Қорақалпоғистон Республикаси Жўкорғи Кенгеси

⌂ ЎЗ ҚР РУ EN

МЎЙНОҚДАН 200 КИЛОМЕТР ОЛИСДА – ОРОЛНИНГ ҚУРИГАН МАЙДОНИДА ЧУЧУК СУВ ТОПИЛДИ

Қорақалпоғистон Республикаси Мўйноқ туманидан 200 километр, Нукусдан 400 километр олисда “Возрождение” оролининг “Шағала” деб номланувчи жойи бор. Ўша ҳудуддан – Орол денгизининг қуриган майдонидан чучук сув топилди. 
Куни кеча – 26 январь куни сув кўзининг топилиши муносабати билан тантанали тадбир ўтказилди. Тадбирда қатор вазирлик ва идоралар раҳбарлари, мўйноқликлар ҳамда Оролнинг қуриган майдонида меҳнат қилаётган ҳашарчилар қатнашди. 
Тадбирда Қорақалпоғистон Республикаси Жўқорғи Кенгесининг Раиси М.Ерниязов йиғилганларни ушбу муҳим янгилик билан қутлади.
Оролнинг қуриган майдонига жорий йилда 500 минг гектар ерга саксовул экиш белгиланди ва ҳозирда республикамизнинг барча ҳудудларидан мингдан ортиқ ишчилар, туман аҳолиси ушбу тадбир билан банд. 
Ўзбекистон Республикаси Президенти Шавкат Мирзиёев Мўйноқ туманига алоҳида эътибор қаратмоқда. 2017 йилда туманга 101 километрлик ичимлик суви тортилди. Давлат раҳбари 2018 йили 15-16 ноябрь кунлари Қорақалпоғистонга ташрифи давомида, Мўйноқ туманига ҳам сафар уюштириб, ҳудуд аҳолиси билан учрашиб, туманнинг ижтимоий-иқтисодий ривожланиши учун қатор вазифалар белгилаб берди. Мўйноқ туманини ҳар томонлама ривожлантириш бўйича Ўзбекистон Республикаси Вазирлар Маҳкамасининг тегишли қарори қабул қилинди.
Топилган ушбу чучук сув Жанубий Орололди артезиан бассейнининг бор даври ётқизиқларидан, яъни 260-280 метр чуқурликдан топилди. Сув сарфи секундига 7 литрни ташкил қилаётган бу сувнинг минераллашуви 3 грамм, қаттиқлиги 6 миллиграмм эквивалентга тенг. 
– Жанубий Орололди артезиан бассейни ер ости сувлари Чимбой, Тахтакўпир, Қораўзак туманлари ҳудудларини қамраб олади, – дейди Оролбўйи дала гидрогеологик экспедицияси бошлиғи Шавкат Олимов. – Фойдаланишга яроқли бундай сув кўзлари ушбу туманларда ҳам топилган. Жанубий Орололди артезиан бассейни ер ости сувларини махсус ускуналар ёрдамида чучуклантириб, ичимлик суви сифатида фойдаланса ҳам бўлади. Ҳозирги кунда Чимбой, Қораўзак, Тахтакўпир туманларида шундай ускуналар ёрдамида аҳоли сувни истеъмол қилиб келмоқда.
Тўрт-беш ярусдан ташкил топган бор даври ётқизиқларининг пастки қатламларидаги жанубий Орололди артезиан бассейни ер ости сувлари термал ва минераллашган бўлиб, шифобахш хусусият касб этади. Бу каби 47-50 градус иссиқликдаги сувлар Қозоқдарё, Қораўзак, Чимбой ҳудудларида мавжуд. 
– Чучук сув кўзларининг очилиши Мўйноқда чорвачилик соҳасини ривожлантиришга асос бўлади, – дейди Мўйноқ тумани ҳокими Сайлаубай Данияров. – Шунингдек, экологик вазият яхшиланади. Қушлар, ёввойи ҳайвонлар келади. Биохилмахиллик ривожланади. Пайдо бўлган намликдан эса тузнинг ҳавога кўтарилишига ҳам тўсиқ бўлади.
Оролбўйи дала гидрогеологик экспедицияси томонидан жорий йилда Мўйноқ туманида, яъни Возрождение ороли, Сургил, Ахантай ҳудудларида шу каби 40 та сув кўзларини очишни режалаштирилган. Буниси биринчиси. Сув кўзларининг очилиши Қорақалпоғистоннинг шимолий туманларида чорвачиликни ривожлантиришга замин яратади. Шунингдек, 2021-2023 йилларда Жанубий Оролнинг қуриб қолган қисмини геологик жиҳатдан ўрганиш ишлари олиб борилиши ҳам алоҳида дастур сифатида қабул қилинган. 
Тадбирда Ўзбекистон Республикаси Бош прокурори О.Муродов, Ўзбекистон Республикаси Бош вазирининг биринчи ўринбосари О.Раматов иштирок этди.

 

 

 

Бошқа янгиликлар RSS

14.06.2019 ҚОРАҚАЛПОҒИСТОНДА АЙРИМ ФЕРМЕРЛАР ГЕКТАРИДАН 80 ЦЕНТНЕРГА ЯҚИН ҲОСИЛ ОЛМАҚДА

Бугун мамлакатимизнинг барча ҳудудида ризқ-рўзимиз бўлган ғаллани қисқа фурсатларда йиғиштириб олиш ишлари қизғин паллага кирган. Жумладан, Қорақалпоғистон Республикасининг барча туманларида ғалла ўрим-йиғим мавсуми уюшқоқлик билан давом этмоқда.

11.06.2019 Қувайтнинг яна бир инвестори билан ҳамкорлик ўрнатилмоқда

Жорий йилнинг 10 июнь куни Ўзбекистон Республикасининг Қувайт давлатидаги Фавқулодда ва Мухтор элчиси Б.Аълоев ва “Petroleum Dynamics Oil & Gas” компаниясининг вице-президенти Махаешом Арйей раҳбарлигида делегация республикамизга ташриф буюрди.

10.06.2019 Ўзбекистон театрларининг республика фестивали

Бердақ номидаги Қорақалпоқ давлат академик мусиқали театрида “Сени куйлаймиз, замондош!” Ўзбекистон театрлари V республика фестивалининг очилиш маросими бўлиб ўтди.

08.06.2019 ПИЛЛАКОРЛАРИМИЗ ШАРТНОМА РЕЖАСИНИ ОРТИҒИ БИЛАН БАЖАРДИ

Пилла – халқ бойлиги. Қишлоқ хўжалиги соҳасида пиллачиликнинг ўз ўрни бор. Буни теранг англаган республикамиз пиллакорлари ҳар йили пилладан мўл ҳосил олиш учун тинимсиз меҳнат қилмоқда.