалпақстанға хызмет көрсеткен артистлер Дәрибай Хожабергенов, Бегис Темирбаев, Гүлнара Мунтеева ҳәм басқалардың йошлы қосықларына Бердақ атындағы Қарақалпақ мәмлекетлик университетиниң «Ҳүрлиман», Әжинияз атындағы Нөкис мәмлекетлик педагогикалық инс­титутының «Тумарис» ансамбльлери шебер қызларының шырайлы аяқ ойынлары жүдә жарасып турды.  

«Сондай еркин заманлар». «Ниҳол» сыйлығының лауреаты, «Жалғызсаң, сен, Муқаддес Ўатан» таңлаўының жеңимпазы Сәрбиназ Аннақулова атқарған  бул қосықты  тыңлағанда жүрегимизде ғәрезсиз елде бахытлы турмыс кеширип атырғанымыздан мақтаныш сезимине бөлендик.

Ғәрезсизлигимиздиң дәслепки күнлеринен-ақ, демократиялық ҳуқықый мәмлекет ҳәм әдалатлы пуқаралық жәмийетин қурыў мақсетинде «Күшли мәмлекеттен - күшли пуқаралық жәми­йетине қарай» идеясы турмысқа избе-из енгизилмекте. Бул бағдардағы үлкен жетискенликлеримизге бүгин пүткил дүнья  ҳәўес етпекте. Бул болса, халқымызға қуўаныш  ҳәм мақтаныш бағышлап, күшине күш қоспақта, ертеңги күнге болған исенимин және де арттырмақта. 

...Театр бойлап жаңлаған йошлы намалар, қосықлар, шоқ ойынлар кеўиллерге илҳам бағышлайды. Көркем өнер арқалы көрсетилип атырған елимиздиң ғәрезсизлик жылларында ерискен үлкен табысларын көрип, мийнеткеш халқымыздың дөретиўшилик қүдиретине таң қаласаң...

...Сахнаға 1-санлы Республикалық меҳрибанлық үйиниң «Таң шуғлалары» ансамбли, Нөкис қалалық мәденият ҳәм спорт ислери бөлиминиң «Ғумша» ҳәм «Нәўше» үлгили балалар жәмәәтлери, 1 ҳәм 12-санлы көркем өнер балалар музыка мектеплериниң оқыўшылары шығып келди. Олардың ат­қарыўындағы «Биз, бахытлы ғәрезсизлик перзентлеримиз» шадлы қосығы ҳәм аяқ-ойынлар кеўиллерди толқытып,  жүреклерди елжиретип жиберди.

Ҳақыйқатында да, олар ғәрезсиз елдиң бахытлы перзентлери.  Президентимиздиң басшылығында аналықты ҳәм балалықты қорғаў, саламат әўладты қәлиплестириў бағдарында әмелге асырылып атырған кең көлемли илажлар өз нәтийжесин бермекте.

Бийғубар балалықты еслетиўши бул қосық, республика спорт мектеплери тәрбияланыўшыларының  көргизбели   шығыўлары менен уласып кетти.

Ортаға Арқа-Батыс әскерий округиниң мәрт жигитлери - Ўатан қорғаўшылары нық қәдемлер менен кирип келди. Олар ана-Ўатанымыздың гөззаллығын, Қураллы Күшлеримиздиң қүдиретин жырлады.

...Жас артистлердиң атқарыўындағы қосық ҳәм намалар уллы әййямның салтанатлы руўхына өзгеше заўық бағыш етти. Усы арқалы олар  ел-журтымызды ең әзиз байрам менен қутлықлады.

Салтанат соңында Нөкис аспанында рәңбәрең фейерверк отлары жарқылдады. Бул әжа­йып тамашадан кеўиллер усы реңлер сыяқлы түрли сезимлерге бөленеди.

Бәрше шын жүректен және бир рет  «Қәдир-қымбатым, сүйенишим ҳәм мақтанышымсаң, ғәрезсиз Өзбекстан!» деп тәкирарлайды.

Байрам салтанатлары пайтахтымыздағы Ғәрезсизлик аркасы жайласқан майданда  даўам етти.

Быйылғы байрам қарсаңында  қурылған, бийиклиги 10 метр­ден зыят, узынлығы 80 метрлик арка пайтахтымыздың көркине көрик қосты. Бул жердеги фонтанлар гүзги кешти бираз сал­қынлатса да, кеўиллерде байрам кейпиятынан туўылған жыллы сезим сақланып қалды.

Елимиз ғәрезсизлигиниң 22 жыллық  байрамы республикамыздың барлық район ҳәм қалаларында даўам етпекте.

 

Басқа жаңалықлар RSS

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

17.07.2019 Өзбекстан – Қазақстан арасында халықаралық әҳмийетке ийе жол ашылды

Бүгин, 17-июль күни «Бейнеў – Ақжигит – Өзбекстан шегарасы» халықаралық автомагистралының салтанатлы ашылыў мәресими болып өтти.

 

08.07.2019 ИСБИЛЕРМЕНЛЕРДИҢ МАШҚАЛАЛАРЫ ҮЙРЕНИЛДИ

Усы жыл 8-июль күни Қарақалпақстан Республикасы Жоқарғы Кеңесинде исбилерменлер менен ушырасыў болып өтти.

06.07.2019 «ЖАСЛЫҚ»ТА КӨШПЕЛИ ҚАБЫЛЛАЎ

Усы жылдың 6-июль күни Қарақалпақстан Республикасы Жоқарғы Кеңесиниң Баслығы М.Ер­ния­зовтың пуқараларды көшпели қабыллаўы пайтахтымыз Нөкис қаласынан 300 км узақлықтағы, республикамыздың  ең шетки аймақларының бири есапланған Қоңырат районының «Жаслық» посёлка пуқаралар жыйынында болып өтти.

06.07.2019 ЖУМЫСЛАР ЖУЎАПКЕРШИЛИГИ ЖАНЛАНАЖАҚ

6-июль күни Өзбекстан Республикасы Бас министриниң орынбасары, Республика Ҳаял-қызлар комитети баслығы Элмира Боситхонова Өзбекстан Республикасы Президенти Ш.Мирзиёев тәрепинен Олий Мажлис Сенатының жигирмаланшы жалпы мәжилисинде белгилеп берилген ўазыйпалардың орынланыўын ҳәм Ҳаял-қызлар комитети хызметиниң әпиўайы ҳәм халықшыл болыўын тәми­йинлеў, усы тараў жумысларын системалы шөлкемлестириў, халық, әсиресе, ҳаял-қызлардың жасаў шараятын жақсылаўдағы тәсирин күшейтиў мақсетинде республикамызда болды.