Қарақалпақстан Республикасы Жоқарғы Кеңеси

⌂ ЎЗ ҚР РУ EN

Мәдений мийрасымыз - руўхыйлық дереги

Мәдений ҳәм тарийхый мийрасты сақлаў, үйрениў ҳәм ке­йинги әўладларға жеткериў бүгинги жасларды тәрбиялаў, олардың руўхый дүньясын байы­тыў ҳәм жәмийетти турақлы раўажландырыў ушын жүдә үлкен әҳми­йетке ийе. Өзбекстан Республикасы Президенти И.Кәримов өзиниң «Жоқары мәнаўият - жеңилмес күш» атлы китабында руўхый мийрас, мәдений қәдириятлар, әййемги тарийхый естеликлердиң руўхый дүньямызды қәлиплестириўдеги ролин жоқары баҳалаған еди.

Өзбекстан Республикасы Олий Мажлиси Сенатының Сырт­қы Сиясат мәселелери комитети, Мәденият ҳәм спорт ислери министрлиги, Илимлер Академиясы тәрепинен Бирлескен Миллетлер Шөлкеминиң Өзбекстандағы Раўажланыў бағдарламасының «Парламенттиң раўажланыўын қоллап-қуўатлаў жойбары» менен бирликте Нөкисте «Мәдений ҳәм тарийхый мийрасты қорғаў саласындағы халықаралық конвен­циялар ҳәм миллий нызам ҳүжжетлериниң Қарақалпақстан Республикасында орынланыўында жергиликли мәмлекетлик ҳәкимият уйымларының роли ҳәм ўазыйпалары» темасында семинар шөлкемлестирилди.

Илажға Өзбекстан Республикасы Олий Мажлиси Сенатының ағзалары, Нызамшылық палатасының депутатлары, тийисли министрликлер менен ведомстволардың басшылары, мәдений, тарийхый ҳәм тәбийғый мийрасты қорғаў саласында ислеўши илимпазлар, қәнигелер ҳәм экспертлер, ғалаба хабар қуралларының ўәкиллери қатнасты.

Илажды Қарақалпақстан Республикасы Жоқарғы Кеңеси Баслығының орынбасары А.Ҳамраев басқарып барды.

Илажда Өзбекстан Илимлер Академиясы Қарақалпақстан бөлиминиң баслығы, сенатор Н.Айымбетов, Өзбекстан Мәденият ҳәм спорт ислери минис­трлигиниң Мәдений мийрас объектлерин қорғаў ҳәм олардан пайдаланыў илимий-өндирислик бас басқармасы баслығының орынбасары А.Рахманов, Қарақалпақ гуманитар илимлер инс­титутының директоры М.Қарлыбаев, Қарақалпақстан Республикасы Мәденият ҳәм спорт ислери министрлигине қараслы Мәдений мийрас объектлерин қорғаў ҳәм олардан пайдаланыў инспекциясының басшысы Қ.Шарипов, Бердақ атындағы Қарақалпақ мәмлекетлик университетиниң профессоры М.Қыдырниязов өз баянатлары менен шығып сөйледи.

Баянатшылардың атап өткениндей, елимиздиң арқа-батысында жайласқан  Қарақалпақстан Республикасы соңғы ўақытларда көркем-өнер, археология тараўы илимпазларының, изерт­леўшилердиң ҳәм туристлердиң итибарын көбирек тартпақта. Регион өзине сай мәденияты, бай тарийхый мийрасы, сондай-ақ, сийрек ушырасатуғын тәбийғый орынлары, әййемги заман ҳәм орта әсирлер естеликлери менен даңқы шығып, өзинше бир «археологиялық қорықхана» ўазыйпасын атқармақта.

Елликқала районындағы  «Топыраққала» қорғаны Орайлық Азия регионындағы ең әййемги объектлердиң бири сыпатында ЮНЕСКО тәрепинен жәҳән мәденияты естеликлериниң дизимине киргизилди.

Өзбекстанда мәдений ҳәм тарийхый мийрасты қорғаўды тәмийинлеў, оларды үйрениў ҳәм халықтың кең қатламының бул объектлерге саяхат етиўин шөлкемлестириўге айрықша дыққат аўдарылмақта. Мәдений ҳәм тәбийғый естеликлерди қорғаўдың бир пүтин ҳуқықый ҳәм институционаллық системасы жаратылып, ол халықаралық ҳуқықтың бәрше нормаларын есапқа алған ҳалда ҳәр қыйлы илажлардың әмелге асырылыўын тәмийинлемекте. 1993-жылы Өзбекстан жер жүзилик мәдений, тарийхый ҳәм тәбийғый мийрасты қорғаў ҳаққындағы БМШ тың Конвенциясына қосылды. Оның талапларын орынлаў бийбаҳа мийрасымызды үйрениў ҳәм ғалабаластырыў бағдарындағы халықаралық бирге ислесиўди раўажландырыўға жәрдем етпекте. Елимизде мәдений, тарийхый ҳәм тәбийғый естеликлерди қорғаў, абайлап сақлаў ҳәм консервациялаўды ғалабаластырыўға ҳәм бул мәселелерден кең жәмийетшиликти хабардар етиўге, пуқаралардың бул бойынша ҳуқықый билим ҳәм мәдений дәрежесин арттырыўға қаратылған илажлар турақлы рәўиште алып барылмақта.

Усындай унамлы ислер менен бирге, миллий мийрасымызды қорғаў ҳәм үгит-нәсиятлаўда айырым қәте-кемшиликлер де ушырасады. Атап айтқанда,   мәмлекетлик структуралар менен мәмлекетлик емес коммерциялық емес шөлкемлердиң Конвенция талапларын ҳәм мәдений, тарийхый ҳәм тәбий­ғый мийрасты қорғаў саласындағы миллий нызамшылық ҳүжжетлерин орынлаў бойынша  жумысларын муўапықластырыўды еле де жетилистириў зәрүр. Бунда жергиликли мәмлекетлик ҳәкимият уйымлары жумысының нәтийжелилигин арттырыў, мәдений, тарийхый ҳәм тәбий­ғый мийрасымызды үгит-нәсиятлаў илажларын анық мақсетке бағдарлаў, бунда ғалаба хабар қураллары менен киностудиялардың имканиятларынан кеңирек пайдаланыў лазым. Халық­аралық ҳәм ишки туризмди раўажландырыўда, жаңа туристлик жөнелислерди ислеп шығыўда, соның ишинде экологиялық ҳәм мәдений-этнографиялық туризм саласында жумысты жанландырыў керек.

Илаж қатнасыўшылары тәрепинен жергиликли мәмлекетлик ҳәкимият уйымларының мәдений, тарийхый ҳәм тәбийғый мийрасты қорғаў саласындағы жумысларды және де жетилистириў бойынша пикир ҳәм усыныслар билдирилди.

 

Басқа жаңалықлар RSS

10.10.2019 Хошхабар: Тақыятас районы пахта тапсырыў шəртнамасын орынлады

Тақыятаслы пидайы, мийнеткеш пахтакешлердиң аўызбиршиликте  еткен мийнетлериниң нəтийжесинде бул район мəмлекетимизге пахта тапсырыў бойынша шəртнамалық режесин биринши болып артығы менен, яғный, 100,6 пайызға орынлап, мийнет жеңисине еристи.